Levitikɔs 20 - BAEBOR

Asoɔdzen Ho Asotwe

¹ Na EWURADZE kasaa kyerɛɛ Moses dɛ,

² Afei so se Israelmba dɛ, Obiara a ofi Israelmba mu, anaa ofi ahɔho a wɔabɔsoɛ Israel mu a ɔdze n’asefo mu bi ma Molek no; okum na wonku no: asaase no do nkorɔfo no mfa abo nsiw no.

³ Mo so mebɛma m’enyi asa nyimpa no, na metwa no efi ne man mu akyen; osiandɛ ɔdze n’asefo mu bi ama Molek, dze egu m’ahotseweebea ho fi, na oehura me dzin krɔnkrɔn no ho.

⁴ Na sɛ ɔdze n’asefo mu bi rema Molek no, na asaase no do nkorɔfo nam kwan biara do kata hɔn enyiwa fi nyimpa no do, na woennku no a:

⁵ ɔno mebɛma m’enyi asa nyimpa no, na asa n’ebusuafo, na mubotwa no, ɔno nye hɔn a wodzi n’ekyir ndwamanyɛ mu, dɛ wɔnye Molek bɛyɛ ndwamandze no, efi hɔn man mu egu.

⁶ Na obiara a ɔdan no ho kɔ hɔn a wɔyɛ adzebisafo, na esumamfo hɔ kedzi hɔn ekyir ndwamanyɛ mu no, mebɛma m’enyi asa dɛm nyimpa no, na metwa no efi ne man mu akyen.

⁷ Dɛm ntsi hom ntsew homho, na hom nyɛ krɔnkrɔn: na emi nye EWURADZE hom Nyankopɔn.

⁸ Na hom ndzi m’ahyɛdze do, na wɔnyɛ: emi nye EWURADZE a metsew hom ho no.

⁹ Na obiara a ɔdom n’egya anaa ne na no, oku na wonku no: osiandɛ ɔadom n’egya anaa ne na; no bɔgyaa ngu n’etsifi.

¹⁰ Na ɔbanyin a ɔfa ɔbanyin bi so ne yer no, mekyerɛ nyia ɔfa ne nyɛnko ne yer no, oku na wonku ɔyefafo nye okumfafo no.

¹¹ Na ɔbanyin a ɔnye n’egya ne yer da no, oeyi n’egya n’adagyaw do, oku na wonku hɔn beenu nyina; hɔn bɔgyaa ngu hɔn etsifi.

¹² Na sɛ ɔbanyin nye n’asew a ɔyɛ ne ba ne yer da a, oku na wonku hɔn beenu nyina: wɔayɛ sakasaka; hɔn bɔgyaa ngu hɔn etsifi.

¹³ Na sɛ banyin nye banyin bi da, dɛ mbrɛ ɔnye ɔbaa da a, hɔn beenu nyina ayɛ ekyiwadze: oku na wonku hɔn; hɔn bɔgyaa ngu hɔn etsifi.

¹⁴ Na sɛ banyin bi fa yer nye ne na nyinara a, ɔyɛ ebusudze: wɔmfa gya nhyew hɔn, ɔno nye hɔn nyinara; amma ebusudze aammba hom mu.

¹⁵ Na sɛ ɔbanyin nye abowa bi da a, oku na wonku no: na hom nku abowa no.

¹⁶ Na sɛ ɔbaa bi kɔ abowa biara hɔ, na ɔkɛda hɔ ma no a, ku ɔbaa no, nye abowa no: oku na wonku hɔn; hɔn bɔgyaa ngu hɔn etsifi.

¹⁷ Na sɛ banyin fa n’akyerɛbaa, n’egya ne babaa, anaa ne na ne babaa, na ohu n’adagyaw, na no so hu n’adagyaw a, ɔyɛ enyimguase adze; na wontwitwa hɔn ngu wɔ hɔn man mba enyim: oeyi n’akyerɛbaa n’adagyaw do; ɔnsoa no mbusu.

¹⁸ Na sɛ ɔbanyin bi nye ɔbaa ɔbrafo bi da, na oyi n’adagyaw do a; na oebue no bura ano, na ɔno so oeyi no bɔgyaa bura do; wontwitwa hɔn beenu nyina mfi hɔn man mu ngu.

¹⁹ Na mma nnyi wo na n’akyerɛbaa anaa w’egya n’akyerɛbaa n’adagyaw do: ɔno so oeyi no bɔgyaa a ɔbɛn n’adagyaw do: wɔnsoa hɔn mbusu.

²⁰ Na sɛ ɔbanyin bi nye no wɔfa ne yer da a, oeyi no wɔfa n’adagyaw do: wɔnsoa hɔn bɔn; wɔronnwo ba na woewu.

²¹ Na sɛ ɔbanyin bi fa no nua ne yer a, ɔyɛ adze fi: oeyi no nua n’adagyaw do; worinnya ba.

²² Dɛm ntsi hom ndzi m’ahyɛdze nyinara, nye me ntsɛmbu nyinara do, na wɔnyɛ: amma asaase no a medze hom rokɔ hɔ akɛtsena do no aammfe hom enngu.

²³ Na mma hom mmfa ɔman a murubotu hɔn wɔ hom enyim no hɔn amambra do: na wɔyɛɛ ndzɛmba iyinom nyinara, na dɛm ntsi hɔn ho yɛɛ me mfon.

²⁴ Na mese hom dɛ, Hom na wonnya hɔn asaase no ndzi, na medze mema hom dɛ hom enyadze, asaase a numfonsu nye wo pem wɔ do: emi nye EWURADZE hom Nyankopɔn a mapaa hom efi amanaman mu no.

²⁵ Dɛm ntsi hom mpaa mbowa a hɔn ho tsew nye dza hɔn ho nntsew mu, nye nnoma a hɔn ho nntsew nye dza hɔn ho tsew mu: na mma hom mmfa abowa, anaa anoma, anaa adze biara a ɔwea famu a mapaa no wɔ hom ho dɛ no ho nntsew no nngu hom akra ho fi.

²⁶ Na hom nyɛ krɔnkrɔn mma me: na emi EWURADZE meyɛ krɔnkrɔn, na mapaa hom efi amanaman mu dɛ hom mbɛyɛ medze.

²⁷ Ɔbanyin bi so anaa ɔbaa bi a ɔyɛ adzebisafo, anaa ɔyɛ esumamfo no, oku na wonku no: wɔmfa abo nsiw hɔn: hɔn bɔgyaa ngu hɔn etsifi.