Levitikɔs 7 - BAEBOR

Asodzi Ho Afɔrbɔ (Nsɔwdo)

¹ Na iyi nye asodzi ho afɔr ho mbra: ɔyɛ krɔnkrɔndze mu adzekrɔnkrɔn.

² Beebi mbrɛ woku ɔhyew afɔr abowa no, hɔ ara so na wonku asodzi ho afɔr abowa no; na ɔmfa no bɔgyaa mpetse afɔrmbukyia no ho nhyia.

³ Na onyi ne seradze nyinara mbra, seradze dua no, nye seradze a ɔkata ayamudze no ho no,

⁴ nye nsɛbɛ ebien no, nye seradze a ɔwɔ ho wɔ sisiw mu no, nye berɛbo do ntentan no, nye nsɛbɛ no, onyi mfi hɔ:

⁵ na ɔsɔfo no nhyew no wɔ afɔrmbukyia do nyɛ ogya afɔr mma EWURADZE: ɔyɛ asodzi ho afɔr.

⁶ Asɔfo ebusuakuw no mu ɔbanyin biara ndzi bi: wondzi no wɔ mbrɛ ɔyɛ krɔnkrɔn: ɔyɛ krɔnkrɔndze mu adzekrɔnkrɔn.

⁷ Dɛ mbrɛ bɔn ho afɔr tse no, dɛmara na asodzi ho afɔr tse: mbra kor na ɔda ho: ɔsɔfo no a ɔdze pata no, na ɔnyɛ nedze.

⁸ Na ɔsɔfo a ɔbɔ nyimpa biara ne hyew afɔr no, ɔhyew afɔr a ɔabɔ no no nwoma no nyɛ ɔsɔfo no dze.

⁹ Na edziban afɔr biara a wɔto wɔ fononoo mu, nye dza wɔyɛ no wɔ kyesɛn mu, nye ɔtosɛn mu nyina, nyɛ ɔsɔfo a ɔdze ba no dze.

¹⁰ Na edziban afɔr biara a wɔdze ngo afrɔw, anaa wesee no, nyɛ Aaron ne mbabanyin nyinara dze, baako nya dɛ mbrɛ baako so nya.

Asomdwee Afɔr

¹¹ Na iyi nye asomdwee afɔr a obi bɔ ma EWURADZE no ho mbra.

¹² Sɛ ɔyɛ no aseda afɔr dze ba a, ɔno, aseda afɔr a ɔdze ba no nyɛ epitsi tatar a wɔdze ngo afrɔw.

¹³ Mbɔrkaw boodoo tatar na ɔmfa nka n’ayɛyɛdze nye n’asomdwee afɔr ho mbra mbɛyɛ aseda.

¹⁴ Na ɔmfa ayɛyɛdze biara mu kor mbrɛ mbɛyɛ ɔmado afɔr mma EWURADZE; ɔsɔfo a ɔdze asomdwee afɔr bɔgyaa petse no na ɔnyɛ nedze.

¹⁵ Na n’aseda asomdwee afɔr no nam no wondzi no wɔ n’ayɛyɛdze da no ara; mma onngya mu bi ma onnkodu adzekyee.

¹⁶ Mbom sɛ n’ayɛyɛdze yɛ anohoba, anaa ayamuyi afɔr a, wondzi no da no ara a ɔbɔ n’afɔr no: na no mu dza ɔka ma adze kye do no wondzi:

¹⁷ na mbom afɔr no ne nam a ɔbɛka ekodu da a otsia ebiasa no, wɔmfa gya nhyew no.

¹⁸ Na sɛ wodzi n’asomdwee afɔr no ne nam biara da a otsia ebiasa no a, wɔremmpen do, nkyii so worummbu mma nyia ɔdze ba no: ɔyɛ ekyiwadze, na ɔkra a obedzi bi no bɔsoa no mbusu.

¹⁹ Na nam a aka biribiara a no ho nntsew no, mma wonndzi; wɔmfa ogya nhyew no. Na nam no dze, obiara a no ho tsew ndzi bi:

²⁰ na ɔkra a odzi asomdwee afɔr a ɔyɛ EWURADZE dze no ne nam bi, na n’efifidze wɔ no ho no, ɔkra no wobotwa no efi ne man mu akyen.

²¹ Na sɛ nyimpa biara ka biribiara a no ho nntsew nyimpa n’efifidze, anaa abowa a no ho nntsew, anaa ekyiwadze biara a no ho nntsew, na odzi asomdwee afɔr a ɔyɛ EWURADZE dze no ne nam bi no, ɔkra no wobotwa no efi ne man mu akyen.

Bɔgya Na Nam Seradze Ho Ekyiwadze

²² Na EWURADZE kasaa kyerɛɛ Moses dɛ,

²³ Kasa kyerɛ Israelmba dɛ, Ɔnantwi, anaa ɔkɔsɔw, anaa apɔnkye seradze no, mma hom nndzi.

²⁴ Na dza noara ewu ne seradze, nye dza abowa atsetsew no ne seradze no, wɔmfa nyɛ edwuma biara: mbom dzi na mma hom nndzi bi.

²⁵ Na obiara a odzi abowa a adasa dze bi bɔ ogya afɔr ma EWURADZE no ne seradze bi no, mekyerɛ ɔkra a odzi no wobotwa no efi ne man mu akyen.

²⁶ Na mma hom nndzi bɔgya biara, anoma anaa aketsebowa dze, wɔ hom tsenabew biara,

²⁷ Obiara a odzi bɔgya biara no, no wobotwa no efi ne man mu akyen.

Asɔfo No Kyɛfa

²⁸ Na EWURADZE kasaa kyerɛɛ Moses dɛ,

²⁹ Kasa kyerɛ Israelmba dɛ, Nyia ɔbɔ n’asomdwee afɔr ma EWURADZE no ɔmfa n’asomdwee afɔr no mu ayɛyɛdze mbrɛ EWURADZE:

³⁰ ɔmfa noara ne nsa mfa EWURADZE gya afɔr no mbra: seradze no nye nyan no na ɔmfa mbra, ama nyan no wɔaatow no ayɛ ɔtow afɔr wɔ EWURADZE enyim.

³¹ Na ɔsɔfo no nhyew seradze no wɔ afɔrmbukyia no do: na nyan no nyɛ Aaron nye ne mbabanyin dze.

³² Na aserɛ nyimfa no hom mfa nyɛ hom asomdwee afɔr mu ɔmado afɔr mma ɔsɔfo no.

³³ Aaron ne mbabanyin mu nyia ɔdze asomdwee afɔr no bɔgyaa, nye seradze ba no, nye aserɛ nyimfa no nyɛ ne kyɛfa.

³⁴ Na ɔtow nyan no nye ɔmado serɛ no mafa wɔ Israelmba hɔn asomdwee afɔr no mu, na medze mama ɔsɔfo Aaron nye ne mbabanyin dɛ daa ahyɛdze a ofi Israelmba hɔ.

³⁵ Iyi nye Aaron no ngosera kyɛfa, nye ne mbabanyin hɔn ngosera kyɛfa a ofi EWURADZE ogya afɔr mu, wɔ da a ɔdze hɔn bae dɛ wombedzi EWURADZE asɔfoe no a.

³⁶ EWURADZE hyɛɛ dɛ wɔmfa mma hɔn wɔ da a ɔseraa hɔn ngo fii Israelmba mu no. Ɔyɛ daa ahyɛdze wɔ hɔn ebusuasantsen mu.

³⁷ Iyi nye mbra a ɔda hɔ ma ɔhyew afɔr, edziban afɔr, nye bɔn ho afɔr, nye asodzi ho afɔr, nye etuhoakyɛ afɔr, nye asomdwee afɔr a

³⁸ EWURADZE hyɛɛ Moses wɔ bepɔw Sinai do, wɔ da a ɔhyɛɛ Israelmba dɛ wɔmfa hɔn ayɛyɛdze mbrɛ EWURADZE, wɔ Sinai sar do no.