Levitikɔs 13 - BAEBOR

Honam Enyi Nsaayarba

¹ Na EWURADZE kasaa kyerɛɛ Moses nye Aaron dɛ,

² Sɛ nyimpa bi nya no honam wer mu biribi soaa, anaa ntwintwamee, anaa ntokowa ntokowa, anaa odzidzi no honam wer mu yɛ kwata ntsetsewee a, ɔno wɔmfa no mbra ɔsɔfo Aaron, anaa ne mbabanyin asɔfo no mu kor:

³ na ɔsɔfo no nhwɛ honam wer no mu: na sɛ nhwi a ɔwɔ ntsetsewee no mu adan fitaa na ntsetsewee no enyi atotɔ mu asen no honam wer no a, ɔyɛ kwata ntsetsewee; na ɔsɔfo no nhwɛ no, na ɔnka dɛ no ho nntsew.

⁴ Na sɛ ntokowa ntokowa no yɛ fitaa wɔ no honam wer no mu, na n’enyi nntotɔɔ mu nnsen wer no, na no nhwi no nndaan fitaa a, ɔno ɔsɔfo no ntow ɔyarfo no mu nda esuon:

⁵ na da a otsia esuon no ɔsɔfo no nhwɛ no: na ɔhwɛ na sɛ ntsetsewee no esianka wɔ n’enyi do, na ntsetsewee no nntserɛwee wɔ wer no mu a, ɔno asɔfo no ntow no mu nda esuon bio:

⁶ na da a otsia esuon no ɔsɔfo no nhwɛ no bio: na, hwɛ, sɛ ntsetsewee no enyi edum, na ntsetsewee no nntserɛwee wɔ wer no mu a, ɔno ɔsɔfo no nka dɛ no ho tsew: ɔyɛ ntwintwamee: na ɔnhor ne ntar, na no ho ntsew.

⁷ Mbom ɔdze noho akɛkyerɛ ɔsɔfo no wɔ n’ahotsewee ho ekyir no, na sɛ ntwintwamee no tserɛw wɔ wer no mu a, ɔmfa no ho nkɛkyerɛ ɔsɔfo no bio:

⁸ na sɛ ɔsɔfo no hwɛ na sɛ ntwintwamee no atserɛw wɔ wer no mu a, ɔno ɔsɔfo no nka dɛ no ho nntsew: ɔyɛ kwata.

⁹ Sɛ kwata ntsetsewee wɔ nyimpa bi ho a, ɔno wɔmfa no mbra ɔsɔfo no;

¹⁰ na ɔsɔfo no nhwɛ, na, hwɛ, sɛ biribi fitaa soaa bi wɔ wer no mu, na ɔadan nhwi no fitaa, na honam momon rupuw wɔ soaa no mu a,

¹¹ ɔyɛ kwata dadaw a ɔwɔ no honam wer no mu, na ɔsɔfo no nka dɛ no ho nntsew: mma ɔnntow no mu: na no ho nntsew.

¹² Na sɛ kwata no epue efi wer no mu, na kwata no akata owuyarfo no no wer nyinara ho fi n’etsifi keka n’ananadze dɛ mbrɛ ɔda edzi ma ɔsɔfo no ara a;

¹³ ɔno ɔsɔfo no nhwɛ: na, hwɛ, sɛ kwata no akata no honam nyinara do a, ɔnka dɛ owuyarfo no no ho tsew: ne nyinara adan fitaa: no ho tsew.

¹⁴ Mbom aber biara a honam momon ada edzi wɔ no ho no, no ho nntsew.

¹⁵ Na ɔsɔfo no nhwɛ honam momon no, na ɔnka dɛ no ho nntsew: honam momon no ho nntsew: ɔyɛ kwata.

¹⁶ Anaa sɛ honam momon no dan fitaa bio a, ɔno ɔmbra ɔsɔfo no hɔ,

¹⁷ na ɔsɔfo no nhwɛ no: na, hwɛ, sɛ ntsetsewee no dan fitaa a, ɔno ɔsɔfo no nka dɛ ɔyarfo no no ho tsew: na no ho atsew.

¹⁸ Na sɛ pɔmpɔ bi bɔ wɔ honam no wer no mu, na ɔsa,

¹⁹ na soaa fitaa bi bɔsoa anaa ntokowa ntokowa fitaa, ɔberhoamu, ba pɔmpɔ no ananmu a, ɔno wɔmfa nkɛkyerɛ asɔfo no;

²⁰ na ɔsɔfo no nhwɛ, na, hwɛ, sɛ n’enyi atotɔ mu asen wer no; na no nhwi no adan fitaa a, ɔno ɔsɔfo no nka dɛ no ho nntsew: ɔyɛ kwata ntsetsewee, oepue wɔ pɔmpɔ no mu.

²¹ Mbom sɛ ɔsɔfo no hwɛ, na sɛ, nhwi fitaa bi nnyi mu, na ɔnntotɔ mu nnsen wer no, na n’enyi dum a, ɔno ɔsɔfo no ntow no mu nda esuon:

²² na sɛ ɔtserɛw wɔ wer no mu a, ɔno ɔsɔfo no nka dɛ no ho nntsew: ɔyɛ ntsetsewee.

²³ Mbom sɛ ntokowa ntokowa no sianka n’ananmu, na ɔanntserɛw a, ɔyɛ pɔmpɔ no itua; na ɔsɔfo no nka dɛ no ho tsew.

²⁴ Anaa sɛ gya hyew ano tua bi ba honam no wer no mu, na ɔhyew ano tua no do rupuw yɛ ntokowa ntokowa, ɔberhoamu, anaa fitaa a;

²⁵ ɔno ɔsɔfo no nhwɛ: na, hwɛ, sɛ nhwi a ɔwɔ ntokowa ntokowa no do adan fitaa, na n’enyi atotɔ mu asen wer no a; ɔyɛ kwata, oepue wɔ ɔhyew ano tua no mu: na ɔsɔfo no nka dɛ no ho nntsew: ɔyɛ kwata ntsetsewee.

²⁶ Mbom sɛ ɔsɔfo no hwɛ, na sɛ nhwi fitaa bi nnyi ntokowa ntokowa no mu, na ɔnntotɔɔ mu nnseen wer no, na n’enyi dum a: ɔno ɔsɔfo no ntow no mu nda esuon:

²⁷ na da a otsia esuon no ɔsɔfo no nhwɛ no: sɛ ɔtserɛw wɔ wer no mu a, ɔno ɔsɔfo no nka dɛ no ho nntsew: ɔyɛ kwata ntsetsewee.

²⁸ Na sɛ ntokowa ntokowa no sianka wɔ n’ananmu, na ɔanntserɛw wɔ wer no mu, na n’enyi dum a; ɔyɛ ɔhyew ano tua soaa, na ɔsɔfo no nka dɛ no ho tsew: na ɔyɛ ɔhyew ano tua no itua.

²⁹ Na sɛ ɔbanyin anaa ɔbaa bi nya ntsetsewee wɔ n’etsifi anaa n’abɔdwesa mu a,

³⁰ ɔno ɔsɔfo no nhwɛ ntsetsewee no: na, hwɛ, sɛ n’enyi atotɔ mu asen wer no, na nhwi memen tseatseaba bi wɔ mu a, ɔno ɔsɔfo no nka dɛ no ho nntsew: ɔyɛ ntutui, ɔyɛ tsir anaa abɔdwesa mu kwata.

³¹ Na sɛ ɔsɔfo no hwɛ ntutui ne ntsetsewee no, na, hwɛ, n’enyi nntotɔ mu nnsen wer no, na nhwi tuntum bi nnyi mu a, ɔno ɔsɔfo no ntow ntutui ɔyarfo no mu nda esuon:

³² na da a otsia esuon no ɔsɔfo no nhwɛ ntsetsewee no; na, hwɛ, sɛ ntutui no nntserɛwee, na nhwi memen bi nnyi mu, na ntutui no n’enyim nntotɔ mu nnsen wer no a,

³³ ɔno wɔntwerɛw nhwi no, mbom ntutui no na mma wɔnntwerɛw; na ɔsɔfo no ntow nyia ɔyar ntutui no mu nda esuon bio:

³⁴ na da a otsia esuon no mu ɔsɔfo no nhwɛ ntutui no: na, hwɛ, sɛ ntutui no nntserɛw wer no do, na n’enyi nntotɔ mu nnsen wer no a; ɔno ɔsɔfo no nka dɛ no ho tsew: na ɔnhor ne ntar, na no ho ntsew.

³⁵ Mbom n’ahotsewee ekyir no sɛ ntutui no tserɛw wɔ wer no mu a;

³⁶ ɔno ɔsɔfo no nhwɛ no; na, hwɛ, sɛ ntutui no atserɛw wɔ wer no mu a, mma ɔsɔfo no nnhwehwɛ nhwi memen no; no ho nntsew.

³⁷ Mbom sɛ ntutui no yɛ n’enyiwa do dɛ oesianka, na nhwi tuntum efuw wɔ mu a; ntutui no asa, no ho atsew: na ɔsɔfo no nka dɛ no ho atsew.

³⁸ Na sɛ ɔbanyin anaa ɔbaa nya ntokowa ntokowa fitaa wɔ no honam wer mu a;

³⁹ ɔno ɔsɔfo no nhwɛ: na, hwɛ, sɛ ntokowa ntokowa a n’enyi dum fitaa na ɔwɔ hɔn honam wer mu a; ɔyɛ ayam na oepue wɔ wer no mu; no ho tsew.

⁴⁰ Na sɛ ɔbanyin bi no nhwi pepa wɔ n’etsifi a, ɔyɛ otsipaa; naaso no ho tsew.

⁴¹ Na sɛ no nhwi pepa wɔ n’etsifi enyim afamu a, ɔyɛ pampamu tsipaa; na no ho tsew.

⁴² Mbom sɛ ntsetsewee ɔberhoamu bi tow ne tsipaa no mu, anaa ne pampamu paa no mu a; ɔyɛ kwata a orupue ne tsipaa, anaa ne pampamu paa no mu.

⁴³ Nkyii ɔsɔfo no nhwɛ no: na sɛ ntsetsewee no soaa no yɛ ɔberhoamu wɔ ne tsipaa no mu, anaa ne pampamu paa no mu, dɛ mbrɛ kwata firii tse wɔ honam wer no mu a;

⁴⁴ ɔyɛ ɔkwatanyi, no ho nntsew: ka ara na ɔsɔfo no nka dɛ no ho nntsew; ne ntsetsewee wɔ n’etsifi.

⁴⁵ Na ɔkwatanyi a ɔyar no wɔ no ho no, nsuansuan ne ntar mu, na ɔmbɔ ne tsinhwi mpɛsɛw, na ɔnkata n’anofamfa sor no, na ɔntsea mu dɛ, Ɔho nntsew o, ɔho nntsew o.

⁴⁶ Nda dodow a yar no wɔ no ho no nyinara no ho renntsew; no ho nntsew: noara nkotoo ntsena; nseraban no ekyir na ɔnyɛ ne tsenabew.

⁴⁷ Atar so a kwata ntsetsewee wɔ mu no, sɛ ɔyɛ kuntu atar o, ndwera atar o;

⁴⁸ sɛ ndwera, anaa kuntu, ne nsa anaa ne mfa mu o; sɛ nwoma, anaa adze biara a wɔdze nwoma ayɛ mu o;

⁴⁹ sɛ ntsetsewee no yɛ ebunebun anaa ɔberber wɔ atar no mu, anaa nwoma no mu, anaa nsa no mu, anaa mfa no mu, anaa nwoma adze biara mu a; ɔyɛ kwata ntsetsewee, na wɔmfa nkɛkyerɛ ɔsɔfo no:

⁵⁰ na ɔsɔfo no nhwɛ ntsetsewee no, na ɔntow ntsetsewee adze no mu nda esuon:

⁵¹ na da a otsia esuon no ɔnhwɛ ntsetsewee no: sɛ ntsetsewee no atserɛw wɔ atar no mu, anaa nsa no mu, anaa mfa no mu, anaa nwoma no mu, anaa biribiara a wɔdze nwoma ayɛ no mu a; ntsetsewee no yɛ kwata a ɔwewe; no ho nntsew.

⁵² Na ɔnhyew atar no, sɛ nsa no o, mfa no o, wɔ kuntu mu, anaa ndwera mu, anaa nwoma adze biara a ntsetsewee no wɔ mu no: na ɔyɛ kwata a ɔwewe; wɔnhyew no wɔ gya mu.

⁵³ Na sɛ ɔsɔfo no hwɛ, na, hwɛ, ntsetsewee no nntserɛw wɔ atar no mu, wɔ nsa no mu, anaa mfa no mu, anaa nwoma adze biara mu a;

⁵⁴ ɔno ɔsɔfo no nhyɛ ma wɔnhor adze no a ntsetsewee no wɔ mu no, na ɔntow no mu nda esuon bio:

⁵⁵ na ɔahor ntsetsewee no ekyir no, ɔsɔfo no nhwɛ: na sɛ ntsetsewee no nnsakyeer n’enyi, na ntsetsewee no nntserɛwee a, no ho nntsew; dza atow mu no wɔ mu o, ekyir o hyew no wɔ ogya mu: osiandɛ ɔyɛ nwewee.

⁵⁶ Na sɛ ɔsɔfo no hwɛ, na, hwɛ, ntsetsewee no no hor ekyir no n’enyi edum a, ɔno ɔntsew mfi atar no ho, anaa nwoma no ho, anaa nsa no ho, anaa mfa no ho:

⁵⁷ Na sɛ ɔda ho pue wɔ atar no mu, anaa nsa no mu, anaa mfa no mu, anaa nwoma adze biara no mu a, na orupue: fa gya hyew dza ntsetsewee no wɔ mu no.

⁵⁸ Na atar no, anaa nsa no, anaa mfa no, anaa nwoma adze biara a ebɔhor no, sɛ ntsetsewee no fi mu a, ɔno wɔnhor bio, na no ho atsew.

⁵⁹ Iyi nye mbra a ɔwɔ hɔ ma kwata ntsetsewee wɔ kuntu anaa ndwera atar ho, wɔ nsa anaa mfa, anaa nwoma adze biara mu, ma wɔdze aaka dɛ no ho tsew, anaa wɔdze aaka dɛ no ho nntsew.