Mark 14 - BAEBOR

Wɔfa Jesus ho Apam

¹ Nna aka nda ebien ma apaho nye epitsi afahyɛ no edu; na asɔfompanyin nye kyerɛwfo no hwehwɛɛ mbrɛ wɔbɛyɛ nam nyansa mu akyer Jesus na woeku no:

² na wɔsee dɛ, Nnyɛ afahyɛ mu bi a, amma wentwiwentwi aammba ɔman no mu.

Wɔsera Jesus Ngo wɔ Bɛtani

³ Na ɔwɔ Bɛtani Simon kwatanyi no fie, na ɔtse edzidzi no, ɔbaa bi baa hɔ a ɔdze alabastron toa a nard ngohuam a ɔsom bo wɔ mu; na ɔbɔɔ toa no na ohuei guu n’etsifi.

⁴ Na binom wɔ hɔ a wonyaa ebufuw wɔ hɔn mu, na wɔsee dɛ, Ebɛnadze ntsi na wɔresɛɛ ngohuam yi?

⁵ Nkyɛ wobotum atɔn ngohuam yi agye bɔbor sika denare ahaasa na wɔdze ama ehiafo. Na wohwinhwinii tsiaa no.

⁶ Na Jesus see dɛ, Hom ngyaa no; ebɛnadze ntsi na hom rehaw no? Ɔayɛ edwuma pa wɔ mo ho.

⁷ Na hom wɔ ehiafo wɔ hom nkyɛn daa, na aber biara a hom pɛ, hom botum ayɛ hɔn yie, na emi dze, hom nnyi me daa.

⁸ Ɔayɛ dza obotum: oedzi kan abɛsera me nyimpadua akɔ sie mu.

⁹ Nokwar mese hom dɛ, Beebiara a wɔbɛka asɛmpa yi wɔ wiadze nyina mu no, dza ɔbaa yi ayɛ so wɔbɛka dze ayɛ ne nkaa.

Judas Pen do dɛ Obeyi Jesus Ama

¹⁰ Na Judas Iskariot a ɔyɛ duebien no mu baako fii hɔ kɔr asɔfompanyin no nkyɛn dɛ obeyi Jesus ama hɔn.

¹¹ Na wɔtsee no, ɔyɛɛ hɔn dɛw, na wɔbɔɔ anohoba dɛ wɔbɛma no sika. Na ɔhwehwɛɛ mbrɛ obesi eyi no ama wɔ ber a ɔsɛ mu.

Jesus nye N’esuafo no Dzi Apaho no

¹² Na epitsi da a odzi kan a woku apahoguan no, n’esuafo no see no dɛ, Hen na epɛ dɛ yekesiesie ma ikedzi apaho no?

¹³ Na ɔsomaa n’esuafo no mu beenu, na ɔsee hɔn dɛ, Hom nkɔ kurow no mu, na nyimpa bi a ɔso nsuhina behyia hom: hom nka no do;

¹⁴ na beebiara a ɔbɛhɛn no hom nse ofiwura no dɛ, Kyerɛkyerɛfo no se, M’ahɔhodan a menye m’esuafo bedzi mu apaho no wɔ hen?

¹⁵ Na ɔnoara ɔbɛkyerɛ hom sordan kɛse bi a wɔahyehyɛ mu, na woesiesie mu; hɔ na hom nsiesie mma hɛn.

¹⁶ Na esuafo no sii mu kɔree, na wɔbaa kurow no mu na wobohun dɛ mbrɛ ɔsee hɔn no, na wosiesiee apaho no.

¹⁷ Na odur ewimbir no, ɔnye duebien no bae.

¹⁸ Na wɔtwetwer hɔ ridzidzi no, Jesus see dɛ, Ampa mese hom dɛ, Hom mu baako a ɔnye me dzidzi na obeyi me ama.

¹⁹ Na ɔyɛɛ hɔn awerɛhow na wɔhyɛɛ ase nkorkor bisaa no dɛ, Ana emi a?

²⁰ Na ɔsee hɔn dɛ, Duebien no mu baako a ɔnye me to nsa wɔ ɔsɛn no mu no a.

²¹ Na nyimpa Ba no rokɔ, dɛ mbrɛ wɔakyerɛw wɔ no ho; naaso nyimpa a wɔnam no do beyi nyimpa Ba no ama no ndue! Sɛ wɔannwo dɛm nyimpa no a, nkyɛ oye ma no.

Ewuradze Edzidzi no

²² Na woridzidzi no, ɔfaa paanoo na ohyiraa do na obubui, na ɔdze maa hɔn; na ɔsee dɛ, Hom ngye: iyi nye me nyimpadua.

²³ Na ɔfaa kɔɔpow na ɔdaa ase no, ɔdze maa hɔn ma hɔn nyina nomee.

²⁴ Na ɔsee hɔn dɛ, Iyi nye mo bɔgyaa a ɔyɛ ahyɛmu no a dodowara ntsi woruhue egu no.

²⁵ Nokwar mese hom dɛ, moronnom wenyinaba no bi bio, dze ekodu da a mobɔnom no fofor wɔ Nyankopɔn ahenman no mu.

²⁶ Na wɔtoow ndwom no, wofiir edzi kɔr Ngo Bepɔw no do.

Jesus Ka dɛ Peter Bɛpa no

²⁷ Na Jesus see hɔn dɛ, Wɔbɔto hom nyina fintsidua: na wɔakyerɛw dɛ, Mobɔbɔ oguanhwɛfo no, na nguan no abɔ apetse.

²⁸ Naaso mo wusoɛr ekyir no mibedzi hom enyim akɔ Galilii.

²⁹ Na Peter see no dɛ, Sɛ wɔbɔto hɔn nyina fintsidua mpo a, nnyɛ emi a.

³⁰ Na Jesus see no dɛ, Nokwar mese wo dɛ, Ndɛ anadwe yi, ansaana akokɔ bɔbɔn mprɛnu no, ebɛpa me mprɛnsa.

³¹ Na Peter dze, mbom ɔkaa no enyiberdo dɛ, Sɛ menye wo bowu mpo a, meremmpa wo da; na dɛmara na hɔn nyina so kae.

Jesus ne Mpaabɔ wɔ Getsemane

³² Na wodur beebi a wɔfrɛ hɔ Getsemane; na ɔsee n’esuafo no dɛ, Hom ntsena ha ma monkɔsɔr.

³³ Na ɔfaa Peter nye James nye John kaa noho, na ɔhyɛɛ ase bɔɔ hu na ɔbɔmee.

³⁴ Na ɔsee hɔn dɛ, Awerɛhow ahyɛ me kra do dze kɔ owu mu: hom ntsena ha, na hom nweɔn.

³⁵ Na ɔkɔr enyim kakra, na ɔkɔhwee famu na ɔsɔɔr dɛ, sɛ ɔbɛyɛ a, dɔn no mpa no ho nkɔ.

³⁶ Na ɔsee dɛ, Aba, Egya! Adze biara nnso wo yɛ: yi kɔɔpow yi pa mo ho; naaso nnyɛ dza mepɛ bi a, na dza ɔwo epɛ a.

³⁷ Na ɔbae bohun dɛ wɔdeda, na ɔsee Peter dɛ, Simon, ana ada? Ana enntum annweɔn dɔnhwer kor mpo?

³⁸ Hom nweɔn na hom nsɔr, amma hom aannkɔ nsɔhwɛ mu: sunsum no pɛ dze, naaso honam yɛ mberɛw.

³⁹ Na osii mu kɔr bio, na ɔkɔsɔree kaa asɛm kor no ara.

⁴⁰ Na ɔsanee bae bohun hɔn dɛ wɔdeda bio, na hɔn enyiwa akom; na woennya mbuae bi amma no.

⁴¹ Na ɔbaa ne mpɛn ebiasa, na ɔsee hɔn dɛ, Hom nda dza aka yi, na hom nhom. Ayɛ yie! Dɔn no edu; hwɛ, woriyi nyimpa Ba no ahyɛ ndzebɔnyɛfo nsa.

⁴² Hom nsoɛr ma yɛnkɔ; hwɛ, nyia oriyi me ama no abɛn.

Wɔkyer Jesus

⁴³ Na hɔnara, ɔda do rekasa no, Judas a ɔyɛ duebien no mu baako bae, na nyimpadodow a wɔdzedze nkrantsee nye mpɔtsibaa fi asɔfompanyin nye kyerɛwfo nye mpanyimfo no hɔ ka no ho.

⁴⁴ Na nyia oyii no mae no maa hɔn asɛnkyerɛdze dɛ, Nyia mebɛfew n’ano no, nye ɔno: hom nkyer no na hom nsuo no mu yie mfa no nkɔ.

⁴⁵ Na odur hɔ no, ntsɛmara na ɔbaa Jesus nkyɛn na ɔsee no dɛ, Kyerɛkyerɛfo, na ɔfeew n’ano.

⁴⁶ Na wɔdze hɔn nsa susuoo no mu na wɔkyekyeer no.

⁴⁷ Na hɔn a wogyinagyina hɔ no mu baako twee ne krantsee bɔɔ ɔsɔfopanyin n’akowaa twaa n’aso.

⁴⁸ Na Jesus buae see hɔn dɛ, Ana hom firii baa mo do dɛ hom reba owifo do, na hom dze nkrantsee nye mpɔtsibaa rebɛkyer me yi?

⁴⁹ Daa mowɔ hom nkyɛn wɔ asɔrfi mu kyerɛkyerɛe no, hom annkyer me; na dɛ kyerɛwsɛm no bɛba mu ntsi a.

⁵⁰ Na esuafo no nyinara gyaa no hɔ, na woguanee.

⁵¹ Na aberantsɛ baako bi kaa no do a nna oetu ndwera akata n’adagyaw do; na wɔkyeer no;

⁵² na ogyaa ndwera no hɔ na ɔdze adagyaw guanee.

Wɔdze Jesus Kɔ Mpanyimfo no Enyim

⁵³ Na wɔdze Jesus kɔr ɔsɔfopanyin no hɔ; na asɔfompanyin nye mpanyimfo nye kyerɛwfo no nyina behyiaa ne nkyɛn.

⁵⁴ Na Peter dzii n’ekyir wɔ ekyirekyir dze kodur ɔsɔfopanyin n’abanguado, na ɔnye asomfo no kɛtsenaa hɔ too gya.

⁵⁵ Na asɔfompanyin nye baguafo no nyina hwehwɛɛ dɛ wobenya Jesus ho dase bi dze eeku no; naaso woennya bi.

⁵⁶ Na dodowara gyee no ho dasewia, na hɔn dasee annsaa.

⁵⁷ Na binom soɛree gyee no ho dasewia dɛ,

⁵⁸ Yɛtsee dɛ ɔsee dɛ, Mubodwuruw asɔrdan a wɔdze nsa ayɛ yi na ndaansa mu matow bi a wɔammfa nsa annyɛ.

⁵⁹ Na dɛm no mpo so hɔn dasee annsaa.

⁶⁰ Na ɔsɔfopanyin no gyinaa finimfin na obisaa Jesus dɛ, Immbua bi? Ebɛnadze na yinom regye wo ho dase yi?

⁶¹ Na omuaa n’ano, na oemmbua bi. Na ɔsɔfopanyin no bisaa no bio dɛ, Ana ɔwo nye Kraest no, nyia woehyira no no ne Ba no?

⁶² Na Jesus see dɛ, Emi nye no: na hom bohu nyimpa Ba no dɛ ɔtse tum no abanyimfa, na ɔreba wɔ sor nsuwusiw mu.

⁶³ Na ɔsɔfopanyin no sunsuaan n’atar mu, na ɔsee dɛ, Ebɛn hia na ohia hɛn adasefo bio?

⁶⁴ Hom atse ebususɛm no: hom dwen dɛn? Na hɔn nyinara buu no fɔ dɛ ɔsɛ owu.

⁶⁵ Na binom hyɛɛ ase hinaa ntafi guu no do, na wɔkataa n’enyi, na wɔbobɔɔ no ekutuku, na wɔsee no dɛ, Hyɛ nkɔm! Na asomfo no bobɔɔ no asotɔr.

Peter Ka dɛ Onnyim Jesus

⁶⁶ Na Peter wɔ ase wɔ abangua no do hɔ no, ɔsɔfopanyin ne mbaawa no mu baako bae,

⁶⁷ na ohun Peter dɛ ɔroto gya no, ɔhwɛɛ no dzinn na ɔsee no dɛ, Ɔwo so nye Nazarɛtnyi Jesus nam.

⁶⁸ Na ɔsaan dɛ, Minnyim no, eso menntse dza ereka yi ase mpo. Na ofiir edzi kɔr paado; na akokɔ bɔnee.

⁶⁹ Na abaawa no hun no na ɔhyɛɛ ase see hɔn a wogyina hɔ no dɛ, Oyi so fi hɔn mu.

⁷⁰ Na ɔsaan bio. Na ɔkyɛɛr kakra no, hɔn a wogyina hɔ no see Peter bio dɛ, Ampa dɛ ifi hɔn mu, osiandɛ eyɛ Galiliinyi.

⁷¹ Na ɔhyɛɛ ase dzii nsew na ɔkekaa ntam dɛ, Minnyim nyimpa yi a hom reka no ho asɛm yi.

⁷² Na ntsɛmara na akokɔ bɔɔn ne mpɛn ebien. Na Peter kaa asɛm no a Jesus kaa kyerɛɛ no no dɛ, Ansaana akokɔ bɔbɔn mprɛnu no, ebɛpa me mprɛnsa. Na ɔhyɛɛ ase sui.