Mark 6 - BAEBOR

Wɔpow Jesus wɔ Nazarɛt

¹ Na Jesus fii hɔ kɔree, na ɔbaa nankasa no kurow mu, na n’esuafo no dzii n’ekyir.

² Na ahomgyeda no durii no, ɔhyɛɛ ase kyerɛkyerɛe wɔ nhyiamudan no mu, na nyimpadodow no tsiee no no, hɔn ho boow hɔn dɛ, Henfa na oyi nyaa dɛm ndzeyɛɛ yi? Ebɛn nyansa nye dza wɔdze ama no yi, na ebɛn tum ndwuma nye dza ɔdze ne nsa ayɛ yi?

³ Ana nnyɛ odwimfo no a ɔyɛ Mary ne ba no, James nye Judas nye Simon hɔn nua no nye yi bi? Ana nnyɛ ne nkyerɛbaa na wɔwɔ hɛn nkyɛn ha yi? Na ɔyɛɛ hɔn fintsidua.

⁴ Na Jesus see hɔn dɛ, Enyidzi mmbɔ nkɔnhyɛnyi gyedɛ nankasa no kurow mu, nye n’ebusuafo mu, nye nankasa ne fie.

⁵ Na oenntum annyɛ tum edwuma biara wɔ hɔ, gyedɛ ayarfo kumaabi a ɔdze ne nsa too hɔn do yɛɛ hɔn edur.

⁶ Na gyedzi a wonnyi yɛɛ no nwanwa. Nna okekyiin nkurobaase kyerɛkyerɛe.

Jesus Soma Duebien no

⁷ Na ɔfrɛɛ duebien no, na ɔhyɛɛ ase somaa hɔn beenu beenu, na ɔmaa hɔn tum wɔ esunsum fi do;

⁸ na ɔhyɛɛ hɔn dɛ mma wɔmmfa biribiara nntu kwan, gyedɛ poma nko: mma wɔmmfa edziban anaa kotoku, anaa sika wɔ hɔn abɔdo mu;

⁹ na wɔnhyɛ mpaboa, na mma wɔnnhyɛ ntar ebien.

¹⁰ Na ɔsee hɔn dɛ, Beebiara mbrɛ hom bɛhɛn fi biara mu no, hom ntsena hɔ nkodu dɛ hom befi hɔ akɔ.

¹¹ Na kurow biara a ɔnnkɛgye hom no, na wonnketsie hom wɔ mu no, hom fi hɔ rokɔ a, hom mporoporow hom ananadze huntuma ngye dase ntsia hɔn.

¹² Na wɔkɔree kɛpae mu kaa dɛ wonnu hɔnho.

¹³ Na wotuu mbɔnsam pii na wɔdze ngo seraa ayarfo pii saa hɔn yarba.

John Onumanyi no no Wu

¹⁴ Na Ɔhen Herod tsee, osiandɛ Jesus ne dzin tahyee: na ɔsee dɛ, John Onumanyi no enyan efi ewufo mu: dɛm ntsi na tum ndzɛmba yi reyɛ no mu edwuma no.

¹⁵ Na binom see dɛ, Elija a; na binom so see dɛ, Nkɔnhyɛnyi a, tse dɛ nkɔnhyɛfo no mu baako.

¹⁶ Na Herod tsee no, ɔsee dɛ, John a mutwaa ne tsir no enyan bio.

¹⁷ Nna Herod nankasa asoma ma woekosuo John mu akyer no akɔto efiadze, wɔ no nua Filip yer Herodias ntsi: osiandɛ nna Herod awar no.

¹⁸ Na John see Herod dɛ, Ɔmmfa mbra mu mma wo dɛ ebɔwar wo nua ne yer.

¹⁹ Na Herodias kyekyeer no hyɛɛ ne yamu, na ɔpɛɛ dɛ oku no, naaso oenntum:

²⁰ osiandɛ Herod suroo John, nna onyim dɛ ɔyɛ nyimpa tsenenee nye krɔnkrɔn ntsi, ɔbɔɔ no ho ban. Sɛ oritsie no a, no ho hyehye no dodow, naaso ɔdze dɛw tsiee no.

²¹ Na da bi a Herod ridzi n’awoda no, ɔtoo pon maa n’ekunyin nye n’asafohen nye Galilii mpanyimfo;

²² na Herodias ne babaa bae bɛsawee ma ɔsɔɔ Herod nye hɔn a wɔtse edzidzi no enyiwa: na ɔhen no see akataasia no dɛ, Bisa me biribiara a epɛ, na medze bɛma wo.

²³ Na ɔkaa ntam kyerɛɛ no dɛ, Biribiara a ibebisa me no, medze bɛma wo dze ekesi m’ahenman ne fa.

²⁴ Na ɔkɔree kɛsee ne na dɛ, Mimbisa ebɛnadze? Na ne na see dɛ, John Onumanyi no ne tsir.

²⁵ Na ntsɛmara ɔyɛɛ har baa ɔhen ne nkyɛn, na ɔbɛsee no dɛ, Mepɛ dɛ edze John Onumanyi no ne tsir to prɛtse mu ma me seseiara.

²⁶ Na ɔyɛɛ ɔhen no yaw dodoodow, na osian ne ntam nye hɔn a wɔnye no tse edzidzi no ntsi, ɔammpɛ dɛ ɔbɛka oho akyerɛ no.

²⁷ Na ntsɛmara ɔhen no somaa ɔbrafo hyɛɛ no dɛ ɔnkɛfa tsir no mbra; na ɔkɔree kotwaa John ne tsir wɔ efiadze,

²⁸ na ɔdze ne tsir no too prɛtse mu bae, na ɔdze maa akataasia no, na akataasia no dze kɛmaa ne na.

²⁹ Na n’esuafo no tsee no, wɔbae bɛfaa no fun na wɔdze kɔtoo nda bi mu.

Jesus Ma Mpemenum Edziban

³⁰ Na asomafo no boaa hɔn ano baa Jesus nkyɛn na wɔbɛkaa dza wɔayɛ nye dza wɔakyerɛkyerɛ nyina kyerɛɛ no.

³¹ Na ɔsee hɔn dɛ, Homankasa hom mbra sar do nkyɛn beebi, na hom mbɔhom kakra. Osiandɛ nna dodowara reba rokɔ ma wonnya adagyer nndzidzi mpo.

³² Na wosii mu nam hɛn mu kɔr sar do beebi.

³³ Na nyimpa pii hun dɛ worisi mu, na wonyim hɔn no, wofi nkurow nyina mu tutuu mbirika nam daadze kɔr hɔ, na wotwaar hɔn ano.

³⁴ Na ɔbaa daadze no, ohun nyimpadodow pii na ne yamu hyehyee no maa hɔn osiandɛ wɔtse dɛ nguan a wonnyi ɔhwɛfo; na ɔhyɛɛ ase kyerɛkyerɛɛ hɔn ndzɛmba pii.

³⁵ Na adze rebɛsa no, n’esuafo no baa ne nkyɛn bɛsee dɛ, Ha yɛ sar do, na adze so resa;

³⁶ gyaa hɔn ma wɔnkɔ nkuroba nye nkuraase a etwa ehyia yi mu nkɔtɔ biribi ndzi.

³⁷ Na Jesus buaa hɔn dɛ, Homara hom mma hɔn biribi ma wondzi. Na wɔsee no dɛ, Ana yɛnkɔtɔ paanoo sika denare ahaenu mfa mma hɔn ma wondzi?

³⁸ Na ɔsee hɔn dɛ, Hom wɔ paanoo ahen? Hom nkɔhwɛ. Na wɔkɔhwɛe no wɔsee dɛ, Enum, nye esunam ebien.

³⁹ Na ɔhyɛɛ hɔn dɛ wɔmma hɔn nyinara ntsenatsena ekuw ekuw wɔ efuw momon no do.

⁴⁰ Na wɔtsenatsenaa akyerɛpɛn akyerɛpɛn, ɔha, ɔha, nye eduonum, eduonum.

⁴¹ Na ɔfaa paanoo enum no, nye esunam ebien no, na ɔhwɛɛ sor no, ohyiraa do, na obubuu paanoo no, na ɔdze maa n’esuafo no dɛ wɔmfa ntoto hɔn enyim; na ɔkyɛɛ esunam ebien no mu maa hɔn nyinara.

⁴² Na hɔn nyina dzidzii na wɔmee.

⁴³ Na wɔtasee mporoporoba nkɛntsɛn duebien nye esunam no so bi.

⁴⁴ Na hɔn a wodzii paanoo no, wɔyɛ mbarimba mpemenum.

Jesus Nantsew Po Enyi

⁴⁵ Na ntsɛmara opiapiaa n’esuafo no dɛ wɔnkɔ hɛn mu na wondzi n’enyim kan wɔ esuegya noho wɔ Bɛtsaeda, ma ɔno nhwɛ, ngya nyimpadodow no kwan.

⁴⁶ Na ɔkraa hɔn no, osii mu kɔr kokwaa do kɔsɔree.

⁴⁷ Na odur anafua no, nna hɛn no wɔ po finimfin, na no nko wɔ daadze.

⁴⁸ Na ohun dɛ wɔrofona akwan, osiandɛ mframa esi hɔn enyim no, bɛyɛ anafua dasu a otsia anan no mu no ɔnantseew po enyi baa hɔn nkyɛn, na ɔyɛɛ dɛ ɔrepɛ apa hɔn ho;

⁴⁹ na hɔn dze, wohun dɛ ɔrenantsew po enyi no, wɔdween dɛ saman a, na wɔkekaa mu,

⁵⁰ osiandɛ hɔn nyina hun no ma hɔn akoma tui. Na ntsɛmara ɔnye hɔn kasae, na ɔsee hɔn dɛ, Hom nhyɛ dzen: mara a, mma hom nnsuro.

⁵¹ Na ɔkɔr hɔn nkyɛn wɔ hɛn no mu, na mframa no gyaae. Na hɔn ho boow hɔn dodoodow koraa,

⁵² osiandɛ wɔanntse paanoo no ho asɛm no ase, nna hɔn akoma epirim.

Jesus Sa Ayarfo Yarba wɔ Genesaret

⁵³ Na wotwae no, wɔbaa Genesaret asaase do na wodwirii.

⁵⁴ Na wofii hɛn mu no, ntsɛmara na wohun no,

⁵⁵ na wotutuu mbirika kekyiin asaase nyina mu, na wɔhyɛɛ ase soaa hɔn a wɔyar wɔ nkɛtɛ do baa beebiara a wɔtsee dɛ ɔwɔ no.

⁵⁶ Na beebiara a ɔkɔree, nkurobaase anaa nkurow anaa nkuroba mu o, wɔdze ayarfo totoo gua do, na wɔserɛɛ no dɛ ɔmma wɔmfa hɔn nsa nka n’atar ano ndwow nko kɛkɛ; na dodow a wɔkaa no no, hɔn ho yɛɛ hɔn dzen.