Mark 11 - BAEBOR

Jesus Kɔ Jerusalɛm dɛ Konyimdzifo

¹ Na wɔbɛɛn Jerusalɛm wɔ Bɛtfage nye Bɛtani, wɔ Ngo Bepɔw ho no, ɔsomaa n’esuafo no mu beenu,

² na ɔsee hɔn dɛ, Hom nkɔ ekuroba a ɔda hom enyim no mu: na hom du hɔ ara pɛr a, hom bohu asoasopɔnkɔba bi a wɔamontan no a nyimpa biara nntsenaa do da: hom nsan no mfa no mbra.

³ Na sɛ obi bisa hom dɛ, Ɔyɛ dɛn na hom reyɛ yi a, hom nse dɛ, Ewuradze wɔ no ho hia, na ntsɛmara ɔbɛma wɔdze no aba ha.

⁴ Na wɔkɔree no wokohun asoasopɔnkɔba no dɛ wɔamontan no abow ho, wɔ abɔntsen petee mu, na wɔsaan no.

⁵ Hɔn a nna wogyina hɔ no bi bisaa dɛ, Hom resan asoasopɔnkɔba no ayɛ dɛn?

⁶ Na wobuaa hɔn dɛ mbrɛ Jesus see hɔn no ara; na wɔmaa hɔn kwan.

⁷ Na wɔdze asoasopɔnkɔba no brɛɛ Jesus, na wɔtoow hɔn ntar guu no do; na ɔtsenaa no do.

⁸ Na dodowara dze hɔn ntar sesɛɛw kwan mu; na binom so dze ndubaa a woetwitwa wɔ efuw mu.

⁹ Na hɔn a wodzii enyim no, na hɔn so a wodzii ekyir no tseaa mu dɛ, Hosanna! Nhyira nye nyia ɔnam Ewuradze dzin mu reba no!

¹⁰ Nhyira nye hɛn egya David ahendzi a ɔreba no! Hosanna wɔ sorsor!

¹¹ Na ɔkɛhɛɛn Jerusalɛm no, ɔkɔr asɔrfi no mu; na ɔahwɛ ndzɛmba nyina ewie, na adze resa no, ɔnye duebien no fii hɔ kɔr Bɛtani.

Jesus Dze Ndom Gu Adɔmbadua do

¹² Na adze kyee a wofi Bɛtani reba no, ɔkɔm dzee Jesus.

¹³ Na ohun adɔmbadua bi wɔ ekyirekyir dɛ ahaban wɔ do no, ɔkɔr hɔ dɛ bi a nkyɛ obohu biribi wɔ do, naaso odur hɔ no oennhu biribiara dɛ ahaban nko: osiandɛ nna adɔmba ber nndurii.

¹⁴ Na Jesus see adɔmbadua no dɛ, Mma obi nndzi wo do eduaba bio da. Na n’esuafo no tsee.

Jesus Tu Eguadzifo Fi Asɔrdan no mu

¹⁵ Na wodur Jerusalɛm; na ɔkɔr asɔrfi no mu, na ɔhyɛɛ ase paam hɔn a wɔtɔn nye hɔn a wɔtɔ wɔ asɔrfi no mu, na obutuuw sikasesafo hɔn apon nye hɔn a wɔtɔn mbubur no hɔn ngua;

¹⁶ na ɔamma kwan amma obiara aannsoa adze ammfa asɔrfi no mu.

¹⁷ Na ɔkyerɛkyerɛe see hɔn dɛ, Ana wɔnnkyerɛw no dɛ, Wɔbɛfrɛ me fi asɔryɛbea ama amanaman nyinara? Naaso hom dze, hom ayɛ no edwotwafo tu.

¹⁸ Na asɔfompanyin nye kyerɛwfo no tsee, na wɔhwehwɛɛ mbrɛ wɔbɛyɛ asɛɛ no: na wosuroo no, osiandɛ ne nkyerɛkyerɛ yɛɛ nyimpadodow nyina ahobow.

¹⁹ Na adzesae no, Jesus nye n’esuafo no fii kurow no mu hɔ.

Adɔmbadua no ho Esuadze

²⁰ Na anapa no a wɔresen no, wohun adɔmbadua no dɛ ofitsi no ndwow akyenkyen.

²¹ Na Peter kaae na ɔsee no dɛ, Kyerɛkyerɛfo, hwɛ, adɔmbadua a edoom no no akyenkyen.

²² Na Jesus buaa hɔn dɛ, Hom nya gyedzi wɔ Nyankopɔn mu.

²³ Na nokwar mese hom dɛ, Obiara a ɔbɛse kokwaa yi dɛ, Tutu na kɔhwe po mu, na ɔnnyɛ ekyingye wɔ n’akoma mu, na ɔbɛgye edzi dɛ dza ɔrese no ɔreyɛ hɔ no, ɔbɛyɛ hɔ ama no.

²⁴ Dɛm ntsi mese hom dɛ, Biribiara a hom sɔr bisa no, hom ngye ndzi dɛ hom enya na hom benya.

²⁵ Na sɛ hom gyina hɔ rosɔr, na sɛ hom nye obi wɔ asɛm bi a, hom mfa nkyɛ, ama hom Egya a ɔwɔ sor no so dze hom mfom aakyɛ hom.

²⁶ [Na sɛ hom ammfa annkyɛ a, hom egya a ɔwɔ sor no so nnkɛfa hom mfom akyɛ hom.]

Jesus no Tum ho Asɛmbisa

²⁷ Na wɔbaa Jerusalɛm bio; na ɔnenam asɔrfi no mu no, asɔfompanyin nye kyerɛwfo nye mpanyimfo no baa ne nkyɛn,

²⁸ na wobisaa no dɛ, Ebɛn tum na edze yɛ ndzɛmba yi, anaa woana na ɔmaa wo tum dɛ yɛ yinom?

²⁹ Na Jesus see hɔn dɛ, Mibebisa hom asɛm kor, na hom mbua me, na mebɛkyerɛ hom tum kor a medze yɛ yinom:

³⁰ John enuma no, ofir sor anaa ofir nyimpa? Hom mbua me.

³¹ Na wɔdwendween ho wɔ hɔn ntamu dɛ, Sɛ yɛka dɛ, Ofir sor a, ɔbɛse dɛ, Ɔyɛ dɛn na hom anngye no enndzi?

³² Anaa yɛnka dɛ, Ofir nyimpa? Nna wosuro nkorɔfo no, osiandɛ hɔn nyina buu John dɛ ɔyɛ nkɔnhyɛnyi ampa.

³³ Ntsi wobuaa Jesus see no dɛ, Yennyim. Na Jesus see hɔn dɛ, Mo so mennkɛkyerɛ hom tum kor a medze yɛ yinom.