Levitikɔs 19 - BAEBOR

Krɔnkrɔnyɛ

¹ Na EWURADZE kasaa kyerɛɛ Moses dɛ,

² Kasa kyerɛ Israelmba mboanofo no nyinara, na se hɔn dɛ, Hom nyɛ krɔnkrɔn: na emi EWURADZE hom Nyankopɔn meyɛ krɔnkrɔn.

³ Hom mu nyimpa biara nsuro ne na, nye n’egya, na hom ndzi m’ahomgyenda do: emi nye EWURADZE hom Nyankopɔn.

⁴ Mma hom nndan nnkɔ abosom hɔ, nkyii so mma hom nnyɛ ehonyi a woegu no dɛ nyame mma hom ho: emi nye EWURADZE hom Nyankopɔn.

⁵ Na sɛ hom dze asomdwee afɔr afɔrbɔdze rebrɛ EWURADZE a, hom mfa mbra ma ɔnsɔ enyi mma hom.

⁶ Wondzi no da no ara a hom dze ba no, nye n’adzekyee no: na sɛ bi ka ma okodu da a otsia ebiasa no a, wɔmfa gya nhyew no.

⁷ Na sɛ wodzi no da a otsia ebiasa no a, ɔyɛ ekyiwadze; ɔnnsɔ enyi:

⁸ obiara a odzi no, ɔbɔsoa no mbusu, osiandɛ oegu EWURADZE n’adzekrɔnkrɔn ho fi: na ɔkra no wobotwa no efi ne man mu akyen.

⁹ Na sɛ hom twa hom asaase do ndɔbaa a, mma nntwa wo hanoa dze no korakora, nkyii so mma nndzi wo ndɔbaa ne mpɛpɛw no.

¹⁰ Na mma nndzi wo wenyin ture mu mpɛpɛw, nkyii so mma nntase wo wenyin ture mu aba a atotɔ famu; gya no hɔ fa ma ohianyi, nye ɔhɔho: emi nye EWURADZE hom Nyankopɔn.

¹¹ Mma hom nnwia adze, nkyii so mma hom nndzi nkɔnkɔnsa, na obi nntwa ne nyɛnko nkontompɔ.

¹² Na mma hom nnka me dzin ho ntam akɔhwi mu, amma eennhura wo Nyankopɔn ne dzin ho: emi nye EWURADZE.

¹³ Mma nndzi wo nyɛnko emim, na mmbu no: mma mma ɔpaanyi n’akatua nnko wo hɔ anadwe nyinara ma adze nnkye.

¹⁴ Mma nndom otsitsifo, na mmfa fintsidua nnto ofurafo enyim, mbom suro wo Nyankopɔn: emi nye EWURADZE.

¹⁵ Mma hom nnyɛ atsɛmbu mu dza ɔnntsen: mma nnhwɛ ohianyi enyim, anaa nnsuro otumfo enyim: mbom tsenenee mu na bu wo nyɛnko atsɛn.

¹⁶ Mma nnkyin sor nye ase dɛ afakɔafabanyi wɔ wo nkorɔfo mu: nkyii so mma nnsoɛr nntsia wo nyɛnko no bɔgyaa: emi nye EWURADZE.

¹⁷ Mma nntan wo nua wɔ w’akoma mu: ɔka na ka wo nyɛnko enyim, na mma nnsoa bɔn wɔ ɔno ntsi.

¹⁸ Mma nndzi wer, na mma nnya menasepɔw biara wɔ wo nkorɔfo mba ho, mbom dɔ wo nyɛnko dɛ woho: emi nye EWURADZE.

¹⁹ Hom ndzi m’ahyɛdze do. Mma mma wo fiembowa nndzi aforafora mmfofow hɔnho: mma mmfa aba horow ebien mmfora mu nndua wo haban mu: nkyii so mma atar a wɔdze atam horow ebien aforafora apam nnka woho.

²⁰ Na obiara a ɔnye ɔbaa bi da dze no ho nsu ma no, na sɛ ɔyɛ afonabaa a wɔdze no ama okun bi awar, na pon na wonnyae mmpoon no, nkyii so wɔmmaa no fahodzi a; wɔntsea hɔn; mma wonnku hɔn, osiandɛ ɔnndze noho.

²¹ Na ɔmfa n’asodzi ho afɔr mbra EWURADZE, wɔ ehyiadzibuw no n’abowano, mekyerɛ oguannyin na ɔmfa nyɛ asodzi ho afɔr no.

²² Na ɔsɔfo no mfa asodzi ho afɔr oguannyin no mpata mma no wɔ EWURADZE enyim wɔ no bɔn a ɔayɛ no ntsi: na wɔdze no bɔn a ɔayɛ no bɛkyɛ no.

²³ Na sɛ hom du asaase no do, na wɔtsetsɛw ndua horow biara a wodzi a, ɔno hom mbu n’aba dɛ monomonomyɛdze: mfe ebiasa na ɔnyɛ dɛ monomonomyɛdze mma hom; mma wonndzi.

²⁴ Mbom afe a otsia anan no n’aba nyinara nyɛ krɔnkrɔn, mfa mma EWURADZE ayɛyi.

²⁵ Na afe a otsia enum no hom ndzi n’aba bi, ama wɔaama hom no ndɔbaa: emi nye EWURADZE hom Nyankopɔn.

²⁶ Mma hom nndzi adze biara nye no bɔgya no: nkyii so mma hom nnkyer nkaber, na wɔnnyɛ akɔmfodze.

²⁷ Mma hom mmpompon hom tsinhwi ano, nkyii so mma nnsɛɛ w’abɔdwesa ano.

²⁸ Mma hom mmbobɔ hom honam ho akam biara mma ewufo, na hom nnkyerɛkyerɛw hom ho nkyerɛkyerɛwee biara so: emi nye EWURADZE.

²⁹ Mma nngu wo babaa ho fi nnyɛ no edwaman; bɛyɛ na asaase no adan ndwamanyɛ, na mbusu abɛyɛ asaase no do ma.

³⁰ Hom ndzi m’ahomgyeda no, na hom ndzi m’ahotseweebea no nyi: emi nye EWURADZE.

³¹ Mma hom nndan nnkɔ hɔn a wɔyɛ adzebisafo, nye esumamfo so hɔ: mma wɔnnhwehwɛ hɔn ekyir kwan mmfa hɔn nngu homho fi: emi nye EWURADZE hom Nyankopɔn.

³² Fa enyidzi ma tsigon no, nyew, na dzi akɔdaa nyi, na suro wo Nyankopɔn: emi nye EWURADZE.

³³ Na sɛ ɔhɔho bi bɔsoɛ hom asaase do a, mma hom nnyɛ no bɔn.

³⁴ Ɔhɔho a ɔabɔsoɛ hom no wɔmma ɔnyɛ dɛ hom mu kuromnyi bi, na dɔ no dɛ woho; osiandɛ hom yɛɛ ahɔho wɔ Egypt asaase do: emi nye EWURADZE hom Nyankopɔn.

³⁵ Mma hom mmbu atsɛnkyew wɔ adzesusu mu, adzeker mu, anaa adzehyɛ mu.

³⁶ Nsɛn tsenn, abrambo tsenn, efa tsenn, nye hin tsenn, na hom mmfa nsusu: emi nye EWURADZE hom Nyankopɔn a miyii hom fii Egypt asaase do no.

³⁷ Na hom nhyɛ m’ahyɛdze nyinara, nye me ntsɛmbu nyinara nsew, na wondzi do: emi nye EWURADZE.