Levitikɔs 21 - BAEBOR

Dza Wɔahyehyɛ Ama Asɔfo

¹ Na EWURADZE see Moses dɛ, Kasa kyerɛ Aaron ne mbabanyin asɔfo no, na se hɔn dɛ, Mma hɔn mu biara nngu noho fi wɔ fun ho wɔ ne man mu;

² gyedɛ no bɔgyaa a ɔbɛn no, ne na, nye n’egya, nye ne babanyin, nye ne babaa, nye no nua;

³ nye n’akyerɛbaa a ɔyɛ ɔbaabun a ɔbɛn no a onnyae nnyaa okun no, ɔno ho na ɔmma noho nngu fi.

⁴ Mma onngu noho fi wɔ ne nyimpa tsitsir a ɔyɛ wɔ no nkorɔfo mu ntsi, dɛ obohura noho.

⁵ Mma wɔnnyɛ hɔn etsifi etsipaa, nkyii so mma wonnyi hɔn abɔdwesa ano, na wɔmmbobɔ hɔn honam mu akam so.

⁶ Wɔnyɛ krɔnkrɔn mma hɔn Nyankopɔn, na mma wonnhura hɔn Nyankopɔn ne dzin ho: na EWURADZE gya afɔr no, hɔn Nyankopɔn edziban no, hɔn na wɔdze ba: dɛm ntsi wɔnyɛ krɔnkrɔn.

⁷ Mma wɔmmfa ɔbaa a ɔyɛ ohuhunyi, anaa no ho egu fi nnwar no; nkyii so mma wɔmmfa ɔbaa a no kun ako no no nnwar no: na ɔyɛ krɔnkrɔn ma ne Nyankopɔn.

⁸ Dɛm ntsi tsew no ho; na ɔno na ɔdze wo Nyankopɔn edziban ba: ɔnyɛ krɔnkrɔn mma wo: na emi EWURADZE a metsew hom ho no, meyɛ krɔnkrɔn.

⁹ Na sɛ ɔsɔfo biara ne babaa, dze ehuhubra gu noho fi a, oegu n’egya no ho fi: wɔmfa gya nhyew no.

¹⁰ Na nyia ɔyɛ no nuanom mu ɔsɔfopanyin a woehue ɔserango egu n’etsifi, na woetu no esi nkyɛn dɛ ɔnhyɛ ntar no, mma ɔmmbɔ ne tsinhwi mpɛsɛw, na onnsunsuan ne ntar mu;

¹¹ nkyii so ɔnnkɔ fun biara ho, na onngu noho fi mma n’egya, anaa ne na;

¹² nkyii so ommfi ahotseweebea no do, na onnhura ne Nyankopɔn ahotseweebea ho; na ne Nyankopɔn ɔserango abɔtsir no wɔ n’etsifi: emi nye EWURADZE.

¹³ Na ɔnodze ɔbaabun na ɔmfa no nwar no.

¹⁴ Okunafo, anaa obi a wɔako no, anaa ɔbaa a no ho egu fi, anaa ohuhunyi, iyinom dze mma ɔnnwar hɔn mu biara: mbom nankasa ne man mu ɔbaabun na ɔmfa no nwar no.

¹⁵ Na mma onnhura n’asefo ho wɔ ne man mu: na emi nye EWURADZE a metsew no ho.

¹⁶ Na EWURADZE kasaa kyerɛɛ Moses dɛ,

¹⁷ Kasa kyerɛ Aaron dɛ, Obiara a ofi w’asefo mu wɔ w’ebusuasantsen nyinara mu a odzi dzɛm no mma ɔmmbɛn mmbɛfa ne Nyankopɔn edziban mmba.

¹⁸ Na nyimpa biara a odzi dzɛm no, mma ɔmmbɛn: ofurafo o, apakye o, ahwensin o, nyia no honam ho adze bi bor do o,

¹⁹ anansin o, abasin o,

²⁰ efu o, akɔtsia o, onyitɔr o, ntwentwemfo o, konkondedenyi o, nyia no ntɔhwɛbo abɔ o;

²¹ ɔsɔfo Aaron n’asefo mu nyimpa biara a odzi dzɛm no mma ɔnntwe mmbɛn mmbɛfa EWURADZE ogya afɔr no mmba: odzi dzɛm; eso mma ɔnntwe mmbɛn mmbɛfa ne Nyankopɔn edziban no mmba.

²² Mbom ondzi ne Nyankopɔn edziban no, krɔnkrɔndze mu adzekrɔnkrɔn no, na krɔnkrɔndze no nyinara bi.

²³ Ntwamutam no mu nkotoo na mma ɔnnkɔ, na ɔmma ɔnntwe mmbɛn afɔrmbukyia no so, osiandɛ odzi dzɛm; amma oeenngu me mbeambea krɔnkrɔn no ho fi: na emi nye EWURADZE a metsew hɔn ho no.

²⁴ Nna Moses kasaa kyerɛɛ Aaron, nye ne mbabanyin no, nye Israelmba nyinara.