Levitikɔs 23 - BAEBOR

Afahyɛ Ahorow

¹ Na EWURADZE kasaa kyerɛɛ Moses dɛ,

² Kasa kyerɛ Israelmba, na se hɔn dɛ, EWURADZE n’afahyɛ a wɔahyehyɛ a, hom mpaa mu dɛ ɔyɛ nhyiamu krɔnkrɔn no, mekyerɛ iyinom nye m’afahyɛ a mahyehyɛ.

³ Nda esia na wɔnyɛ edwuma: na da a otsia esuon no yɛ ahomgye mu ahomgyeda, nhyiamu krɔnkrɔn a; mma hom nnyɛ edwuma biara: ɔyɛ ahomgyeda ma EWURADZE wɔ hom tsenabew nyina.

⁴ Iyinom nye EWURADZE n’afahyɛ a wɔahyehyɛ, mekyerɛ nhyiamu krɔnkrɔn a hom mpaa wɔ ne mber a wɔahyɛ mu no.

⁵ Bosoom a odzi kan no ne da a otsia duanan no n’ewimbir no yɛ EWURADZE apaho.

⁶ Na bosoom no ara mu da a otsia duenum no yɛ EWURADZE epitsi afahyɛ: nda esuon na hom ndzi epitsi.

⁷ Da a odzi kan no nyɛ nhyiamu krɔnkrɔn: mma hom nnyɛ edwumadzen biara.

⁸ Mbom hom mbɔ ogya afɔr mma EWURADZE nda esuon: da a otsia esuon no yɛ nhyiamu krɔnkrɔn; mma hom nnyɛ edwumadzen biara.

⁹ Na EWURADZE kasaa kyerɛɛ Moses dɛ,

¹⁰ Kasa kyerɛ Israelmba, na se hɔn dɛ, Sɛ hom du asaase a medze rema hom no do, na wotwa no do ndɔbaa a, ɔno hom mfa hom ndɔbaa mu nduadzewakan no ifi mbrɛ ɔsɔfo no:

¹¹ na ɔntow ifi no wɔ EWURADZE enyim, ma ɔnsɔ enyi mma hom: ahomgyeda no n’adzekyee na ɔsɔfo no ntow.

¹² Na da a hom tow ifi no, hom mfa eguambaanyin a onndzii dzɛm a oedzi afrenhyia mbɔ ɔhyew afɔr mma EWURADZE.

¹³ Na no ho edziban afɔr nyɛ isiam pa efa ebupɛn du mu ebien a wɔdze ngo afrɔw, ogya afɔr a oyi nka huanhuam ma EWURADZE: na no ho nom afɔr nyɛ wenyin, hin ebupɛn anan mu kor.

¹⁴ Na mma hom nndzi boodoo, anaa eburow totoe, anaa nomanoma, kɛpem dɛ hom dze hom Nyankopɔn ayɛyɛdze no bɛba ana: ɔyɛ daa ahyɛdze wɔ hom ebusuasantsen mu wɔ hom tsenabew nyinara mu.

¹⁵ Na hom mfitsi ahomgyeda no n’adzekyee nkan nda, mfa mfi da a hom dze ɔtow afɔr ifi baa no do; ma ahomgyeda esuon nwie du:

¹⁶ hom nkan adaduenum ma onkesi ahomgyeda a otsia esuon no n’adzekyee; na hom mfa edziban afɔr fofor mbrɛ EWURADZE.

¹⁷ Hom mfa efa (efah) ebupɛn du mu ebien nyɛ ntɔwntɔwmu mfi hom tsenabew mbra: ɔnyɛ isiam pa, wɔmfa mbɔrkaw nto, ma ɔnyɛ nduadzewakan mma EWURADZE.

¹⁸ Na hom mfa nguambaa esuon a wonndzii dzɛm a woedzi afrenhyia afrenhyia, nye ɔnantwisaa eburwa kor, nye nguannyin ebien nka boodoo no ho mbra: wɔnyɛ ɔhyew afɔr mma EWURADZE, mfa nka hɔn edziban afɔr, nye hɔn ɔnom afɔr ho, mekyerɛ ogya afɔr a oyi nka huanhuam ma EWURADZE.

¹⁹ Na hom mfa apɔnkyenyin kor mbɔ ho afɔr, nye nguambaanyin ebien a woedzi afrenhyia afrenhyia mbɔ asomdwee afɔr.

²⁰ Na ɔsɔfo no ntow hɔn nye nduadzewakan boodoo no nyɛ ɔtow afɔr wɔ EWURADZE enyim, nka nguambaa ebien no ho: ɔnyɛ krɔnkrɔn mma EWURADZE mfa mma ɔsɔfo no.

²¹ Na hom mbɔ dawur da no ara; ɔnyɛ nhyiamu krɔnkrɔn mma hom: mma hom nnyɛ edwumadzen biara: ɔyɛ daa ahyɛdze wɔ hom tsenabew nyinara mu wɔ hom ebusuasantsen mu.

²² Na sɛ hom twa hom asaase do ndɔbaa a, mma nntwa hanoa dze no korakora, nkyii so mma nndzi wo ndɔbaa no mpɛpɛw: gya no hɔ fa ma ohianyi, nye ɔhɔho: emi nye EWURADZE hom Nyankopɔn.

²³ Na EWURADZE kasaa kyerɛɛ Moses dɛ,

²⁴ Kasa kyerɛ Israelmba dɛ, Bosoom a otsia esuon no ne da a odzi kan no, nyɛ ahomgye pa mma hom; wɔnhɛn totorobɛnto nyɛ nkaa, nhyiamu krɔnkrɔn.

²⁵ Mma hom nnyɛ edwumadzen biara: na hom mbɔ ogya afɔr, mma EWURADZE.

²⁶ Na EWURADZE kasaa kyerɛɛ Moses dɛ,

²⁷ Naaso bosoom a otsia esuon yi ara ne da a otsia du no nye mpata da: ɔnyɛ nhyiamu krɔnkrɔn mma hom, na hom mbrɛ homho adze; na hom mbɔ ogya afɔr mma EWURADZE.

²⁸ Na mma hom nnyɛ edwuma biara wɔ no ara mu: na ɔyɛ mpata da, ma wɔaapata ama hom wɔ EWURADZE hom Nyankopɔn enyim.

²⁹ Na obiara a ɔnnkɛbrɛ noho adze da no ara mu no, wobotwa no efi ne man mu akyen.

³⁰ Na obiara a ɔyɛ edwuma biara wɔ dɛm da no ara mu no, wɔbɛsɛɛ no efi ne man mu.

³¹ Mma hom nnyɛ edwuma biara: ɔyɛ daa ahyɛdze wɔ hom ebusuasantsen mu wɔ hom tsenabew nyinara.

³² Ɔnyɛ ahomgye pa mu ahomgyeda mma hom, na hom mbrɛ hom akra adze: bosoom no ne da a otsia akron no n’ewimbir, ofi ewimbir kodu ewimbir, na hom ndzi hom ahomgyeda no.

³³ Na EWURADZE kasaa kyerɛɛ Moses dɛ,

³⁴ Kasa kyerɛ Israelmba dɛ, Bosoom a otsia esuon no yi ara ne da a otsia duenum no ɔyɛ ntamadan afahyɛ nda esuon ma EWURADZE.

³⁵ Da a odzi kan no yɛ nhyiamu krɔnkrɔn: mma hom nnyɛ edwumadzen biara.

³⁶ Nda esuon na hom mbɔ ogya afɔr mma EWURADZE: da a otsia awɔtwe no nyɛ nhyiamu krɔnkrɔn mma hom; na hom mbɔ ogya afɔr mma EWURADZE: ɔyɛ nguabɔ ewiei; mma hom nnyɛ edwumadzen biara.

³⁷ Iyinom nye EWURADZE n’afahyɛ a wɔahyehyɛ a hom mpaa mu dɛ ɔyɛ nhyiamu krɔnkrɔn no, ma wɔmfa ogya afɔr mbrɛ EWURADZE, ɔhyew afɔr, nye edziban afɔr, okum afɔr, nye ɔnom afɔr, kor wɔ nankasa ne da mu:

³⁸ ɔsor EWURADZE n’ahomgyeda no, na ɔsor hom ayɛyɛdze, na ɔsor hom anohoba, na ɔsor hom ayamuyi afɔr nyinara a hom dze ma EWURADZE no.

³⁹ Naaso bosoom a otsia esuon no ne da a otsia duenum no mu, sɛ hom roboaboa asaase no do nduadzewa ano a, hom nhyɛ EWURADZE fa no nda esuon: da a odzi kan no nyɛ ahomgye pa, na da a otsia awɔtwe no nyɛ ahomgye pa.

⁴⁰ Na da a odzi kan no hom mfa ndua fɛɛfɛw do nduadzewa, nye menankɔnson, nye ndua wusuww n’abaw, nye esukɔn do ndua; na hom enyi ngye wɔ EWURADZE hom Nyankopɔn enyim nda esuon.

⁴¹ Na hom nhyɛ no fa mma EWURADZE nda esuon wɔ afrenhyia mu: ɔyɛ daa ahyɛdze wɔ hom ebusuasantsen mu: bosoom a otsia esuon no mu na hom nhyɛ.

⁴² Hom ntsenatsena asese mu nda esuon; hɔn a wɔyɛ amamba wɔ Israel nyinara ntsenatsena asese mu:

⁴³ ama hom ebusuasantsen eehu dɛ emi na memaa Israelmba tsenatsenaa asese mu wɔ aber a miyii hɔn fii Egypt asaase do no: emi nye EWURADZE hom Nyankopɔn.

⁴⁴ Na Moses kaa EWURADZE n’afahyɛ a wɔahyehyɛ no kyerɛɛ Israelmba.