Levitikɔs 12 - BAEBOR

Awoo Ho Ahoguar

¹ Na EWURADZE kasaa kyerɛɛ Moses dɛ,

² Kasa kyerɛ Israelmba dɛ, Sɛ ɔbaa bi nyinsen na ɔwo banyimba a, ɔno no ho nntsew araa nda esuon; dɛ mbrɛ no ho nntsew wɔ n’asabu nda no mu no.

³ Na da a otsia awɔtwe no wontwa ne banyinwer no twatsia.

⁴ Na ɔnko ntandan mu adaduasa nda ebiasa wɔ n’ahoguar bɔgya mu; mma ɔnnka adzekrɔnkrɔn biara, nkyii so ɔmmba krɔnkrɔn bea, kyerɛ n’ahoguar nda ewie du ana.

⁵ Mbom sɛ ɔwo basiaba a, ɔno no ho nntsew araa adapɛn ebien, dɛ n’asabu mu: na ɔnko ntandan mu adaduosia nda esia wɔ n’ahoguar bɔgya mu.

⁶ Na sɛ n’ahoguar nda no wie du, ma ɔbanyin, anaa ɔbabaa a, ɔmfa eguambaa a oedzi afrenhyia a wɔdze bɔbɔ ɔhyew afɔr, nye aborɔnoma ba, anaa atamram a wɔdze bɔbɔ bɔn ho afɔr, mbra ehyiadzibuw no n’abowano mbɛma ɔsɔfo no:

⁷ na ɔmfa mbɔ afɔr wɔ EWURADZE enyim, na ɔmpata mma no; na no ho ntsew wɔ no bɔgyaagu no ho. Iyi nye mbra a ɔwɔ hɔ ma nyia ɔwo ɔbanyin anaa ɔbaa.

⁸ Na sɛ ne nsa annso eguambaa do a, ɔno ɔmfa ntamram ebien; kor nyɛ ɔhyew afɔr, na kor so nyɛ bɔn ho afɔr: na ɔsɔfo no mpata mma no, na no ho ntsew.