Levitikɔs 3 - BAEBOR

Asomdwee Afɔr Ho Nhyehyɛɛ

¹ Na sɛ n’ayɛyɛdze yɛ asomdwee afɔr afɔrbɔdze; sɛ ofi anantwi mu, dɛ onyin o, ɔber o, na ɔdze reba a, dza onndzii dzɛm na ɔmfa no mbra EWURADZE enyim.

² Na ɔmfa ne nsa nto n’ayɛyɛdze no etsifi, na onku no wɔ ehyiadzibuw no n’abowano: na Aaron mbabanyin asɔfo no mfa bɔgya no mpetse afɔrmbukyia no do nhyia.

³ Na onyi asomdwee afɔr no mu bi mbra mbɛyɛ ogya afɔr mma EWURADZE. Onyi seradze a ɔkata ayamudze do no, nye seradze a ɔwɔ do no,

⁴ nye nsɛbɛ ebien no, na seradze a ɔwɔ ho no, dza ɔwɔ sisiw mu, nye berɛbo do ntentan no mfi hɔ.

⁵ Na Aaron mbabanyin no nhyew no wɔ afɔrmbukyia no do ɔhyew afɔr no a ɔwɔ nyena no a ɔwɔ ogya no do no do: ɔyɛ ogya afɔr a oyi nka huanhuam ma EWURADZE.

⁶ Na sɛ n’ayɛyɛdze a ɔdze rebɛyɛ asomdwee afɔr afɔrbɔdze ama EWURADZE no fi nguan mu a; onyin o, ɔber o, dza onndzii dzɛm na ɔmfa no mbra.

⁷ Sɛ ɔdze eguambaa rebɛyɛ n’ayɛyɛdze a, ɔno ɔmfa no mbra EWURADZE enyim:

⁸ na ɔmfa ne nsa nto n’ayɛyɛdze no etsifi, na onku no wɔ ehyiadzibuw no enyim: na Aaron mbabanyin no mfa no bɔgyaa mpetse afɔrmbukyia no do nhyia.

⁹ Na onyi asomdwee afɔr no bi mbra mbɛyɛ EWURADZE ogya afɔr; ne seradze no, nye seradze dua mu no nyinara, ɔntwe no wɔ n’ekyir kratse no ho. Na onyi seradze a ɔkata ayamudze no ho no, nye seradze a ɔwɔ ayamudze no do no nyinara,

¹⁰ nye nsɛbɛ ebien no, nye no do seradze no a ɔwɔ sisiw mu no, nye berɛbo do ntentan no mfi hɔ.

¹¹ Na ɔsɔfo no nhyew no wɔ afɔrmbukyia no do: ɔyɛ ogya afɔr edziban ma EWURADZE.

¹² Na sɛ n’ayɛyɛdze yɛ apɔnkye a, ɔno ɔmfa no mbra EWURADZE enyim:

¹³ na ɔmfa ne nsa nto n’etsifi, na onku no wɔ ehyiadzibuw no enyim; na Aaron ne mbabanyin no mfa no bɔgyaa mpetse afɔrmbukyia no do nhyia.

¹⁴ Na onyi mu bi mbra mbɛyɛ n’ayɛyɛdze, mekyerɛ ogya afɔr mma EWURADZE; seradze a ɔkata ayamudze no ho no, nye seradze a ɔwɔ ayamudze no do no nyinara,

¹⁵ nye nsɛbɛ ebien no, nye no do seradze no a ɔwɔ sisiw mu no, nye berɛbo do ntentan no dze, onyi mfi hɔ.

¹⁶ Na ɔsɔfo no nhyew no wɔ afɔrmbukyia no do: ɔyɛ ogya afɔr edziban a oyi nka huanhuam: seradze no nyinara yɛ EWURADZE dze.

¹⁷ Ɔnyɛ daa ahyɛdze wɔ hom ebusuasantsen mu wɔ hom tsenabea nyinara mu, dɛ hom nndzi seradze anaa bɔgya biara.