Mark 13 - BAEBOR

Asɔrfi no Ne Nsɛe ho Nkɔnhyɛ

¹ Na orifi asɔrfi mu no, n’esuafo no mu baako see no dɛ, Kyerɛkyerɛfo, hwɛ, abo akɛse bi nye aban akɛse bi so!

² Na Jesus see no dɛ, Ehu aban akɛse yi? Wonnkegya ɔbo kor a ɔda kor do a wonnkodwuruw egu famu.

Amandzehu na Atseetsee

³ Na ɔtse Ngo Bepɔw no do wɔ asɔrfi tsentsendo no, Peter, James, John nye Andrew bisaa no nsumaa mu dɛ,

⁴ Kyerɛ hɛn aber a iyinom bɛyɛ hɔ: na sɛ iyinom nyina rebɛba mu a, n’asɛnkyerɛdze nye dɛn?

⁵ Na Jesus hyɛɛ ase see hɔn dɛ, Hom nhwɛ yie amma obi aanndaadaa hom.

⁶ Na dodowara bɛba wɔ me dzin mu dɛ, Emi nye no, na wɔadaadaa pii.

⁷ Na sɛ hom tse ko nye akosɛm a, mma hom akoma nntu: na otwar dɛ ɔba, na ewiei no nnyae nndurii.

⁸ Na ɔman bɔsoɛr ɔman do, na ahenman bɔsoɛr ahenman do; na asaasewosow bɛba mbeambea, na ɔkɔm bɛba: iyinom dze, awoko no ahyɛse ara a.

⁹ Na hom nhwɛ homho yie: na wobeyi hom akɔ mpanyimfo bagua mu, na wɔahwe hom wɔ nhyiamudan mu, na hom egyina ambradofo nye ahemfo enyim wɔ me ntsi, dze edzi dase akyerɛ hɔn.

¹⁰ Na asɛmpa no, otwar dɛ wɔka kyerɛ amanaman nyina ansaana.

¹¹ Na sɛ wɔdze hom rokɔ ekeyi hom ama a, mma hom nndwendwen dza hom bɛka ho ansaana: na biribi a wɔdze bɛma hom dɔn no mu no, ɔnoara na hom nka: osiandɛ nnyɛ hom na hom kasa, na Sunsum Krɔnkrɔn no a.

¹² Na nua beyi nua ama owu, egya beyi ɔba ama; na mba bɔsoɛr wɔ awofo do na wɔama woeku hɔn.

¹³ Na nyimpa nyina bɛtan hom wɔ me dzin ntsi; na nyia ɔbɛtsena mu ekodu ewiei no, ɔno na wɔbɛgye no nkwa.

Ahohiahia Kɛse no

¹⁴ Na sɛ hom hu amambɔe ekyiwadze no dɛ ogyina mbrɛ ɔnnsɛ a (ma nyia ɔrekenkan no ntse ase dɛ ogyina hɔ ma ohonyi no), ɔno na hɔn a wɔwɔ Judea no nguan nkɔ nkokwaa do;

¹⁵ na mma nyimpa a ɔwɔ dan etsifi nnsian mmba dan mu, na eso mma ɔnnhɛn mu nnkɛfa biribi wɔ ne dan mu;

¹⁶ na mma nyia ɔwɔ haban mu no nnsan n’ekyir bio mmbɛfa ne nkatado.

¹⁷ Na hɔn a wɔafa efur nye hɔn a wɔma numfo wɔ nda no mu ndue!

¹⁸ Na hom nsɔr ma iyinom aammba awɔwber mu.

¹⁹ Na nda no mu bɛba ahohiahia kɛse a ofitsi Nyankopɔn ne wiadze mbɔe ahyɛse araa bodu aber no ɔmmbaa dɛm da, eso bi remmba da.

²⁰ Na sɛ Ewuradze enntwa nda no do tsia a, nkyɛ honam biara nnkenya nkwa, na ne mpamufo a ɔpaa hɔn no ntsi oetwa nda no do tsia.

²¹ Na aber no sɛ obiara se hom dɛ, Hwɛ, Kraest no wɔ ha, anaaso, Hwɛ, ɔwɔ hɔ no a, mma hom nngye nndzi,

²² na Kraest atorfo, nye nkɔnhyɛfo atorfo bɔsoɛr na wɔakyerɛ nsɛnkyerɛdze nye anwanwadze a sɛ anhwɛ a, wɔdze bɛdaadaa mpamufo no mpo.

²³ Na hom dze, hom nhwɛ yie: osiandɛ medzi kan aka ne nyina akyerɛ hom.

Nyimpa Ba no ne Mbae

²⁴ Na dɛm ahohiahia nda no ekyir no, ewia bɛhyɛ sum, na bosoom nnkɛma ne kan,

²⁵ na nworaba fi sor bɔtotɔ, na sor etum bɔwosow.

²⁶ Ɔno na wobohu nyimpa Ba no dɛ ɔreba wɔ nsuwusiw do, wɔ tum nye enyimnyam kɛse mu.

²⁷ Na ɔno na ɔbɔsoma n’abɔfoe ma wɔaakɔboaboa ne mpamufo no ano efi mframa anan no mu, ofi asaase ano kesi sor ano.

Adɔmbadua no ho Esuadze

²⁸ Hom nsua adɔmbadua no ho bɛ no: sɛ n’abaw yɛ momon, na oriyi ahaban a, nna hom nyim dɛ ɔhyewber abɛn;

²⁹ dɛmara na hom so sɛ hom hu dɛ yinom yɛ hɔ a, hom nhu dɛ abɛn, edu abowano.

³⁰ Nokwar mese hom dɛ, Mbasantsen yi nnkotwa mu akɔ gyedɛ yinom nyina ayɛ hɔ ansaana.

³¹ Ɔsor nye asaase botwa mu akɔ na me nsɛm dze, wonnkotwa mu akɔ da.

Obiara Nnyim Da No Anaa Dɔn no

³² Na da no nye dɔn no dze obiara nnyim: abɔfo a wɔwɔ sor no so nnyim, Ɔba no so nnyim, gyedɛ Egya no nko.

³³ Hom nhwɛ yie, hom nweɔn na hom mbɔ mpaa, na hom nnyim da pɔtsee a ber no bodu.

³⁴ Ɔtse dɛ nyimpa a ɔrodɔ mu a ogyaa ne fi, na ɔmaa no nkowaa tum, na ɔmaa hɔn nyina hɔn edwuma nkorkor, na ɔhyɛɛ abowanohwɛfo no dɛ ɔnweɔn.

³⁵ Dɛm ntsi hom nweɔn, na hom nnyim dɔn kor a ofiwura bɛba: adansaber o, esuom o, akokɔbɔnee o, anapahema o;

³⁶ amma ɔaammba awerɛfir mu emmbohu hom dɛ hom deda.

³⁷ Na dza meka kyerɛ hom yi, meka kyerɛ nyimpa nyina so dɛ, Hom nweɔn.