Levitikɔs 11 - BAEBOR

Mbowa a Hɔnho Tsew Na Dza Hɔnho Nntsew

¹ Na EWURADZE kasaa kyerɛɛ Moses nye Aaron, see hɔn dɛ,

² hom nkasa nkyerɛ Israelmba dɛ, Iyinom nye mbowa a hom ndzi wɔ asaase do mbowa nyinara mu.

³ Anansambowa mu biara a wɔapaa n’anansa mu, na ɔyɛ anansapaae koraa, na ɔkosa adzepuwii no, ɔno na hom ndzi.

⁴ Naaso iyinom na mma hom nndzi wɔ hɔn a wɔkosa adzepuwii, anaa hɔn a hɔn anansa mu apaa mu: efupɔnkɔ, osiandɛ ɔkosa adzepuwii dze, naaso n’anansa mu mmpaae, ntsi no ho nntsew mma hom.

⁵ Na etwabowa, osiandɛ ɔkosa adzepuwii dze, naaso n’anansa mu mmpaae, no ho nntsew mma hom.

⁶ Na asoaso, osiandɛ ɔkosa adzepuwii dze, naaso n’anansa mu mmpaae, no ho nntsew mma hom.

⁷ Na preko, osiandɛ n’anansa mu apaa, na ɔyɛ anansapaae koraa dze, naaso ɔnnkosa adzepuwii ntsi no ho nntsew mma hom.

⁸ Mma hom nndzi hɔn nam bi, na hɔn efun so mma hom nnka; hɔn ho nntsew mma hom.

⁹ Iyinom nye dza hom ndzi wɔ dza ɔwɔ nsu mu nyinara mu: biara a ɔwɔ tɛterɛ nye abon wɔ nsu mu, pomu, nye esutsen mu no, iyinom na hom ndzi.

¹⁰ Na dza wonnyi tɛterɛ nye abon a wɔwɔ pomu, nye esutsen mu nyinara, nye dza wɔwɔ nsu mu nyinara a nkwa wɔ hɔn mu no yɛ ekyiwadze ma hom,

¹¹ na ɔnyɛ hom ekyiwadze; mma hom nndzi hɔn nam, na hɔn efun mpo, hom nkyir.

¹² Adze biara a onnyi tɛterɛ anaa abon wɔ nsu mu no, ɔyɛ ekyiwadze ma hom.

¹³ Na iyinom na hom nkyir no wɔ ntumbowa mu; mma wonndzi, wɔyɛ ekyiwadze: ɔkɔr, nye ɔkɔrbia, nye nsukɔr;

¹⁴ na ɔsansaa, nye ɔkom n’ahorow;

¹⁵ akonkoran biara n’ahorow;

¹⁶ nye sohor, nye anadwe akrɔma, nye po akokɔ, nye akrɔma n’ahorow;

¹⁷ nye patubia, nye po akonkoran, nye patu kɛse;

¹⁸ nye ambɛnpatu, nye nantwinoma, nye ɔpɛtɛ:

¹⁹ nye esukɔnkɔn, bakanoma n’ahorow, nye esuakokɔ, nye apan.

²⁰ Ntumbowa ahorow a wɔnantsew anan anan anan do nyinara yɛ ekyiwadze ma hom.

²¹ Naaso iyinom na hom ndzi no wɔ ntumbowa menyamenya a wɔnantsew anan anan anan do nyinara mu, hɔn a wɔwɔ aperɛ wɔ hɔn anan do a wɔdze huruw wɔ asaase do no,

²² mekyerɛ hɔn mu iyinom na hom ndzi; mbɛbɛw n’ahorow, akyekyemawe n’ahorow, kukura n’ahorow, ɔhwedɔm n’ahorow.

²³ Na ntumbowa menyamenya nyinara a wɔwɔ anan anan anan no, yɛ ekyiwadze ma hom.

²⁴ Na iyinom na hom dze gu homho fi: obiara a ɔka hɔn fun no, no ho nntsew ara kodu ewimbir:

²⁵ Na obiara a ɔsoa hɔn fun no ɔnhor ne ntar, osiandɛ no ho nntsew araa kodu ewimbir.

²⁶ Anansabowa biara a wɔapaa n’anansa mu, na ɔnnyɛ anansapaae koraa, na ɔnnkosa adzepuwii no, no ho nntsew mma hom; obiara a ɔka hɔn no, no ho nntsew.

²⁷ Na abowa biara a ɔnantsew no werɛw ano no wɔ mbowa a wɔnantsew anan anan do nyinara mu no, hɔn ho nntsew mma hom: obiara a ɔka hɔn fun no, no ho nntsew araa kodu ewimbir.

²⁸ Na nyia ɔsoa hɔn fun no ɔnhor ne ntar, na no ho nntsew araa kodu ewimbir: hɔn ho nntsew mma hom.

²⁹ Na iyinom nye hɔn a hɔn ho nntsew mma hom wɔ aweaweambowa a wɔwea wɔ asaase do no mu; obirebi, nye okura, nye ɔketsew n’ahorow,

³⁰ nye ban yer abamba, nye ɔmampam, nye ɔsamanapa, nye anhweaketsew, nye abosomanketsew.

³¹ Iyinom nye hɔn a hɔn ho nntsew mma hom wɔ dza wɔwea nyinara mu: sɛ wowu a, obiara a ɔka hɔn no, no ho nntsew araa kodu ewimbir.

³² Na adze biara a hɔn mu dza oewu atɔ do no, no ho nntsew; dua adze o, atar o, nwoma o, bɔtɔ o, adze biara a wɔdze yɛ edwuma biara, wɔmfa nhyɛ nsu mu, na no ho nntsew araa kodu ewimbir; ansaana no ho atsew.

³³ Na dɛtsesɛn biara a hɔn mu bi bɔtɔ mu no, adze biara a ɔwɔ mu no no ho nntsew, na sɛn no hom mbɔ no.

³⁴ No mu edziban a wodzi biara a nsu bogu mu no, no ho nntsew: na anondze nyinara a wɔnom wɔ dɛm adze biara mu no, no ho nntsew:

³⁵ Na adze biara a hɔn fun no bi bɔtɔ do no no ho nntsew; fononoo o, mbukyia o, wombubu no esinesin: hɔn ho nntsew, na hɔn ho nntsew mma hom.

³⁶ Naaso nsubura anaa amona a nsu egyina mu no dze, no ho tsew: mbom dza ɔka hɔn fun no, no ho nntsew.

³⁷ Na sɛ hɔn fun bi tɔ ekuadze a woedua biara do a, no ho tsew.

³⁸ Mbom sɛ wɔdze nsu gu ekuadze no do a, na hɔn fun bi tɔ do a, ekuadze no ho nntsew mma hom.

³⁹ Na sɛ abowa biara a hom dzi wu a, nyia ɔka no fun no, no ho nntsew araa kodu ewimbir.

⁴⁰ Na nyia odzi no fun bi no, ɔnhor ne ntar, na no ho nntsew araa kodu ewimbir: onyia so a ɔsoa no fun no, nhor ne ntar, na no ho nntsew araa kodu ewimbir.

⁴¹ Na aweaweabowa biara a ɔwea wɔ asaase do no, yɛ ekyiwadze; mma wonndzi.

⁴² Adze biara a ɔnam ɔyafun do, nye adze biara a ɔnam anan anan do, anaa adze biara a ɔwɔ anan pii, mekyerɛ aweaweambowa a wɔwea wɔ asaase do nyinara, mma hom nndzi; na wɔyɛ ekyiwadze.

⁴³ Mma hom nnyɛ homho ekyiwadze wɔ aweaweabowa biara a ɔwea ho, nkyii so mma hom nnyɛ homho fi a ɔmma hom ho nntsew wɔ hɔn ho.

⁴⁴ Na emi nye EWURADZE hom Nyankopɔn: dɛm ntsi hom ntsew homho, na hom nyɛ krɔnkrɔn; osiandɛ meyɛ krɔnkrɔn. Nkyii so mma hom nngu homho fi wɔ aweaweabowa biara a otwuw noho adze wɔ asaase do no ho.

⁴⁵ Na emi nye EWURADZE a miyii hom fii Egypt asaase do bae, dɛ meyɛ hom Nyankopɔn no; dɛm ntsi hom nyɛ krɔnkrɔn, na meyɛ krɔnkrɔn.

⁴⁶ Iyi nye anansabowa, nye etubowa, nye abowa biara a ɔwɔ nsu mu na abowa biara a ɔwea wɔ asaase do no ho mbra:

⁴⁷ ma wɔdze apa adze a no ho nntsew nye dza no ho tsew mu, na adze a nkwa wɔ mu a wodzi nye dza nkwa wɔ mu a wonndzi mu.