Levitikɔs 15 - BAEBOR

Banyin A Ɔwɔ Ahosen

¹ Na EWURADZE kasaa kyerɛɛ Moses nye Aaron, dɛ,

² Hom nkasa nkyerɛ Israelmba, na wɔnse hɔn dɛ, Sɔ ɔbanyin biara nya ahosen ma fie no honam mu gu a, n’ahosen no ntsi no ho nntsew.

³ Na iyi nye n’ahoɔfi wɔ n’ahosen no mu: sɛ n’ahosen no fi no honam, anaa n’ahosen ma no honam n’ano siw a, ɔyɛ n’ahoɔfi.

⁴ Mpa biara a nyia ɔwɔ ahosen no da do no, no ho nntsew: na adze biara a ɔko do no no ho nntsew.

⁵ Na obiara a ɔka ne mpa no, nhor ne ntar, na onguar noho wɔ nsu mu, osiandɛ no ho nntsew araa kodu ewimbir.

⁶ Na nyia ɔko adze biara a nyia ɔwɔ ahosen no atsena do no, nhor ne ntar, na onguar noho wɔ nsu mu, osiandɛ no ho nntsew araa kodu ewimbir.

⁷ Na nyia ɔka nyia ɔwɔ ahosen no no honam no, nhor ne ntar, na onguar noho wɔ nsu mu, na no ho nntsew araa kodu ewimbir.

⁸ Na sɛ nyia ɔwɔ ahosen to ntafi gu nyia no ho tsew do a; ɔno ɔnhor ne ntar, na onguar noho wɔ nsu mu, osiandɛ no ho nntsew araa kodu ewimbir.

⁹ Na apɔnkɔgua biara a nyia ɔwɔ ahosen no bɛtsena do no, no ho nntsew.

¹⁰ Na obiara a ɔka adze biara a ɔhyɛ n’ase no, no ho nntsew araa kodu ewimbir: na nyia ɔsoa dɛm ndzɛmba no nhor ne ntar, na onguar noho wɔ nsu mu, na no ho nntsew araa kodu ewimbir.

¹¹ Obiara a nyia ɔwɔ ahosen annhohor ne nsa ho wɔ nsu mu na ɔdze bɛka no no, ɔnhor ne ntar, na onguar noho wɔ nsu mu, osiandɛ no ho nntsew araa kodu ewimbir.

¹² Na dɛtsesɛn a nyia ɔwɔ ahosen no bɛka no, wɔmbɔ no: na dua adze biara dze wɔnhor no wɔ nsu mu.

¹³ Na sɛ nyia ɔwɔ ahosen no wɔtsew no ho fi n’ahosen no mu a, ɔno ɔnkan nda esuon wɔ n’ahofir ntsi, na ɔnhor ne ntar, na onguar no honam wɔ mbasu mu, ama no ho aatsew.

¹⁴ Na da a otsia awɔtwe no ɔno noara mfa ntamram ebien, nye mborɔnomamba ebien, na ɔmfa mbra EWURADZE enyim wɔ ehyiadzibuw no n’abowano, na ɔmfa mma ɔsɔfo;

¹⁵ na ɔsɔfo no mfa mbɔ afɔr, kor nyɛ bɔn ho afɔr, na kor so nyɛ ɔhyew afɔr; na ɔsɔfo no mpata mma no wɔ EWURADZE enyim wɔ n’ahosen no ntsi.

¹⁶ Na sɛ ɔbanyin bi n’ahoba fi no mu fir a, ɔno onguar no honam nyinara wɔ nsu mu, osiandɛ no ho nntsew araa kodu ewimbir.

¹⁷ Na atar biara, nye nwoma biara a ahoba bogu mu no, wɔmfa nsu nhor, osiandɛ no ho nntsew araa kodu ewimbir.

¹⁸ Ɔbaa so a ɔbanyin dze ahoba nye no da no, hɔn beenu nyinara nguar hɔnho wɔ nsu mu, osiandɛ hɔn ho nntsew araa kodu ewimbir.

Ɔbaa A Ɔwɔ Ahosen

¹⁹ Na sɛ ɔbaa nya ahosen, na ahosen yɛ bɔgya fi no honam mu gu a, ɔntsena n’asabu mu nda esuon: na obiara a ɔka no no, no ho nntsew araa kodu ewimbir.

²⁰ Na adze biara a ɔda do wɔ n’asabu mu no, no ho nntsew, na adze biara so a ɔtsena do no, no ho nntsew.

²¹ Na obiara a ɔka ne mpa no, nhor ne ntar, na onguar noho wɔ nsu mu, osiandɛ no ho nntsew araa kodu ewimbir.

²² Na obiara a ɔka adze biara a ɔtsena do no, nhor ne ntar, na onguar noho wɔ nsu mu, osiandɛ no ho nntsew araa kodu ewimbir.

²³ Na sɛ ɔwɔ mpa no do, anaa adze biara a ɔtsena do no do, na sɛ ɔka a, no ho nntsew araa kodu ewimbir.

²⁴ Na sɛ ɔbanyin bi nye no da, na n’asabu adze no bi ka no ho a, no ho nntsew araa nda esuon; na mpa biara a ɔda do no so ho nntsew.

²⁵ Na sɛ ɔbaa nya bɔgya ahosen nda pii a ɔnnyɛ n’asabu aber mu, anaa onya ahosen ma ɔtra n’asabu aber a; n’ahoɔfi ahosen nda no nyinara ɔnyɛ dɛ mbrɛ n’asabu nda no mu tse: no ho nntsew.

²⁶ Mpa biara a ɔda do wɔ n’ahosen nda nyinara mu no; ɔnyɛ no dɛ mbrɛ n’asabu mpa tse; na adze biara a ɔtsena do no no ho nntsew, dɛ mbrɛ n’asabu mu ahoɔfi tse.

²⁷ Na obiara a ɔka ndzɛmba no no ho nntsew, na ɔnhor ne ntar, na onguar noho wɔ nsu mu, osiandɛ no ho nntsew araa kodu ewimbir.

²⁸ Mbom sɛ no ho tsew wɔ n’ahosen ho a, ɔno ɔnkan nda esuon, na n’ekyir no no ho aatsew.

²⁹ Na da a otsia awɔtwe no ɔmfa ntamram ebien, anaa mborɔnomamba ebien, mbrɛ ɔsɔfo no, wɔ ehyiadzibuw no n’abowano.

³⁰ Na ɔsɔfo no mfa kor mbɔ bɔn ho afɔr, na kor so mbɔ ɔhyew afɔr; na ɔsɔfo no mpata mma no wɔ EWURADZE enyim wɔ n’ahoɔfi ahosen no ntsi.

³¹ Dɛm na hom mfa nyi Israel mfi hɔn ahoɔfi mu; amma woeennwuwu wɔ hɔn ahoɔfi mu, aber a worukogu me ntamadan a ɔwɔ hɔn mu no ho fi no.

³² Iyi nye mbra a ɔwɔ hɔ ma nyia ɔwɔ ahosen, nye nyia ɔwɔ ahoba a fie no mu gu, ma ɔdze gu noho fi;

³³ na nyia ɔyar wɔ n’asabu mu, na ɔbanyin anaa ɔbaa biara a ɔnye obi a no ho nntsew da no.