Mbɛbusɛm 2 - BAEBOR

Nyansa Ho Mfaso

¹ Me ba, sɛ ibetsie me nsɛm, Na edze me mbrasɛm sie wo nkyɛn;

² Dɛ ebɛkyɛn w’aso ama nyansa, Dɛ edze w’akoma bɛma ntseasee;

³ Nyew, sɛ isu frɛ nhumu, Na ema wo ndze do frɛ ntseasee;

⁴ Sɛ ehwehwɛ no dɛ dwetɛ, Na ebɔr hwehwɛ no dɛ akoradze a ohuntsa a;

⁵ Ɔno na ebɛtse Nyankopɔn no ho suro ase, Na ehu Nyankopɔn no ho nyimdzee.

⁶ Osiandɛ EWURADZE na ɔma nyansa; N’anomu na nyimdzee na ntseasee fi ba:

⁷ Ɔkora nyansa mapa do ma tɔɔtsenyɛfo, Ɔyɛ kyɛm ma hɔn a wɔnantsew emudzi mu;

⁸ Dɛ ɔbɔweɔn atsɛmbu akwan, Na ɔakora n’ahotseweefo kwan do.

⁹ Ɔno na ebɛtse ndzeyɛtsenenee na atsɛmbu ase. Nsɛntsenenee, nyew, ɔkwan pa nyina so.

¹⁰ Na nyansa bɛhɛn w’akoma mu, Na nyimdzee ayɛ wo kra fɛw;

¹¹ Adwenmutsewee bɔweɔn wo, Ntseasee bɔkora wo do:

¹² Dɛ obeyi wo efi mbusu kwan mu, Na nyimpa a wɔka nsɛm akɔntɔnkye ho;

¹³ Nye hɔn a wɔpow akwan tsenenee, Na mbom wɔnantsew sum akwan mu;

¹⁴ Hɔn a wɔbɔ mbusu no dzi ho ehurusi, Na hɔn enyi gye mbusu akɔntɔnkyesɛm ho;

¹⁵ Hɔn a wɔkyeakyea wɔ hɔn akwan mu, Na wɔdandan hɔn akwan enyi:

¹⁶ Dɛ obeyi wo efi ɔbaa sansanyi no ne nsamu, Mekyerɛ ɔsansanyi a ɔka adɔkɔdɔkɔsɛm no ne nsamu.

¹⁷ Ɔno a ɔpa ne nkataasiaber mu kun, Na no werɛ fir ne Nyankopɔn ahyɛmu:

¹⁸ Na ne fi kom kɔ owu mu, Na n’akwan kɔ ewufo mu:

¹⁹ Obi nnkɔ ne nkyɛn nnsan mmba, Eso wonnkodu nkwa akwan mu:

²⁰ Ama aanantsew nyimpa papa kwan do, Na eesie atseneneefo akwan.

²¹ Osiandɛ tɔɔtsenyɛfo bɛtsena asaase no do, Na hɔn a wodzi mu bɛka mu.

²² Na emumuyɛfo dze, wobotwa hɔn efi asaase no do, Na hɔn a wotwa nkontompɔ no, wobotutu hɔn ase koraa efi do.