John 9 - BAEBOR

Jesus Bue Nyia Wɔwoo no Onyifurafo Enyiwa

¹ Na orutwa mu no, ohun nyimpa bi a ɔyɛ onyifuranyi fi n’awoo mu.

² Na n’esuafo bisaa no dɛ, Rabae, woana na ɔyɛɛ bɔn, nyimpa yi anaa n’awofo a, dɛ wɔwoo no onyifuranyi?

³ Jesus buaa dɛ, Nnyɛ nyimpa yi na ɔyɛɛ bɔn, eso nnyɛ n’awofo a, na mbrɛ Nyankopɔn ndwuma bɛda edzi wɔ no mu ntsi a.

⁴ Otwar dɛ, adzekyee wɔ do yi, yɛyɛ nyia ɔsomaa me no no ndwuma; na adzesaa reba a obi nnkotum ayɛ edwuma.

⁵ Mowɔ wiadze yi, emi nye wiadze ne kan.

⁶ Ɔkaa dɛm yi no, ɔtoo ntafi guu daadze, na ɔdze ntafi no yɛɛ dɛtse seraa n’enyiwa do,

⁷ na ɔsee no dɛ, Kɔ kɔhohor wɔ nsutaae Siloam mu (ne nkyerɛase nye, Nyia wɔasoma no). Na osii mu kɔree kɔhohoree, na ɔbae no nna ohu adze.

⁸ Dɛm ntsi no sɔnmufo nye hɔn a nkan no wohun no dɛ ɔyɛ ohuafo no see no dɛ, Ana nnyɛ oyi na ɔtse hɔ serɛserɛ adze no?

⁹ Binom see dɛ, Ɔno nye yi; binom so see dɛ, Dabi, na ɔnye no sɛ; na nankasa dze ɔsee dɛ, Emi nye no.

¹⁰ Na wɔsee no dɛ, Wosii dɛn buee w’enyi no?

¹¹ Obuaa dɛ, Nyimpa a wɔfrɛ no Jesus no yɛɛ dɛtse dze seraa m’enyi do, na ɔsee me dɛ, Kɔ nsutaae Siloam mu kɔhohor; na mokɔree kɔhohoree nna muhu adze yi.

¹² Wobisaa no dɛ, Ɔnoara wɔ hen? Obuaa dɛ, Minnyim.

Farisiifo no Hwehwɛ Ayarsa no Mu

¹³ Wɔdze nyia nkan no ɔyɛ onyifuranyi no kɛmaa Farisiifo no.

¹⁴ Na da a Jesus yɛɛ dɛtse na obuee n’enyiwa no yɛ ahomgyeda.

¹⁵ Dɛm ntsi Farisiifo no so bisaa no bio, mbrɛ osii hun adze. Na ɔsee hɔn dɛ, Dɛtse na ɔdze guu m’enyiwa do, na mohohoree, na muhun adze.

¹⁶ Na Farisiifo no mu binom see dɛ, Nyimpa yi mmfi Nyankopɔn nkyɛn, osiandɛ onnsie ahomgyeda; binom so see dɛ, Ɔbɛyɛ dɛn na nyimpa dzebɔnyɛnyi botum ayɛ nsɛnkyerɛdze a ɔtse dɛm yi? Na mpaapaamu baa hɔn mu.

¹⁷ Na wɔsee onyifuranyi no bio dɛ, Na ɔwo dze, eka dɛn wɔ no ho, dɛ obuee w’enyiwa? Ɔsee dɛ, Ɔyɛ nkɔnhyɛnyi.

¹⁸ Na Jewfo no anngye no ho asɛm no enndzi, dɛ nkyɛ ɔyɛ onyifuranyi na afei ohu adze, dze kodur dɛ wɔfrɛɛ nyia ohun adze no n’awofo.

¹⁹ Na wobisaa hɔn dɛ, Ana hom ba a hom se wɔwoo no onyifuranyi no nye yi? Afei ɔyɛ dɛn na ohu adze yi?

²⁰ N’awofo no buaa hɔn dɛ, Yenyim dɛ hɛn ba nye yi, yenyim so dɛ wɔwoo no onyifuranyi;

²¹ na mbrɛ ɔyɛe na afei ohu adze yi dze, yennyim; na nyimpa kor a obuee n’enyiwa no so, yennyim; ɔnoara oenyin; hom mbisa no, na nankasa bɛka noara asɛm.

²² N’awofo kaa yi, osiandɛ wosuroo Jewfo no, nna Jewfo no apam dada dɛ, sɛ obi paa mu ka dɛ ɔno nye Kraest no a, wɔbɛpam no efi nhyiamudan mu.

²³ Dɛm ntsi na n’awofo kaa dɛ, Oenyin: hom mbisa no no.

²⁴ Na wɔfrɛɛ nyimpa a nkan no ɔyɛ onyifuranyi no ne mpɛn ebien, na wɔsee no dɛ, Fa enyimnyam ma Nyankopɔn, na hɛn dze, yenyim dɛ nyimpa yi yɛ dzebɔnyɛnyi.

²⁵ Na obuaa dɛ, Sɛ ɔyɛ dzebɔnyɛnyi a, minnyim. Adze kor na minyim, dɛ nkyɛ meyɛ onyifuranyi, na afei dze muhu adze.

²⁶ Wɔsee no dɛ, Ɔyɛɛ wo dɛn? Oduaa dɛn buee w’enyiwa?

²⁷ Obuaa hɔn dɛ, Maka akyerɛ hom dada, na hom enntsie; ebɛnadze ntsi na hom repɛ etsie bio? Ana hom so pɛ dɛ hom dan n’esuafo anaa?

²⁸ Na wɔyaw no na wɔsee dɛ, Ɔwo na eyɛ no suanyi, na hɛn dze, Moses esuafo nye hɛn.

²⁹ Yenyim dɛ Nyankopɔn akasa akyerɛ Moses, na oyi dze, yennyim mbrɛ ofi.

³⁰ Nyimpa no buae see hɔn dɛ, Iyi mu na ɔyɛ nwanwa, dɛ hom nnyim mbrɛ ofi, naaso obuee m’enyiwa.

³¹ Yenyim dɛ Nyankopɔn nntsie ndzebɔnyɛfo, na sɛ obi yɛ Nyankopɔn no somfo na ɔyɛ n’apɛdze a, ɔno na otsie no.

³² Ofitsi dɛ wiadze hyɛɛ ase wɔnntsee dɛ obi ebue nyia wɔawo no onyifuranyi no n’enyiwa pɛn:

³³ sɛ oyi mmfi Nyankopɔn nkyɛn a, nkyɛ orunntum nnyɛ hwee.

³⁴ Wobuae see no dɛ, Ɔwo, bɔn mu koraa na wɔwoo wo, nna ɔwo na erekyerɛkyerɛ hɛn yi? Na wɔpaam no fii hɔ.

Sunsum mu Enyifura

³⁵ Jesus tsee dɛ wɔapam no efi edzi, na ohun no no, obisaa no dɛ, Ana egye Nyankopɔn Ba no dzi?

³⁶ Na obuae see no dɛ, Mo wura, ɔno nye woana, ma mengye no mindzi?

³⁷ Jesus see no dɛ, Ehu no na eso nyia ɔnye wo rekasa yi nye ɔno.

³⁸ Na ɔsee no dɛ, Mo wura, megye midzi; na ɔkotowee sɔɔr no.

³⁹ Na Jesus see dɛ, Atsɛmbu ntsi na mebaa wiadze yi mu: ma hɔn a wonnhu adze no woeehu, na hɔn a wohu adze no wɔaadan enyifurafo.

⁴⁰ Na Farisiifo no mu bi a wɔnye no wɔ hɔ tsee nsɛm yi, na wɔsee dɛ, Aso hɛn so yɛyɛ enyifurafo?

⁴¹ Jesus see hɔn dɛ, Sɛ hom yɛ enyifurafo a, nkyɛ hom nnyi bɔn; na afei hom se dɛ, Yehu adze: ntsi na hom bɔn aka hɔ no.