Mark 3 - BAEBOR

Banyin no a Ne Nsa Adwedwe no

¹ Na ɔkɛhɛɛn nhyiamudan no mu bio; na nyimpa bi wɔ hɔ a ne nsa adwedwe.

² Na wɔtsɛɛw no hwɛɛ dɛ ɔbɛyɛ no edur ahomgyeda no, ama wɔaatoa no.

³ Na ɔsee nyimpa no a ne nsa adwedwe no dɛ, Soɛr gyina finimfin.

⁴ Na obisaa hɔn dɛ, Ana ɔfa mbra mu dɛ ahomgyeda wɔbɛyɛ dza oye, anaa wɔbɛyɛ dza omuo? Wɔbɛgye nkwa, anaa woboku a?

⁵ Na womuaa hɔn ano. Na ɔhwɛɛ hɔn hyiae ebufuw do, na hɔn akoma dzen ntsi ɔyɛɛ no yaw no, ɔsee nyimpa no dɛ, Tsen wo nsa. Na ɔtsenee; na ne nsa no sanee dzii mu.

⁶ Na Farisiifo no puei, na ntsɛmara wɔnye Herod akadofo kɛfaa apam wɔ mbrɛ wɔbɛyɛ asɛɛ no ho.

Nyimpadodow Hyia wɔ Mpoano

⁷ Na Jesus nye n’esuafo no twee hɔnho kɔr mpoano; na nyimpadodow pii fii Galilii kaa no do;

⁸ na wofi Judea, Jerusalɛm, Idumea, na Jordan egya, na Taere nye Sidon nkyɛn, nyimpadodow pii a wɔtsee ndzɛmba akɛse pii a ɔyɛe no, na wɔbaa ne nkyɛn.

⁹ Na ɔkaa kyerɛɛ n’esuafo no dɛ wɔnyɛ hɛn kakraba bi krado ntweɔn no wɔ nyimpadodow no ntsi, amma wɔaannkyer no do;

¹⁰ ɔnam dɛ ɔsaa pii yarba ntsi, dodowara a mbusu horow aba hɔn do no bɛkyeer no do dɛ worubosusuo no mu.

¹¹ Na esunsum fi so, sɛ wohu no a, wotwa hwe n’enyim, na wɔka mu dɛ, Ɔwo nye Nyankopɔn Ba no.

¹² Na Jesus braa hɔn ketsee dɛ mma wonnyi no nnkyerɛ.

Jesus Yi Asomafo Duebien no

¹³ Na ɔkɔr koko do, na ɔfrɛɛ hɔn a noara rohwehwɛ hɔn no, na wɔkɔr ne nkyɛn.

¹⁴ Na oyii duebien, dɛ wɔnye no bɛtsena,

¹⁵ na dɛ ɔbɔsoma hɔn ama wɔaakɛka asɛm no na woeenya tum dze etu mbɔnsam.

¹⁶ Na Simon ɔtoo no dzin Peter,

¹⁷ na Zebedee ba James, nye James no nua John; na ɔtoo hɔn dzin Boanerges, ɔno nye dɛ Senaman Mba;

¹⁸ nye Andrew, nye Filip, nye Bartholomew, nye Matthew, nye Tomas, nye Alfaeus ba James, nye Tadeus,

¹⁹ nye Keenannyi Simon, nye Judas Iskariot a ɔno na oyii no mae no.

²⁰ Na ɔbaa fie; na nyimpadodow no behyiaa bio, ma dɛm ntsi woenntum enndzidzi mpo.

²¹ Na n’ebusuafo no tsee no, wofiir edzi dɛ wɔrobɔtwe no akɔ, osiandɛ nna binom reka dɛ, N’adwen mu aka.

²² Na kyerɛwfo no a wofi Jerusalɛm bae no see dɛ, Ɔwɔ Beelzebul, na mbɔnsam hɔn panyin do na ɔnam tu mbɔnsam no.

²³ Na ɔfrɛɛ hɔn baa ne nkyɛn no, obubuu mbɛ see hɔn dɛ, Ɔbɛyɛ dɛn na Satan botum etu Satan?

²⁴ Na sɛ ahenman nye no ho dzi mpaapaamu a, ahenman no nntum nngyina.

²⁵ Na sɛ ofi nye no ho dzi mpaapaamu a, ofi no runntum nngyina.

²⁶ Na sɛ Satan asoɛr nankasa no do na oedzi mpaapaamu a, onnkotum egyina, nna n’ewiei edu.

²⁷ Na obi nntum nnkɔ ɔkatakyi bi ne fie nnkotu nhyɛ n’efidze do mfom mfa, gyedɛ odzi kan kyekyer ɔkatakyi no, ansaana ɔafom ne fie.

²⁸ Mereka akyerɛ hom pefee dɛ, Bɔn nyina wɔdze bɛkyɛ nyimpa mba, nye ebususɛm a wɔbɛka nyina;

²⁹ naaso nyia ɔbɛka ebususɛm etsia Sunsum Krɔnkrɔn no dze, orinnya fakyɛ da, na onnyiewiei afɔdzi da no do:

³⁰ osiandɛ wɔsee dɛ, Ɔwɔ sunsum fi.

Jesus Ne Na nye No Nuanom

³¹ Na ne na nye no nuanom bae begyinaa abow no enyim somae ma wɔkɛfrɛɛ no.

³² Nna nyimpadodow tsetse ne nkyɛn, na wɔsee no dɛ, Hwɛ, wo na nye wo nuanom gyina abow enyim rohwehwɛ wo.

³³ Na obuae see hɔn dɛ, Woana nye me na nye mo nuanom?

³⁴ Na ɔtoo n’enyi hwɛɛ hɔn a wɔtsetse ne nkyɛn hyiae no, ɔsee dɛ, Hwɛ, me na nye mo nuanom.

³⁵ Na obiara a ɔbɛyɛ Nyankopɔn ne pɛ no, ɔno nye mo nua, nye m’akyerɛbaa, nye me na.