Jude 1 - BAEBOR

¹ Jude, Jesus Kraest n’akowaa, nye James no nua no, dze kɛma hɔn a wɔafrɛ hɔn, Egya Nyankopɔn mu adɔfo, na wɔakora hɔn ama Jesus Kraest no.

² Mbɔbɔrhu nye asomdwee nye dɔ ndɔɔ so mma hom.

Ator Akyerɛkyerɛfo

³ Adɔfo, morobɔ mbɔdzen biara akyerɛw nkwagye a ɔyɛ hɛn nyina dze no ho asɛm abrɛ hom yi, ekehia so dɛ mekyerɛw botu hom fo dɛ, hom ndzi aper enyiberdo mma gyedzi a wɔdze maa ahotseweefo no prɛko pɛr no.

⁴ Osiandɛ nyimpa bi ewiawia hɔnho abɛhyɛ mu a wofi tsetse dze hɔn esi hɔ ama dɛm atsɛmbu yi, emumuyɛfo a woesi hɛn Nyankopɔn adom no tsir adze bɔ egyangyanbra, na wɔpow hɛn Wura kortsee a ɔno nye hɛn Ewuradze Jesus Kraest no.

⁵ Na mepɛ dɛ mobɔ hom a hom nyim iyi prɛko dada yi nkaa, dɛ Ewuradze gyee ɔman no fii Egypt asaase do no ekyir no ɔsɛɛ hɔn a wɔanngye enndzi no.

⁶ Na abɔfo a wɔannkora hɔnara hɔn mpanyindzi, na wɔdaan hɔnankasa hɔn tsenabea gyae no, ɔdze hɔn egu daa nkɔnsɔnkɔnsɔn mu wɔ sum mu ama da kɛse no n’atsɛmbu no.

⁷ Dɛmara na Sodom nye Gomora nye nkurow a ɔdeda hɔn ho a wɔyɛɛ dza iyinom yɛe dze hɔnho maa ndwamansɛm dze bɔɔ mbusu kɛse no, wɔdze hɔn esi hɔ dɛ asɛndahɔ ama ogya a onndum da ntsea no.

⁸ Dɛmara so na iyinom so yɛ adaasofo a wogu honam ho fi, na wommbu tumdzi hwee, na wɔyeyaw enyimnyamfo.

⁹ Naaso ber a ɔbɔfopanyin Maekɛl nye abɔnsam dzii esi kasakasae wɔ Moses fun ho no, oennsi no bo dɛ ɔyaw no bu no atsɛn, na mbom ɔsee dɛ, Ewuradze nka w’enyim.

¹⁰ Na iyinom dze wɔka dza wonnyim no ho nsɛmbɔn; na dza wofi hɔn nyimpasu mu nyim no, dɛ mbowa a wonnyi adwen no. Na iyinom mu na wogu hɔnho fi.

¹¹ Wondue! Osiandɛ wɔfaa Kain kwan do, na wɔatow hɔnho akyen wɔ Balaam mfom mu wɔ mfaso ntsi, na wɔahera dɛ Kora wɔ etuatsew mu.

¹² Iyinom na wɔyɛ nkekaa wɔ hom dɔ edzidzi mu, wɔnye hom dzidzi, nguanhwɛfo a wonnsuro adze dɛ wɔnyɛn hɔnho, nsuwusiw a nsu nnyi mu a mframa dze hɔn kyinkyin, ɔhyewber ndua a wonnyi aba a woewu mprɛnu, eso hɔn ndwow etutu;

¹³ po asorɛkye dzendzenndzen a wohur hɔnara hɔn enyito pue; ekyinekyin nworaba a wɔdze sum kebikebi esie ama hɔn daa.

¹⁴ Iyinom so na Enok a ofi Adam do no na otsia esuon wɔ mbasantsen mu no hyɛɛ nkɔm kyerɛɛ hɔn dɛ, Hwɛ, Ewuradze dze no krɔnkrɔmfo mpem du reba,

¹⁵ ebobu hɔn nyina atsɛn, na oeyi emumuyɛfo nyina atsɛn wɔ hɔn emumuyɛdze a wɔyɛɛ nyina, nye etsirmɔdzensɛm a ɔyɛ dzen a ndzebɔnyɛfo emumuyɛfo kae dze tsiaa no nyina ho.

¹⁶ Iyinom yɛ ehwinhwimfo, begyabegyayɛfo a wodzi hɔnara hɔn akɔndɔ ekyir, na hɔn ano ka akɛsesɛm, na mfaso ntsi wɔhwɛ nyimpa enyim.

¹⁷ Na hom dze, adɔfo, hom nkaa nsɛm a hɛn Ewuradze Jesus Kraest asomafo kae too hɔ no:

¹⁸ mbrɛ wɔkaa kyerɛɛ hom dɛ, Ber a odzi ekyir no mu atwetwesifo bɛba a wɔbɛnantsew hɔnara hɔn emumuyɛ akɔndɔ ekyir no.

¹⁹ Iyinom nye hɔn a wɔdze mpaapaamu ba, honam ekyidzifo a wonnyi Sunsum no.

²⁰ Na hom dze, adɔfo, hom mfa homho nsi hom gyedzi krɔnkrɔn no do mbɔ mpaa wɔ Sunsum Krɔnkrɔn no tum mu;

²¹ hom nsie homho wɔ Nyankopɔn dɔ no mu, ntweɔn Ewuradze Jesus Kraest no mbɔbɔrhu nkɔ onnyiewiei nkwa mu.

²² Na binom a wohinhim no, hom nhu hɔn mbɔbɔr;

²³ na binom so hom nhwim hɔn mfi gya mu ngye hɔn nkwa; na binom so hom mfa suro nhu hɔn mbɔbɔr; hom nkyir nyimpasu a ɔtse dɛ atar a nkekaaba wɔ mu mpo.

Ndaase ho Mpaabɔ

²⁴ Na afei nyia obotum akora hom ma hom eemmfintsiw, na ɔdze hom esi n’enyimnyam enyim dɛ hom nndzi dzɛm wɔ enyigye mbordo mu no,

²⁵ Nyankopɔn kortsee a ɔnam hɛn Ewuradze Jesus Kraest do yɛ hɛn Agyenkwa no, ɔno na enyimnyam, kɛseyɛ, ahoɔdzen nye tumdzi nka no, mbersantsen, sesei, nye daapem. Amen.