Mark 5 - BAEBOR

Gerasanyi a Mbɔnsam Afa no no

¹ Na wɔbaa po no n’egya wɔ Gerasafo asaase do.

² Na ofii hɛn no mu no, ntsɛmara na nyimpa bi a ɔwɔ sunsum fi fiir abodan mu wɔ esiei behyiaa no:

³ ɔno na ɔdze abodan mu ayɛ ne tsenabew; na obiara nntum mmfa nkɔnsɔnkɔnsɔn mpo nnkyekyer no bio,

⁴ mber pii na wɔdze mpokyerɛ nye nkɔnsɔnkɔnsɔn akyekyer no, na ɔatsetsew nkɔnsɔnkɔnsɔn no mu, ebubu mpokyerɛ no mu, na obiara nnyi ahoɔdzen dɛ ɔbɔdwedwe no.

⁵ Na dabaa adzekyee nye adzesaa nyina nna ɔwɔ abodan mu nye nkokwaa do, ɔretseatsea mu, na ɔdze abo rutwitwa noho.

⁶ Na ohun Jesus wɔ ekyirekyir no, otutuu mbirika kɔkotoow no;

⁷ na ɔdze ndze kɛse tseaa mu see dɛ, Menye wo wɔ ebɛn yɛ, Jesus, Ɔsorsor Nyankopɔn Ba? Meka Nyankopɔn dɛ mma nnhaw me!

⁸ Osiandɛ nna Jesus ase no dɛ, Sunsum fi, fi nyimpa no mu!

⁹ Na Jesus bisaa no dɛ, Wo dzin dze dɛn? Na ɔsee no dɛ, Me dzin dze Legyin, osiandɛ yɛdɔɔ so.

¹⁰ Na ɔserɛɛ no pii dɛ mma ɔmmpam hɔn mmfi asaase no do.

¹¹ Nna mprekokuw kɛse bi wɔ kokwaa ne nkyɛn a woridzidzi.

¹² Na wɔserɛɛ no see dɛ, Soma hɛn mpreko no mu, ma yɛnkɔ hɔn mu.

¹³ Na ɔmaa hɔn kwan. Na esunsum fi no fiir edzi kɛhɛɛn mpreko no mu, na okuw no nyina faa twitwi kesiaan ɔbo kronn no koguguu po no mu, wɔbɛyɛ mpemebien, na wɔtseetsee wui wɔ po no mu.

¹⁴ Na hɔn a wɔrenyɛn mpreko no guanee na wɔkɛkae wɔ kurow no mu na no nkwaado. Na wopuei bɔhwɛɛ adze kor a aba no.

¹⁵ Na wɔbaa Jesus nkyɛn no, wobohun nyia mbɔnsam faa no no dɛ ɔtse hɔ hyɛ atar, na n’adwen mu atsew no, mekyerɛ nyia a onyaa Legyin no a; na wosuroi.

¹⁶ Na hɔn a wohunii no kaa mbrɛ ɔyɛɛ nyia mbɔnsam faa no nye mpreko no ho asɛm kyerɛɛ hɔn.

¹⁷ Na wɔhyɛɛ ase serɛɛ Jesus dɛ omfi hɔn apaamu hɔ nkɔ.

¹⁸ Na ɔrokɔ hɛn no mu no, nyimpa a nkan no mbɔnsam faa no no serɛɛ no dɛ ɔnye no bɛtsena.

¹⁹ Naaso Jesus amma no kwan, na ɔsee no dɛ, Kɔ wo fie wɔ w’ebusuafo nkyɛn kɛka ndzɛmba akɛse a Ewuradze ayɛ ama wo, na mbrɛ oesi ehu wo mbɔbɔr no.

²⁰ Na osii mu kɔree, na ɔkɛhyɛɛ ase kaa ndzɛmba akɛse a Jesus yɛe maa no no wɔ Dekapolis, na ɔyɛɛ nyimpa nyina nwanwa.

Jairus ne Babaa na Basia no a Ɔkaa Jesus N’atar no

²¹ Na Jesus nam hɛn no mu twae baa esuegya bio no, nyimpadodow pii behyiaa no ho: nna ɔwɔ mpoano.

²² Na nhyiamudan mu mpanyimfo no mu baako a ne dzin dze Jairus bae; na ohun no no, ɔhwee n’ananadze,

²³ na ɔserɛɛ no pii dɛ, Me babaa kakraba ruwu: meserɛ wo, bra bɛfa wo nsa to no do, ma no ho nyɛ no dzen na onnya nkwa.

²⁴ Na ɔnye no kɔree, na nyimpadodow pii kaa no do, na wɔkyeer no do.

²⁵ Na ɔbaa bi a oenya bɔgyaagu mfe duebien,

²⁶ na oehu amandze pii wɔ eduyɛfo pii nsa, na ɔahwer dza ɔwɔ nyina, na ɔnnyɛ yie biara, na mbom sor araa na yarba no kɔ no,

²⁷ tsee Jesus ne nka no, obedzii n’ekyir nyimpadodow no mu dze ne nsa bɛkaa n’atar;

²⁸ osiandɛ ɔsee dɛ, Sɛ meka n’atar nko mpo a, mo ho bɛyɛ me dzen.

²⁹ Na ntsɛmara no bɔgya bura wewee, na ɔtsee wɔ no honam mu dɛ woeyi no mbusu no kɔ.

³⁰ Na ntsɛmara Jesus hun wɔ no mu dɛ ahoɔdzen a ɔwɔ no mu no bi efi mu no, ɔdaan noho wɔ nyimpadodow no mu see dɛ, Woana dze ne nsa kaa m’atar?

³¹ Na n’esuafo no see no dɛ, Ehu dɛ nyimpadodow no akyer wo do, na afei iribisa dɛ, Woana dze ne nsa kaa me yi ɛ?

³² Na ɔtoo n’enyi aprɔw dɛ obohu nyia ɔyɛɛ dɛm adze no.

³³ Na ɔbaa no, onyim dza wɔayɛ wɔ no mu no, dze suro nye ahopopo bae botwae hwee n’enyim na ɔkaa nokwar no nyina kyerɛɛ no.

³⁴ Na ɔsee no dɛ, Babaa, wo gyedzi agye wo: kɔ asomdwee mu, na wo ho nyɛ wo dzen mfi wo mbusu mu.

³⁵ Na Jesus da ho rekasa no, binom fi nhyiamudan mu panyin no ne fie bae bɛsee dɛ, Wo babaa no ewu: eda ho ara rehaw Kyerɛkyerɛfo no ayɛ dɛn?

³⁶ Na Jesus tsee asɛm a wɔreka no, ɔsee nhyiamudan mu panyin no dɛ, Mma nnsuro, na gye dzi ara.

³⁷ Na ɔamma obiara kwan ma oeenndzi n’ekyir, gyedɛ Peter nye James nye John, James no nua no.

³⁸ Na wɔbaa nhyiamudan mu panyin no ne fie; na Jesus hun dɛ hɔ ayɛ gyigyeegye, na nkorɔfo rusu na wɔreka mmɔn.

³⁹ Ɔkɛhɛɛn hɔ no, ɔsee hɔn dɛ, Ɔyɛ dɛn na hom reyɛ dede na hom rusu yi? Abofra no nnwui, na ɔada.

⁴⁰ Na hɔn dze, wɔsereew no twee. Na Jesus yii hɔn nyina edzi no, ɔfaa abofraba no n’egya nye ne na na ɔnye hɔn a wɔka no ho no kɔr mbrɛ abofraba no wɔ.

⁴¹ Na osuoo abofraba no ne nsamu, na ɔsee dɛ, Talita, kumi: ne nkyerɛase nye dɛ, Akataasia, mese wo dɛ, Nyan.

⁴² Na ntsɛmara na akataasia no soɛree na ɔnantsewee: (nna oedzi mfe duebien.) Na ntsɛmara hɔn ho boow hɔn kɛse.

⁴³ Na ɔbraa hɔn ketsee dɛ mma wɔnnka ma obiara nntse, na ɔsee dɛ wɔmma abofra no biribi ma ondzi.