Mark 2 - BAEBOR

Jesus Sa Mbubuinyi Yarba

¹ Nda kakra bi ekyir no, ɔkɔr Karpernaum bio, na wɔtsee dɛ ɔwɔ fie.

² Na dodowara behyiaa mu, ma nna wonnya kwan bio mma hɔn, nnyɛ abowano hɔ mpo; na ɔkaa asɛm no kyerɛɛ hɔn.

³ Na wɔdze mbubuinyi a nyimpa baanan so no baa no hɔ.

⁴ Na ɔnam nyimpadodow no ntsi na wonnya kwan nntwe mmbɛn no no, wɔkɛpaa dan a ɔwɔ mu no etsifi; na wotuu mu tu na wɔdze kɛtɛ a mbubuinyi no da do no duaa mu gyaagyaa mu sii famu.

⁵ Na Jesus hun hɔn gyedzi no, ɔsee mbubuinyi no dɛ, Ɔba, wɔdze wo bɔn akyɛ wo.

⁶ Nna kyerɛwfo no binom tsetse hɔ, na wɔdwendween hɔn akoma mu dɛ,

⁷ Ɔyɛ dɛn na oyi kasa dɛm yi? Ebususɛm na ɔka: woana botum dze bɔn akyɛ dɛ Nyankopɔn nkotsee?

⁸ Na ntsɛmara Jesus hun wɔ no sunsum mu dɛ wɔrodwendwen dɛm wɔ hɔn akoma mu no, ɔsee hɔn dɛ, Ebɛnadze ntsi na hom rodwendwen dɛm wɔ hom akoma mu yi?

⁹ Dza ɔwɔ hen na ɔyɛ mberɛw kɛse, dɛ ebɛse mbubuinyi no dɛ, Wɔdze wo bɔn akyɛ wo, anaa ebɛse dɛ, Soɛr, fa wo kɛtɛ, na nantsew, a?

¹⁰ Na mbrɛ ɔbɛyɛ ma hom ehu dɛ nyimpa Ba no wɔ tum wɔ asaase do dɛ ɔdze bɔn kyɛ ntsi, ɔsee mbubuinyi no dɛ,

¹¹ Mese wo dɛ, Soɛr, fa wo kɛtɛ na kɔ wo fie.

¹² Na ɔsoɛree, na ntsɛmara ɔfaa kɛtɛ no, na osii mu wɔ hɔn nyina enyim kɔree. Na ɔmaa hɔn nyina ho boow hɔn, na wɔhyɛɛ Nyankopɔn enyimnyam dɛ, Yennhun dɛm adze yi bi da.

Jesus Frɛ Levi

¹³ Na opuee bio kɔr mpoano; na nyimpadodow no nyina kɔr no hɔ, na ɔhyɛɛ ase kyerɛkyerɛɛ hɔn.

¹⁴ Na ɔresen no ohun Alfaeus ne ba Levi dɛ ɔtse atowgyebea, na ɔsee no dɛ, Ka mo do. Na ɔsoɛree kaa no do.

¹⁵ Na ɔbaa dɛ ɔtse edzidzi wɔ ne fie no; atowgyefo nye ndzebɔnyɛfo pii nye Jesus na n’esuafo bɛtsenatsenaa hɔ: nna hɔn a wɔka no do no dɔɔ so.

¹⁶ Na akyerɛwfo a wofi Farisiifo no mu no hun dɛ ɔnye ndzebɔnyɛfo nye atowgyefo ridzidzi no, wobisaa n’esuafo no dɛ, Ɔyɛ dɛn na ɔnye atowgyefo nye ndzebɔnyɛfo dzidzi nom yi?

¹⁷ Na Jesus tsee no ɔsee hɔn dɛ, Hɔn a wɔtse apɔw no, wonnhia oduyɛfo, na mbom hɔn a wɔyar no a: mammbɛfrɛ atseneneefo, na mbom ndzebɔnyɛfo a.

Mbuadadzi Ho Asɛm

¹⁸ Nna John n’esuafo nye Farisiifo no ridzi mbuada: na binom bae bebisaa no dɛ, Ɔyɛ dɛn na John n’esuafo nye Farisiifo hɔn esuafo no wodzi mbuada, na w’esuafo dze, wonndzi mbuada yi?

¹⁹ Na Jesus see hɔn dɛ, Ayeforpia mu mba no, aber a ayeforkun no wɔ hɔn nkyɛn no, aso wobotum edzi mbuada anaa? Aber tsentsen biara a wɔwɔ ayeforkun no wɔ hɔn nkyɛn no, worunntum nndzi mbuada.

²⁰ Na nda bɛba a wobeyi ayeforkun no efi hɔn nkyɛn, na da no mu nkyii wobedzi mbuada.

²¹ Obi mmfa tam fofor sin nntaa atar dadaw mu: dɛm no, dza wɔdze taa mu no yi fi mu, fofor no fi dadaw no mu, na ntsewee no yɛ kɛse.

²² Na obi mmfa wenyin fofor nngu nwomantoa dadaw mu; dɛm no, wenyin no bɛpaa nwomantoa no, na wenyin no asɛɛ, ɔnye nwomantoa no so: na wenyin fofor dze, wɔdze gu nwomantoa fofor mu.

Ahomgyeda Ho Asɛm

²³ Na ɔbaa dɛ Jesus kɛfaa eburow kwa mu ahomgyeda bi; na n’esuafo no nam rokɔ no, wɔhyɛɛ ase pempaan eburow mbɛtsem no bi.

²⁴ Na Farisiifo no see no dɛ, Hwɛ, ɔyɛ dɛn na wɔreyɛ dza ɔmmfa mbra mu wɔ ahomgyeda mu yi?

²⁵ Na ɔsee hɔn dɛ, Ana hom nnkenkaan dza David yɛe wɔ aber a ohiaa no, na ɔkɔm dzee ɔnoara na hɔn a wɔka no ho no, pɛn anaa?

²⁶ Mbrɛ ɔkɛhɛɛn Nyankopɔn ne fie, aber a Abiathar yɛ ɔsɔfopanyin no, na okedzii kyerɛpaanoo a ɔmmfa mbra mu dɛ obiara dzi, gyedɛ asɔfo no nko, na ɔmaa hɔn a wɔka no ho no so bi no?

²⁷ Na ɔsee hɔn dɛ, Nyimpa ntsi na wɔyɛɛ ahomgyeda, na nnyɛ ahomgyeda ntsi na wɔyɛɛ nyimpa:

²⁸ dɛm ntsi nyimpa Ba no yɛ ahomgyeda no so mpo no wura.