Levitikɔs 24 - BAEBOR

Nkandzea No Do Nhwɛe

¹ Na EWURADZE kasaa kyerɛɛ Moses dɛ,

² Hyɛ Israelmba ma wɔmbrɛ wo olive ngo krɔnkrɔn a woesiw a wɔdze sɔ gya, ma wɔmfa nsɔ kandzea nsi do daa.

³ Dase ntwamutam no ekyir, wɔ ehyiadzibuw no mu, na Aaron nsiesie mfi ewimbir nkodu anapa wɔ EWURADZE enyim daa: ɔnyɛ daa ahyɛdze wɔ ebusuasantsen mu.

⁴ Onsiesie nkandzea no wɔ sika mapa kandzeadua a no ho tsew no do wɔ EWURADZE enyim daa.

Kyerɛ Paanoo No

⁵ Na fa isiam pa, na fa bi to tatar duebien; efa ebupɛn du mu ebien nyɛ tatar kor.

⁶ Na hyehyɛ no akyerɛpɛn ebien, esia nyɛ kyerɛpɛn kor, wɔ sika mapa pon a no ho tsew no do wɔ EWURADZE enyim.

⁷ Na fa krɔbɔw gyirengyirenn to kyerɛpɛn kor do, ma ɔnyɛ nkaadze wɔ boodoo no do, mekyerɛ ogya afɔr mma EWURADZE.

⁸ Ahomgyeda biara ɔnhyehyɛ no yie wɔ EWURADZE enyim daa: ɔyɛ Israelmba afamu daa ahyɛmu.

⁹ Na ɔnyɛ Aaron nye ne mbabanyin dze; na wondzi no wɔ mbrɛ ɔyɛ krɔnkrɔn: na ɔyɛ krɔnkrɔndze mu adzekrɔnkrɔn a ofi EWURADZE ogya afɔr do ma no wɔ daa ahyɛdze do.

Mbusu Ho Asotwe

¹⁰ Na Israelnyi ɔbaa bi ne babanyin a n’egya yɛ Egyptnyi, fiir edzi wɔ Israelmba no mu: na Israelnyi ɔbaa no ne babanyin no ɔnye Israelnyi ɔbanyin bi dzii aperper wɔ nseraban no mu;

¹¹ na Israelnyi ɔbaa no ne babanyin no kaa Dzin no ho ebususɛm, na ɔdomee: na wɔdze no brɛɛ Moses. Na ne na ne dzin dze Selomit, Dibri ne babaa a ofi Dan ebusuakuw mu.

¹² Na wɔdze no siei, ama woeenya EWURADZE n’anomu asɛm ma wɔaaka akyerɛ hɔn ana.

¹³ Na EWURADZE kasaa kyerɛɛ Moses dɛ,

¹⁴ Fa nyia wɔadom no fir edzi kɔ nseraban no ekyir; na ma hɔn a wɔtsee no nyinara mfa hɔn nsa ngu n’etsifi, na ma mboanofo no nyinara nsiw no abo.

¹⁵ Na kasa kyerɛ Israelmba dɛ, Obiara a ɔdom ne Nyankopɔn no ɔbɔsoa no bɔn.

¹⁶ Na nyia ɔka EWURADZE ne dzin ho ebususɛm no, oku na wonku no; osiw na mboanofo no nyinara nsiw no abo: ɔhɔho o, okuromnyi o, sɛ ɔka EWURADZE ne dzin ho ebususɛm a, wonku no.

¹⁷ Na nyia ɔbɔ nyimpa biara adze ma ɔtɔr no, oku na wonku no;

¹⁸ na nyia ɔbɔ abowa adze ma owu no ɔnhyɛ ananmu: nkwa nhyɛ nkwa ananmu.

¹⁹ Na sɛ nyimpa ma ne nyɛnko dzi dzɛm a; dɛ mbrɛ ɔno ɔayɛ no, dɛmara na wɔmfa nyɛ no;

²⁰ Obu nhyɛ obu ananmu, enyiwa nhyɛ enyiwa ananmu, ese nhyɛ ese ananmu: dɛ mbrɛ ɔama nyimpa bi edzi dzɛm no, dɛmara na wɔnyɛ mma no.

²¹ Na nyia oku abowa no ɔnhyɛ ananmu: na nyia oku nyimpa no wonku no.

²² Mbra kor ara nda hɔ mma hom, dɛ mbrɛ ɔtse ma ɔhɔho no, ɔnyɛ dɛmara mma okuromnyi no: na emi nye EWURADZE hom Nyankopɔn.

²³ Na Moses kasaa kyerɛɛ Israelmba, na wɔdze nyia ɔdomee no fiir edzi kɔr nseraban no ekyir, na wosiiw no abo. Na Israelmba yɛɛ dɛ mbrɛ EWURADZE hyɛɛ Moses no.