Mbɛbusɛm 4 - BAEBOR

Tsie Nkyerɛkyerɛ

¹ Me mba, hom ntsie hom egya ne nkyerɛkyerɛ, Na hom nyɛ aso nhu ntseasee:

² Na mema hom nkyerɛkyerɛ pa; Ntsi mma hom mmpow me mbra.

³ Na aber a meyɛ abɔdomaba no, Ɔbabanyin na ɔdɔba kor ma me na na m’egya no,

⁴ Ɔkyerɛkyerɛɛ me, na ɔsee me dɛ, Ma w’akoma nsuo me nsɛm mu; Dzi me mbrasɛm do, na nya nkwa:

⁵ Nya nyansa, nya ntseasee; Mma wo werɛ mmfir, eso mma mmfi m’anomu kasa ho:

⁶ Mma mmpow no, na ɔbɔkora wo do; Dɔ no, na ɔdze wo besie.

⁷ Nyansa nye adze tsitsir; dɛm ntsi nya nyansa. Nyew, dza enya nyinara ekyir, nya ntseasee.

⁸ Huhor no, na ɔbɛma wo do: Sɛ eyɛ no etuu a, ɔbɛhyɛ wo enyimnyam.

⁹ Ɔdze enyimnyam abɔtsir bɔbɔ wo tsir: Abɔtsir fɛɛfɛw na ɔdze bɛma wo.

¹⁰ Ao, me ba, tsie, na gye me nsɛm; Na wo nkwa ne mfe adɔɔ so.

¹¹ Makyerɛkyerɛ wo nyansa ɔtsempɔn do, Magye wo afa akwan tsenn do.

¹² Sɛ enantsew nokwar mu a, w’anamɔn nnkɛkyer wo; Na itu mbirika so a, innkefintsiw.

¹³ Suo nkyerɛkyerɛ mu dzendzen; mma nngyaa no: Fa no sie; na wo nkwa ara nye no.

¹⁴ Mma nnhɛn emumuyɛfo kwan mu, Na mma nnantsew mbusubɔfo kwan mu.

¹⁵ Yi no akwa, mma nntwa mu wɔ ho; Fi ho fi, na twa mu kɔ.

¹⁶ Na wɔnnda, gyedɛ wɔabɔ mbusu ana; Na wɔagye hɔn nsamu nda, gyedɛ wɔama obi ahwe ase ana.

¹⁷ Na wodzi emumuyɛdze edziban, Na wɔnom emimdzi nsa.

¹⁸ Na atseneneefo kwan dze, ɔtse dɛ kan hyɛnhyɛn a Ɔhyerɛn mbordo araa kodu ewia ketee.

¹⁹ Emumuyɛfo kwan tse dɛ sum: Wofintsiw, naaso wonnhu dza wofintsiw do no.

²⁰ Me ba, tsie me nsɛm; Kyɛn w’aso ma me kasaa.

²¹ Mma ommfi w’enyiwa do; Fa sie w’akoma mu tɔnn.

²² Na ɔyɛ nkwa ma hɔn a wohu, Na apɔwmudzen ma hɔn honam nyinara.

²³ Fa mbɔdzen nyinara kora w’akoma do; Na no mu na nkwa pue fi ba.

²⁴ Yi ano kɔntɔnkye fi wo ho, Na ma nkontompɔ ano mfi wo nkyɛn nkɔ ekyir.

²⁵ Ma w’enyiwa nhwɛ w’enyim kan ara, Na ma w’enyisoatsɛw ntsim w’enyim ara.

²⁶ Taataa w’anamɔn pɛpɛɛpɛr, Na ma w’akwan nyinara ntsim.

²⁷ Mma nndan mmfa enyimfa anaa abankum: Twe w’anan fi mbusu ho.