Luke 24 - BAEBOR

Jesus no Wusoɛr

¹ Na da a odzi dapɛn no kan no, anapaatu no na mbaa no dze nduhuam a wosiesiei no kɔr nda no do.

² Na wokohun ɔbo no dɛ woepirew no efi nda no abowano.

³ Na wɔhɛɛn mu no, woennhu Ewuradze Jesus no fun.

⁴ Na ɔbaa dɛ iyi yɛɛ hɔn adwen mu basabasa no, hwɛ, mbarimba beenu begyinaa hɔn nkyɛn a wɔhyɛ ntar hyɛnhyɛn;

⁵ na hu kaa hɔn, na wɔbɔɔ hɔn enyi adze sensɛɛn famu no, wɔsee hɔn dɛ, Ɔyɛ dɛn na hom rohwehwɛ nyia ɔtse ase no wɔ ewufo mu yi?

⁶ Onnyi ha, na ɔasoɛr: hom nkaa mbrɛ ɔda ho wɔ Galilii no, ɔkaa kyerɛɛ hom dɛ

⁷ ɔsɛ nyimpa Ba no dɛ wobeyi no ahyɛ ndzebɔnyɛfo nsa na wɔabɔ no mbeamudua mu na da a otsia ebiasa no ɔasoɛr bio no.

⁸ Na wɔkaa ne nsɛm no,

⁹ na wofii nda no do sanee bɛkaa ndzɛmba yi nyina kyerɛɛ dubiako no, nye nkaa no nyina.

¹⁰ Mary Magdalene nye Joana nye James ne na Mary, nye mbaa nkaa a wɔka hɔn ho no na wɔbɛkaa nsɛm yinom kyerɛɛ asomafo no.

¹¹ Na nsɛm yi yɛɛ hɔn dɛ nsɛnhun, na wɔanngye hɔn enndzi.

¹² Na Peter dze, ɔsoɛree tutuu mbirika kɔr nda no do, na ɔbɔɔ no mu adze no, ohun dɛ ndwera atam no nko gugu hɔ; na ɔsanee kɔr ne fie, na dza esi no yɛɛ no nwanwa.

Dza Osii Emmaus Kwan do

¹³ Na hwɛ, da no ara, hɔn mu beenu sii mu kɔr ekuroba bi a ne dzin dze Emmaus a ofi Jerusalɛm kɔ hɔ bɛyɛ akwansimba eduosia mu.

¹⁴ Nna woridzi nsɛm a aba yi nyina ho nkɔmbɔ.

¹⁵ Na ɔbaa dɛ, woridzi nkɔmbɔ na woribisabisa hɔnho nsɛm no, Jesus nankasa twee bɛɛn hɔn nye hɔn siaan anan kɔree.

¹⁶ Naaso wosuoo hɔn enyiwa mu, ma woennhu ne nyimpa ban.

¹⁷ Na obisaa hɔn dɛ, Ebɛn nsɛm nye yi a hom dze ridzi nkɔmbɔ nam yi? Na wogyinae a hɔn werɛ ahow.

¹⁸ Na hɔn mu baako a ne dzin dze Kleopas see no dɛ, Ana ɔwo nko na eyɛ hɔho wɔ Jerusalɛm, ma innyim dza ɔaba nda yi mu yi?

¹⁹ Na obisaa hɔn dɛ, Ebɛnadze a? Na wɔsee no dɛ, Dza ɔfa Jesus Nazarɛtnyi a ɔyɛ nkɔnhyɛnyi tumfo wɔ ndzeyɛɛ nye kasa mu wɔ Nyankopɔn nye ɔman nyina enyim no ho:

²⁰ mbrɛ asɔfompanyin nye hɛn mpanyimfo no yii no maa dɛ wombu no fɔ nku no, na wɔbɔɔ no mbeamudua mu.

²¹ Na hɛn dze, hɛn enyi daa kwan dɛ nkyɛ ɔno nye nyia ɔrebɛgye Israel. Na iyi nyina ekyir so, wɔyɛɛ ndzɛmba yi ndaansa nye ndɛ.

²² Na mbaa bi so a wofi hɛn mu a wɔkɔr nda no do anapahema abɛma hɛn ho abow hɛn;

²³ wɔbae bɛkaa dɛ woennhu no fun no, mbom woehu abɔfo bi wɔ enyido adzehu mu so a wɔkaa dɛ ɔtse ase.

²⁴ Na hɔn a wɔnye hɛn wɔ hɔ binom kɔr nda no do, na wokohun dɛ mbrɛ mbaa no so kae no ara, naaso ɔno dze, woennhu no.

²⁵ Na ɔnoara see hɔn dɛ, Ao hom a hom adwen mu nndɔ na hom yɛ nyaa wɔ hom akoma mu dɛ hom bɛgye dza nkɔnhyɛfo no kae no nyina edzi!

²⁶ Ana ɔnnsɛ Kraest no dɛ obohu dɛm amandze na ɔakɔ n’enyimnyam mu?

²⁷ Na ɔhyɛɛ ase fi Moses nye nkɔnhyɛfo no nyina do kyerɛɛ hɔn nkyerɛw nyina mu dza ɔfa no ho no ase.

²⁸ Na wɔbɛɛn ekuroba a wɔrokɔ mu no, nna ɔyɛɛ dɛ dza ɔrokɔ n’enyim.

²⁹ Na wɔhyɛɛ no dɛ, Nye hɛn ntsena, na orudu ewimbir, na adze reyɛ asa. Na ɔmanee dɛ ɔnye hɔn bɛtsena.

³⁰ Na ɔbaa dɛ ɔnye hɔn tse edzidzii no, ɔfaa paanoo, na ohyiraa do, na obubui maa hɔn.

³¹ Na hɔn enyiwa buei ma wohun no, na ɔyeew hɔn enyiwa do.

³² Na wɔsesee hɔnho dɛ, Ɔnye hɛn rekasa wɔ kwan mu, na obuee kyerɛwnsɛm no mu kyerɛɛ hɛn no, aso hɛn akoma anndzɛw hɛn mu dɛɛdɛɛw?

³³ Na wɔsoɛɛr dɔn no ara mu sanee baa Jerusalɛm, na wobohun dubiako no nye hɔn a wɔka hɔn ho no dɛ wɔaboa hɔn ano,

³⁴ na wɔreka dɛ, Ewuradze asoɛr ampa, na oeyi noho akyerɛ Simon.

³⁵ Na hɔn so wɔkaa dza ɔbaa kwan no mu, na mbrɛ wohun no wɔ paanoo bu mu no kyerɛɛ hɔn.

Jesus Yi Noho Kyerɛ Esuafo no

³⁶ Na wɔrekasa dɛm no, Jesus nankasa begyinaa hɔn finimfin, na ɔsee hɔn dɛ, Asomdwee nka hom.

³⁷ Na wɔbobɔɔ piriw na hu kaa hɔn, na wosusuu dɛ woehu ɔsaman.

³⁸ Na ɔsee hɔn dɛ, Ɔyɛ dɛn na hom akoma etutu yi? Na ebɛnadze ntsi na adwendwen soɛrsoɛr hom akoma mu yi?

³⁹ Hom nhwɛ me nsa nye me nan dɛ emi mankasa a: hom nka me nhwɛ; na ɔsaman nnyi honam nye mbiew dɛ mbrɛ hom hu dɛ mowɔ yi.

⁴⁰ Na ɔsee dɛm no, ɔdze ne nsa nye ne nan kyerɛɛ hɔn.

⁴¹ Nna wɔda ho nngye nndzi wɔ dɛw ntsi, na ɔyɛ hɔn nwanwa no, ɔsee hɔn dɛ, Ana hom wɔ edziban bi wɔ ha?

⁴² Na wɔmaa no esunam a wɔatoto sin.

⁴³ Na ɔgyee na odzii wɔ hɔn enyim.

⁴⁴ Na ɔsee hɔn dɛ, Iyi nye me nsɛm a meda ho wɔ hom nkyɛn no mekaa kyerɛɛ hom dɛ ɔsɛ dɛ dza wɔakyerɛw no wɔ mo ho wɔ Moses mbra, nye nkɔnhyɛfo, nye ndwom no mu nyina bɛba mu.

⁴⁵ Nna obuee hɔn adwen mu, ama wɔaatse kyerɛwnsɛm no ase;

⁴⁶ na ɔsee hɔn dɛ, Dɛmara na wɔakyerɛw no, dɛ Kraest no bohu amandze na da a otsia ebiasa no ɔasoɛr efi ewufo mu;

⁴⁷ na woedua ne dzin do akɛka nnuho nye bɔnfakyɛ akyerɛ amanaman nyina, wobefitsi ase wɔ Jerusalɛm.

⁴⁸ Hom yɛ yinom ho adasefo.

⁴⁹ Na hwɛ, morosoma m’Egya n’anohoba maba hom do: na hom ntsena kurow no mu nkodu dɛ wobefi sor abrɛ hom ahoɔdzen.

Wɔfa Jesus Kɔ Sor

⁵⁰ Na ɔdze hɔn fiir edzi kodur Bɛtani tsentsendo, na ɔmaa ne nsa do hyiraa hɔn.

⁵¹ Na ɔbaa dɛ, orihyira hɔn no, ɔnye hɔn paapaa mu na wɔfaa no kɔr sor.

⁵² Na hɔn dze, wɔkotowee sɔɔr no, na wɔdze dɛw kɛse sanee baa Jerusalɛm;

⁵³ na wɔtsenaa asɔrfi mu hɔ daa yii Nyankopɔn ayɛw.