Luke 1 - BAEBOR

Nyienyim

¹ Ɔnam dɛ dodowara dze ato hɔn do dɛ wɔbɛkyerɛw ndzɛmba a aba mu wɔ hɛn mu no esiado esiado,

² dɛ mbrɛ hɔn a ahyɛse no wɔdze hɔn enyiwa hunii na wɔyɛɛ asɛm no ho asomfo no dze abrɛ hɛn no ntsi;

³ Onyimnyamfo Kɛse Teofilus, mohwɛ a oye ma mo so dɛ mahwehwɛ ne nyina mu pɛpɛɛpɛ fitsi ahyɛse yi, mekyerɛw no esiado esiado brɛ wo,

⁴ ama eehu nsɛm a wɔakyerɛkyerɛ wo no no mu nokwar.

John Onumanyi no N’awoo ho Nkɔnhyɛ

⁵ Judea ɔhen Herod n’aber do no, nna ɔsɔfo bi wɔ hɔ a wɔfrɛ no Zekaria a ofi Abija no kuw mu; na ne yer nye Aaron ne mbabaa no mu bi a wɔfrɛ no Elizabet.

⁶ Nna hɔn beenu nyina yɛ atseneneefo wɔ Nyankopɔn enyim, na wodzii Ewuradze ne mbransɛm ɔnye n’ahyɛdze no nyina do, dɛ asɛm biara ho nnyi,

⁷ mbom nna wonnyi ba, osiandɛ nna Elizabet yɛ ɔbɔnyin, na afei hɔn beenu nyina so enyinyin papaapa.

⁸ Da bi nna esi n’asɔfokuw do dɛ wɔyɛ edwuma wɔ Nyankopɔn enyim,

⁹ na dɛ mbrɛ asɔfo dwuma no ne nhyehyɛɛ tse no, wɔtwee tonto yii no dɛ ɔnkɔ Ewuradze asɔrdan no mu nkɛhyew eduhuam.

¹⁰ Na ber a ɔrehyew eduhuam no, nna ɔman no nyimpadodow nyina gyina abowano rosɔr.

¹¹ Na Ewuradze no bɔfoe begyinaa eduhuam afɔrmbukyia no nyimfa yii noho kyerɛɛ no.

¹² Na Zekaria hun no no, n’akoma tui, na hu kaa no.

¹³ Na bɔfo no see no dɛ, Mma nnsuro, Zekaria, na wɔatse wo nkotoserɛ, na wo yer Elizabet bɔwo babanyin ama wo, na ato no dzin John.

¹⁴ Na ibenya dɛw nye enyigye, na nyimpa dodowara bedzi n’awoo ho dɛw.

¹⁵ Na ɔbɛyɛ kɛse wɔ Ewuradze enyim, na ɔnnkɔnom wenyin anaaso nsa biara, na Sunsum Krɔnkrɔn bɛhyɛ no ma fi ne na ne yamu mpo.

¹⁶ Na ɔbɛdan Israelmba dodowara aba Ewuradze hɔn Nyankopɔn hɔ.

¹⁷ Na ɔnam Elija no sunsum nye no tum mu bedzi n’enyim akɛdan egyanom hɔn akoma aba hɔn mba ho, nye asoɔdzenfo aba tseneneefo hɔn nyimdzee mu, na oesiesie ɔman a wɔaboaboa hɔnho ama Ewuradze.

¹⁸ Na Zekaria see bɔfo no dɛ, Mubodua dɛn mehu yi? Osiandɛ meyɛ akɔdaa na me yer so edzi mfe pii.

¹⁹ Na bɔfo no buae see no dɛ, Emi nye Gabriel a migyina Nyankopɔn enyim, na wɔasoma me dɛ membɛkasa nkyerɛ wo, na menka wo nsɛmpa yi.

²⁰ Na hwɛ, ebɔtɔ mmum, na irunntum nnkasa dze akɛpem da a yinom bɛyɛ hɔ, osiandɛ anngye me nsɛm a ɔbɛba mu wɔ n’aber do no enndzi.

²¹ Na ɔyɛɛ nkorɔfo a wɔrotweɔn Zekaria no nwanwa dɛ ɔakyɛr dɛm wɔ asɔrdan no mu.

²² Na opuei no, oenntum annkasa annkyerɛ hɔn; na wohun dɛ oekenya enyido adzehu bi wɔ asɔrdan mu hɔ; na ɔnodze, ɔkɔr do araa dze ne nsa yɛɛ nsɛnkyerɛdze osiandɛ nna ɔda ho araa tɔ mmum.

²³ Na ɔbaa dɛ no som nda wiee du no, osii mu kɔr nankasa ne fie.

²⁴ Na nda no ekyir no ne yer Elizabet nyinsenii na osumaa noho abosoom enum see dɛ,

²⁵ Dza Ewuradze ayɛ me, wɔ nda a ɔabɔhwɛ me dɛ obeyi m’enyimguase wɔ nyimpa mu no, nye yi.

Jesus N’awoo ho Nkɔnhyɛ

²⁶ Na bosoom a otsia esia no mu no, Nyankopɔn somaa ɔbɔfo Gabriel wɔ Galilii kurow bi a wɔfrɛ no Nazarɛt,

²⁷ wɔ ɔbaabun bi a wɔdze no ama ɔbanyin bi a wɔfrɛ no Josef a ofi David ebusua mu no awar no hɔ; na ɔbaabun no ne dzin dze Mary.

²⁸ Na ɔbaa no hɔ bɛsee no dɛ, Ei, ɔwo a wɔadom wo kɛse, dzi dɛw! Ewuradze dzi w’ekyir.

²⁹ Na n’akoma tui wɔ kasa no ho, na ɔdwendween ne tsir mu dɛ ebɛn nkyia na iyi bɛyɛ.

³⁰ Na ɔbɔfo no see no dɛ, Mary, mma nnsuro, na enya Nyankopɔn enyim adom.

³¹ Na hwɛ, ibenyinsen, na awo babanyin na ato no dzin JESUS.

³² Ɔno na ɔbɛyɛ kɛse, na wɔbɛfrɛ no nyia ɔwɔ sorsor no ne Ba; na Ewuradze Nyankopɔn dze n’egya David ahengua no bɛma no,

³³ na obedzi Jakob fi do hen daapem, na n’ahendzi nnkɔbɔ adze da.

³⁴ Na Mary see ɔbɔfo no dɛ, Minnyim banyin yi, yinom besi dɛn aba mu?

³⁵ Na bɔfo no buae see no dɛ, Sunsum Krɔnkrɔn bɛba wo do, na nyia ɔwɔ sorsor no n’ahoɔdzen bɛkata wo do; dɛm ntsi so adze krɔnkrɔn a wɔbɔwo no no, wɔbɛfrɛ no Nyankopɔn Ba.

³⁶ Na hwɛ, wo busuanyi Elizabet so enyinsen babanyin wɔ ne mberwaber mu, na nyia wɔfrɛ no ɔbɔnyin no, n’abosoom esia nye yi.

³⁷ Na Nyankopɔn afamu dze, biribiara nnyi hɔ a onntum nnyɛ hɔ.

³⁸ Na Mary see dɛ, Hwɛ, Ewuradze afonabaa nye me: ɔnyɛ hɔ mma me dɛ mbrɛ w’asɛm se. Na bɔfo no fii ne nkyɛn kɔree.

Mary Kɛsera Elizabet

³⁹ Na nda no mu ara Mary soɛɛr ntsɛntsɛm kɔr Juda nkokodo nkurow no bi mu;

⁴⁰ na ɔkɛhɛɛn Zekaria fie kekyiaa Elizabet.

⁴¹ Na ɔbaa dɛ Elizabet tsee Mary ne nkyia no, ɔba no huruuw ne yamu; na Sunsum Krɔnkrɔn hyɛɛ Elizabet ma,

⁴² na ɔdze ndze kɛse kasae see dɛ, Nhyira aka wo wɔ mbasiafo mu, na nhyira aka wo yamu aba.

⁴³ Na iyi fi hen ba mo hɔ, dɛ m’Ewuradze ne na bɛba me nkyɛn?

⁴⁴ Na hwɛ, ntsɛmara a wo nkyia twaa m’asomu no, na abofra no dze dɛw huruhuruwii wɔ mo mu.

⁴⁵ Na nhyira aka nyia ɔagye edzi: na dza Ewuradze ama wɔabɛka akyerɛ no no bɛba mu.

Ayɛyindwom

⁴⁶ Na Mary see dɛ: Me kra tonton Ewuradze,

⁴⁷ Na mo sunsum dzi dɛw wɔ me Nyankopɔn m’Agyenkwa no mu.

⁴⁸ Osiandɛ ɔabɔhwɛ n’afonabaa wɔ ne mbrɛadze asetsena mu: Na hwɛ, ofitsi ndɛ ebusuasantsen nyina bɛfrɛ me osiarfo.

⁴⁹ Osiandɛ Otumfo ayɛ adze kɛse ama me; na Ne dzin nye krɔnkrɔn.

⁵⁰ Na n’ehumbɔbɔr wɔ hɔn a wosuro no do fi ebusuasantsen do kɛpem ebusuasantsen.

⁵¹ Ɔdze ne basa akyerɛ ahoɔdzen, Ɔapansam nkontompɔfo wɔ hɔn akoma adwen mu.

⁵² Oetu etumfo efi hɔn nhengua do, Na ɔama hɔn a wɔbrɛ adze no do.

⁵³ Ɔdze ndzepa amee hɔn a ɔkɔm dze hɔn, na oegya ahonyafo kwan wɔ yafumpan mu.

⁵⁴ Oesuo n’akowaa Israel mu dɛ ɔdze bɛkaa n’ehumbɔbɔr,

⁵⁵ dɛ mbrɛ ɔkaa kyerɛɛ hɛn egyanom no, ama Abraham nye n’asefo daa.

⁵⁶ Na Mary nye Elizabet tsenaa bɛyɛ abosoom ebiasa, na ɔsanee kɔr noara ne fie.

John Onumanyi no N’awoo

⁵⁷ Na Elizabet n’aber a ɔdze bɔwo durii, na ɔwoo babanyin.

⁵⁸ Na no sɔnmufo nye n’ebusuafo tsee ehumbɔbɔr kɛse a Ewuradze dze ehu no, na wɔnye no dzii dɛw.

⁵⁹ Na ɔbaa dɛ ne ndaawɔtwe soe no, wɔbaa dɛ worubotwa abofra no twatsia, na wɔpɛɛ dɛ nkyɛ wɔbɛfrɛ no Zekaria, dɛ mbrɛ n’egya ne dzin tse,

⁶⁰ naaso ne na buae see dɛ, Oho, na wɔbɛfrɛ no John.

⁶¹ Na wɔsee no dɛ, Obiara nnyi w’ebusua mu a ne dzin dze dɛm.

⁶² Na wɔdze nsa bisaa n’egya dɛ mbrɛ ɔpɛ dɛ wɔfrɛ no.

⁶³ Na obisaa kyerɛwpon kyerɛɛw do dɛ, Ne dzin nye John. Na ɔyɛɛ hɔn nyina nwanwa.

⁶⁴ Na n’ano nye ne tɛkyerɛma buee amonmu hɔ ara, na ɔkasae yii Nyankopɔn ayɛw.

⁶⁵ Na hu kaa hɔn a wɔtsetse hɔn nkyɛn nyina, na nsɛm yi nyina wɔkekae wɔ Judea nkokodo nkurow nyina mu.

⁶⁶ Na hɔn a wɔtsee nyina dze too hɔn akoma mu dɛ, Abofra bɛn na oyi bɛyɛ? Osiandɛ Ewuradze ne nsa wɔ no do.

Zekaria no Nkɔnhyɛ

⁶⁷ Na n’egya Zekaria dze, Sunsum Krɔnkrɔn bɛhyɛɛ no ma na ɔhyɛɛ nkɔm dɛ,

⁶⁸ Nhyira nka Ewuradze, Israel Nyankopɔn; Osiandɛ ɔabɔhwɛ no nkorɔfo na ɔapon hɔn,

⁶⁹ Na ɔama nkwagye ambɛn do ama hɛn Wɔ n’akowaa David fie,

⁷⁰ dɛ mbrɛ ɔnam no nkɔnhyɛfo krɔnkrɔn a wɔwɔ hɔ fi tsetse no hɔn ano do kae no,

⁷¹ dɛ wɔngye hɛn mfi hɛn atamfo nye hɔn a wokyir hɛn nyina nsamu;

⁷² Dɛ ɔbɛyɛ ehumbɔbɔr ama hɛn egyanom, na ɔakaa n’ahyɛmu krɔnkrɔn no;

⁷³ ntam a ɔkaa kyerɛɛ hɛn egya Abraham,

⁷⁴ dɛ ɔbɛma woeyi hɛn efi hɛn atamfo nsamu, na yɛasom no dɛ hu nnyi mu,

⁷⁵ wɔ ahotsewee nye tsenenee mu wɔ n’enyim hɛn nkwa nda nyina.

⁷⁶ Na ɔwo abofra yi, wɔbɛfrɛ wo nyia ɔwɔ sorsor no nkɔnhyɛnyi: Osiandɛ ibedzi Ewuradze n’enyim kan ekesiesie n’akwan mu,

⁷⁷ dze nkwagye ho nyimdzee akɛma no nkorɔfo wɔ hɔn bɔnfakyɛ mu a

⁷⁸ ofi hɛn Nyankopɔn n’ayamuhyehye mbɔbɔrhu no mu, a ɔnam do ma adzekyee a ofi sor abɔhwɛ hɛn no,

⁷⁹ dɛ ɔbɛhyerɛn ama hɔn a wɔtsetse sum mu nye owu no sunsuma ase; na wɔatsentsen hɛn anan akɔ asomdwee kwan no do.

⁸⁰ Na abofra no nyinii, na ɔyɛɛ dzen wɔ sunsum mu; na ɔtsenaa sar no do kodur da a ɔdze noho kɛkyerɛɛ Israel.