Mark 16 - BAEBOR

Jesus no Wusoɛr

¹ Na ahomgyeda no twaa mu no, Mary Magdalene nye James ne na Mary nye Salome, tɔɔ nduhuam dɛ wɔdze rokɔ akɛsera no.

² Na da a odzi dapɛn no kan no n’anapatutuitu na wɔkɔr nda no do, nna ewia epue.

³ Na wɔsesee hɔnho dɛ, Woana bepirew ɔbo no efi nda no ano ama hɛn?

⁴ Na wɔtoo hɔn enyi no wohun dɛ woepirew ɔbo no efi hɔ: osiandɛ ɔso kɛsenara.

⁵ Na wɔhɛɛn nda no mu no, wohun aberantsɛ bi a ɔtse nyimfa hyɛ atar fufuw tsentsen, na wɔbɔɔ hu.

⁶ Na ɔsee hɔn dɛ, Mma hom mmbɔ hu: hom rohwehwɛ Jesus Nazarɛtnyi a wɔbɔɔ no mbeamudua mu no; Ɔasoɛr: onnyi ha. Hwɛ mbrɛ wɔdze no toe!

⁷ Na hom nkɔ nkɛka nkyerɛ n’esuafo no, ɔnye Peter, dɛ, Oedzi hom enyim kɔ Galilii: hɔ na hom bohu no, dɛ mbrɛ ɔsee hom no.

⁸ Na wofiir edzi fiir nda no ho guanee, na ahopopo nye ahobow kaa hɔn, na wɔannka hwee annkyerɛ obiara, osiandɛ wosuroi.

MARK N’EWIEI TSENTSEN NO Jesus Yi Noho Kyerɛ Mary Magdalene

⁹ [Na ɔsoɛɛr da a odzi dapɛn no kan no anapatutuitu no, odzii kan yii noho kyerɛɛ Mary Magdalene a otuu mbɔnsam esuon fii no mu no.

¹⁰ Na ɔkɔree kɛkaa kyerɛɛ hɔn a wɔnye no tsenae a woridzi nkɔmbɔ na worusu no.

¹¹ Na hɔn dze wɔtsee dɛ ɔtse ase na oehu no no, wɔanngye enndzi.

Jesus Yi Noho Kyerɛ Esuafo Beenu Bi so

¹² Na n’ekyir no woyii no wɔ suban fofor mu kyerɛɛ hɔn mu beenu a wɔnam rokɔ ekuraase;

¹³ na hɔn so kɔree kɛkaa kyerɛɛ nkaa no; na wɔanngye hɔn so enndzi.

Jesus Yi Noho Kyerɛ Dubiako no

¹⁴ N’ekyir no a dubiako no tse edzidzi no, woyii no kyerɛɛ hɔn, na otwuuw hɔn enyim wɔ hɔn ekyingye nye hɔn akoma dzen ntsi, osiandɛ wɔanngye hɔn a wohun no dɛ ɔasoɛr no enndzi.

¹⁵ Na ɔsee hɔn dɛ, Hom nkɔ wiadze nyinara nkɛka asɛmpa no nkyerɛ abɔdze nyina.

¹⁶ Nyia ɔgye dzi na wonuma no no, obenya nkwa, na nyia ɔnngye nndzi no, wobobu no fɔ.

¹⁷ Na nsɛnkyerɛdze yi bɛka hɔn a wɔgye dzi do: wɔnam me dzin do botu mbɔnsam; wɔbɛkasa kasa fofor;

¹⁸ wɔbɛma nwɔ do, na sɛ wɔnom bɔr biara a, ɔrennyɛ hɔn hwee; wɔdze hɔn nsa bogu ayarfo do na hɔn ho ayɛ hɔn dzen.

Jesus no Sor Nkɔree

¹⁹ Na afei Ewuradze Jesus kasaa kyerɛɛ hɔn ekyir no, wɔfaa no kɔr sor, na ɔkɛtsenaa Nyankopɔn abanyimfa.

²⁰ Na hɔn dze, wofii hɔ kɔree kɛkaa asɛm no wɔ mbea nyina, Ewuradze nye hɔn yɛɛ edwuma, na ɔdze nsɛnkyerɛdze hyɛɛ asɛm no dzen.] Amen.