John 7 - BAEBOR

Jesus Nye no Nuanom

¹ Iyi ekyir no, Jesus kekyinkyiin Galilii, nna ɔmmpɛ dɛ okekyinkyin Judea, osiandɛ Jewfo no rohwehwɛ no eku no.

² Nna Jewfo no asesebɔ afahyɛ no abɛn.

³ Na no nuanom no see no dɛ, Fi ha kɔ Judea ama w’esuafo no so aahwɛ wo ndwuma a ereyɛ yi.

⁴ Na obi nnyɛ biribi wɔ nsumaa mu, na ɔnnhwehwɛ dɛ nankasa dze, wobohu no bagua mu. Sɛ eyɛ yinom a, yi woho kyerɛ wiadze.

⁵ (Na no nuanom mpo anngye no enndzi.)

⁶ Jesus see hɔn dɛ, Emi dze, me ber nnyae nndurii, na hom dze, hom mber wɔ hɔ daa.

⁷ Wiadze nntum nntan hom, na emi dze, ɔtan me, osiandɛ megye no ho dase dɛ no ndwuma muo.

⁸ Hom nkɔ afahyɛ no ase; emi dze, minnyae nnkɔr afahyɛ yi ase, osiandɛ me ber nnyae nndurii.

⁹ Na ɔsee hɔn dɛm no ɔtsenaa Galilii.

Jesus wɔ Asesebɔ Afahyɛ no ase

¹⁰ Na no nuanom kɔree no ekyir no, no so kɔr afahyɛ no ase, nnyɛ guado, na mbom wɔ nsumaa mu.

¹¹ Na Jewfo no hwehwɛɛ no afahyɛ no ase, na wɔsee dɛ, Ɔwɔ hen?

¹² Na huhuhuhu pii baa nyimpadodow no mu wɔ no ho: binom se, Ɔyɛ nyimpa pa; binom se, Dabi, na ɔdaadaa nkorɔfo no.

¹³ Naaso, Jewfo no ho hu ntsi, obi anngye enyim annka no ho asɛm.

¹⁴ Na odur afahyɛ no finimfin no, Jesus kɔr asɔrfi no mu kɛkyerɛkyerɛe.

¹⁵ Na ɔyɛɛ Jewfo no nwanwa na wɔsee dɛ, Ɔyɛ dɛn na onnsuaa nwoma, naaso onyim yi?

¹⁶ Na Jesus buaa hɔn dɛ, Me nkyerɛkyerɛ nnyɛ medze, na nyia ɔsomaa me no dze a.

¹⁷ Sɛ obi pɛ dɛ ɔyɛ ne pɛ a, obohu nkyerɛkyerɛ no dɛ ofi Nyankopɔn anaadɛ ofi mankasa me tsirmu na meka.

¹⁸ Nyia ɔbɔ nankasa ne tsirmu kasa no hwehwɛ nankasa n’enyimnyam; na nyia ɔhwehwɛ nyia ɔsomaa no no n’enyimnyam no, ɔno na ɔyɛ nokwafo, na dza ɔnntsen nnyi no mu.

¹⁹ Ana nnyɛ Moses na ɔmaa hom mbra no? Naaso hom mu obiara nndzi mbra no do. Ɔyɛ dɛn na hom rohwehwɛ me eku me yi?

²⁰ Nyimpadodow no buaa dɛ, Ewɔ abɔnsam: woana na ɔrohwehwɛ wo eku wo?

²¹ Jesus buaa hɔn dɛ, Edwuma kor pɛ na meyɛe na ɔyɛ hom nyina nwanwa yi.

²² Dɛm ntsi na Moses ama hom twatsiatwa (nnyɛ dɛ ofi Moses, na ofi egyanom no) naaso ahomgyeda hom twa nyimpa twatsia.

²³ Sɛ nyimpa nya twatsiatwa ahomgyeda ama wɔaannto Moses mbra a, hom bo efuw me dɛ mama nyimpa no ho nyina ayɛ no dzen ahomgyeda anaa?

²⁴ Mma hom mmbu atsɛn dɛ mbrɛ hom hu no enyiwa do, mbom hom mbu atsɛn tsenenee.

Ana Mesaia no Nye Oyi a

²⁵ Na Jerusalɛmfo no mu binom see dɛ, Ana nnyɛ oyi nye nyia wɔrohwehwɛ no eku no no?

²⁶ Na hwɛ, ɔrekasa pefee naaso wɔnnse no hwee. Gyama mpanyimfo no ehu ampa dɛ oyi nye Kraest no anaa?

²⁷ Naaso, oyi dze, yenyim mbrɛ ofi, na Kraest no dze, sɛ ɔba a, obi runnhu mbrɛ ofi.

²⁸ Na Jesus rekyerɛkyerɛ wɔ asɔrfi no mu no, ɔtseaa mu na ɔsee dɛ, Hom nyim me, na eso hom nnyim mbrɛ mifi; na mankasa mannhyɛ moho mebae, na nyia ɔsomaa me no nye nokwafo a hom nnyim no.

²⁹ Emi dze, minyim no, osiandɛ mifi no hɔ, na ɔno na ɔsomaa me.

³⁰ Na wɔhwehwɛɛ dɛ wɔkyer no, naaso obi ammfa ne nsa ennsuo no mu, osiandɛ no dɔn nnyae nndurii.

³¹ Na nyimpadodow no mu pii gyee no dzii na wɔsee dɛ, Ana Kraest no, sɛ ɔba a, ɔbɛyɛ nsɛnkyerɛdze pii akyɛn dza oyi ayɛ yi?

Wɔsoma dɛ Wɔnkɛkyer Jesus

³² Farisiifo no tsee dɛ nyimpadodow no ruhwinhwin dɛm wɔ no ho, na asɔfompanyin no nye Farisiifo no somaa asomfo dɛ wɔnkɛkyer no.

³³ Na Jesus see dɛ, Aber kakrabaabi na mowɔ hom nkyɛn, na morokɔ nyia ɔsomaa me no nkyɛn.

³⁴ Hom bɔhwehwɛ me na hom nnkohu me, na mbrɛ mowɔ no hom runntum hɔ ba.

³⁵ Na Jewfo no kaa kyerɛɛ hɔnho dɛ, Hen na ɔrobɔkɔ na yennkohu no? Ɔbɔkɔ hɔn a wɔapetse Griikfo mu no mu akɛkyerɛkyerɛ Griikfo no anaa?

³⁶ Asɛm bɛn na ɔreka yi dɛ, Hom bɔhwehwɛ me na hom nnkohu me, na mbrɛ mowɔ hom runntum hɔ ba yi?

Nkwa Esutsen

³⁷ Na da a odzi ekyir no a ɔyɛ afahyɛ no ne dapɔn no Jesus gyinae tseaa mu dɛ, Sɛ nsukɔm dze obi a, wɔmma ɔmbra me nkyɛn mbɔnom.

³⁸ Nyia ɔgye me dzi no, dɛ mbrɛ kyerɛwsɛm no aka no, nkwa esutsen befi ne yamu apem.

³⁹ Na iyi dze, ɔkae wɔ Sunsum a hɔn a wɔgyee no dzii no woribenya no ho, nna Sunsum no nnyae mmbae, osiandɛ wonnyae nnhyɛɛ Jesus enyimnyam.

⁴⁰ Ntsi nyimpadodow no mu binom tsee nsɛm yi no, wɔkaa dɛ, Nkɔnhyɛnyi no nye yi ampa.

⁴¹ Binom kaa dɛ, Kraest no nye yi; na binom so kaa dɛ, Ana Kraest no befi Galilii aba?

⁴² Ana kyerɛwsɛm no annka dɛ, David asefo mu, nye Bɛtlɛhɛm kurow a David tsenaa mu no mu, na Kraest no befi aba?

⁴³ Na mpaapaamu baa nyimpadodow no mu,

⁴⁴ na hɔn mu binom pɛɛ dɛ wɔkyer no, naaso obiara ammfa ne nsa ennsuo no mu.

Jewfo Etumdzifo no Anngye no Enndzi

⁴⁵ Na asomfo no baa asɔfompanyin no nye Farisiifo no nkyɛn, na wobisaa hɔn dɛ, Ebɛnadze ntsi na hom ammfa no ammba?

⁴⁶ Asomfo no buaa dɛ, Nyimpa bi nnkasaa dɛm da, dɛ dɛm nyimpa yi.

⁴⁷ Na Farisiifo no buaa hɔn dɛ, Ana hom so wɔadaadaa hom?

⁴⁸ Ana mpanyimfo anaadɛ Farisiifo bi gyee no dzii?

⁴⁹ Na nyimpadodow a wonnyim mbra no, wɔapaa hɔn.

⁵⁰ Nikodemɔs a nkan no ɔbaa ne nkyɛn a ɔyɛ hɔn mu baako no kaa kyerɛɛ hɔn dɛ,

⁵¹ Ana hɛn mbra so nndzii kan nntsiee nyimpa, na onnhun dza ɔayɛ a, obu no atsɛn?

⁵² Wobuaa no dɛ, Ana wo so ifi Galilii? Hwehwɛ mu hwɛ, na hu dɛ nkɔnhyɛnyi mmpuei wɔ Galilii mu da.

⁵³ [Na hɔn nyina kokɔr hɔn efiefi.