John 6 - BAEBOR

Jesus Ma Nyimpa Mpemenum Edziban

¹ Iyi ekyir no, Jesus sii mu kɔr Galilii po a ɔyɛ Tiberias po no egya.

² Na nyimpadodow pii dzii n’ekyir, osiandɛ wohun nsɛnkyerɛdze a ɔyɛe wɔ hɔn a wɔyar ho.

³ Na Jesus kɔr koko no do na ɔnye n’esuafo kɛtsenaa hɔ.

⁴ Nna apaho no, Jewfo afahyɛ no, abɛn.

⁵ Na afei, Jesus maa n’enyi do, na ohun dɛ nyimpadodow kɛse reba ne nkyɛn no, ɔsee Filip dɛ, Hen na yebenya paanoo atɔ ama yinom eedzi?

⁶ Na iyi dze ɔkae ara dze sɔɔ no hwɛe, osiandɛ nna nankasa nyim dza ɔrebɛyɛ.

⁷ Filip buaa no dɛ, Paanoo Denare ahaebien mpo nnkɔso hɔn dɛ hɔn nyina benya nkakrankakra.

⁸ Na n’esuafo no mu baako, Andrew a ɔyɛ Simon Peter no nua no, see no dɛ,

⁹ Banyimba bi wɔ ha a ɔwɔ atoko paanoo enum na esunam nkakraba ebien; na iyi dze, ebɛnadze na ɔbɛyɛ ama nyimpa pii yi?

¹⁰ Jesus see dɛ, Hom mma nyimpa no ntsenatsena famu. Eso nna sar pii wɔ hɔ. Na dɔm no tsenatsenaa famu ma hɔn dodow bɛyɛ mpemenum.

¹¹ Na Jesus faa paanoo no nye esunam no na ɔdaa ase no, ɔkyɛe maa hɔn a wɔtsetse hɔ no, dɛ dodow biara a obiara hia.

¹² Na wɔmee no, ɔsee n’esuafo dɛ, Hom mboaboa mporoporoba a ɔaka no ano, amma biribiara aannyɛ gyan.

¹³ Na wɔboaboaa ano, na wɔdze atoko paanoo enum no no mporoporoba a hɔn a wodzidzii no gyaae no hyɛɛ mbirefi duebien amaama.

¹⁴ Na nyimpa no hun asɛnkyerɛdze a ɔyɛe no, wɔkaa dɛ, Ampa, oyi nye nkɔnhyɛnyi a ɔreba wiadze no.

¹⁵ Na Jesus hun dɛ wɔreba abɛfa no ahyɛ no dze no ekedzi hen ntsi, ɔno nko twee noho kɔr koko no do bio.

Jesus Nantseew Po enyi

¹⁶ Na odur ewimbir no, n’esuafo no kɔr mpoano;

¹⁷ na wɔkɔr hɛn mu twaa po no dɛ wɔrokɔ Karpernaum. Nna sum agye, naaso Jesus nnyae mmbaa hɔn nkyɛn,

¹⁸ na po no hurii wɔ mframa kɛse a ɔbɔe no ntsi.

¹⁹ Na wɔkwaan bɛyɛ akwansimba eduonu enum anaadɛ eduasa no, wohun Jesus dɛ ɔnam po no do, na ɔrotwe abɛn hɛn no, na wosuroi.

²⁰ Na ɔsee hɔn dɛ, Mara a, mma hom nnsuro.

²¹ Afei ɔbaa hɔ nkyɛn wɔ hɛn no mu, na ntsɛmara na hɛn no dur asaase a wɔrokɔ do no do.

Nkorɔfo Pii Hwehwɛɛ Jesus

²² Adze kyee no, nyimpadodow a wogyinagyina po no egya no hun dɛ hɛn nnyi hɔ dɛ kor pɛr, naaso Jesus annka n’esuafo no ho annkɔ hɛn no mu, na n’esuafo nko na wɔkɔree.

²³ Na ahɛn bi fii Tiberias baa mbrɛ Ewuradze daa ase na wodzii paanoo wɔ hɔ no.

²⁴ Ntsi nyimpadodow no hun dɛ Jesus nnyi hɔ na n’esuafo so nnyi hɔ no, hɔn so wɔkɔr hɛn mu na wɔbaa Karpernaum bɔhwehwɛɛ Jesus.

Jesus Nye Nkwa Paanoo no

²⁵ Na wobohun no wɔ po no egya no, wobisaa no dɛ, Rabae, aber bɛn na ebaa ha?

²⁶ Jesus buaa hɔn dɛ, Meka no nokwar mu kyerɛ hom dɛ, Nnyɛ hom hun nsɛnkyerɛdze ntsi na hom rohwehwɛ me, na mbom hom dzii paanoo na hom mee no ntsi a.

²⁷ Mma hom nnyɛ edwuma wɔ edziban a ɔsɛɛ ho, na mbom hom nyɛ wɔ edziban a ɔtsena hɔ kodu onnyiewiei nkwa mu a nyimpa Ba dze bɛma hom no ho; na ɔno na Egya Nyankopɔn asɔw n’ano.

²⁸ Na wobisaa no dɛ, Ebɛnadze na yɛnyɛ na yaayɛ Nyankopɔn ndwuma?

²⁹ Jesus buaa hɔn dɛ, Iyi nye Nyankopɔn edwuma, dɛ hom bɛgye nyia ɔnoara somaa no no edzi.

³⁰ Na wobisaa no dɛ, Asɛnkyerɛdze bɛn na ebɛyɛ ma yeehu na yaagye wo edzi? Ebɛn edwuma na ereyɛ?

³¹ Hɛn egyanom dzii manna no wɔ sar no do, dɛ mbrɛ wɔakyerɛw no dɛ, Ɔmaa hɔn paanoo fi sor ama woeedzi.

³² Na Jesus see hɔn dɛ, Meka no nokwar mu kyerɛ hom dɛ, Nnyɛ Moses na ɔmaa hom paanoo a ofi sor no, na m’Egya na ɔma hom paanoo papa a ofi sor no;

³³ na Nyankopɔn paanoo nye nyia ofi sor sian ba na ɔma wiadze nkwa no.

³⁴ Nna wɔsee no dɛ, Ewuradze, ma hɛn paanoo yi bi daa.

³⁵ Jesus see hɔn dɛ, Emi nye nkwa paanoo no: nyia ɔba mo hɔ no, ɔkɔm nnkɛdze no da, na nyia ɔgye me dzi no nsukɔm nnkɛdze no da.

³⁶ Na mesee hom dɛ, Hom ehu me naaso hom nngye nndzi.

³⁷ Dza Egya no dze ama me biara bɛba mo hɔ; na nyia ɔbɛba mo hɔ no moronntow no nnkyen da,

³⁸ osiandɛ mifi sor sianee bae, nnyɛ dɛ merebɛyɛ mankasa me pɛ, na mbom nyia ɔsomaa me no ne pɛ a.

³⁹ Na iyi nye nyia ɔsomaa me no ne pɛ, dɛ dza ɔdze ama me nyina mennkɛyew no mu hwee, na mebɛma no do wɔ da a odzi ekyir no mu.

⁴⁰ Na iyi nye m’Egya ne pɛ, dɛ obiara a ɔhwɛ Ba no na ɔgye no dzi no, onnya onnyiewiei nkwa, na mebɛma no do wɔ da a odzi ekyir no mu.

⁴¹ Nna Jewfo no hwinhwinii wɔ no ho dɛ ɔkaa dɛ, Emi nye paanoo a ofi sor sianee bae no,

⁴² na wɔsee dɛ, Ana nnyɛ oyi nye Jesus, Josef ne ba a yenyim n’egya nye ne na no? Na ɔyɛ dɛn na afei ɔse dɛ, Mesian efi sor aba yi?

⁴³ Jesus buae na ɔsee hɔn dɛ, Mma hom nnhwinhwin hom mu.

⁴⁴ Obiara nntum mmba mo hɔ, gyedɛ Egya no a ɔsomaa me no twe no, na mebɛma no do wɔ da a odzi ekyir no mu.

⁴⁵ Wɔakyerɛw wɔ Nkɔnhyɛfo no mu dɛ, Na hɔn nyina Nyankopɔn bɛkyerɛkyerɛ hɔn. Obiara a ɔatse wɔ Egya no nkyɛn na oesua no, ɔba mo hɔ.

⁴⁶ Nnyɛ dɛ obiara ehu Egya no, gyedɛ nyia ofi Nyankopɔn nkyɛn no, ɔno na oehu Egya no.

⁴⁷ Nokwar nye iyi, mese hom dɛ, nyia ɔgye dzi no wɔ onnyiewiei nkwa.

⁴⁸ Emi nye nkwa paanoo no.

⁴⁹ Hom egyanom dzii manna no wɔ sar no do na wowuwui;

⁵⁰ iyi nye paanoo a ofi sor sian ba no, ama nyimpa eedzi bi na oeennwu.

⁵¹ Emi nye paanoo tseasenyi a ofi sor sianee bae no; sɛ obi dzi paanoo yi bi a, ɔbɛtsena ase daa; na ampaara paanoo a medze bɛma nye mo honam wɔ wiadze nkwa ntsi.

⁵² Na Jewfo no bisabisaa hɔn ho dɛ, Ɔbɛyɛ dɛn na dɛm nyimpa yi botum dze no honam ama hɛn ma yeedzi?

⁵³ Jesus see hɔn dɛ, Meka no nokwar mu kyerɛ hom dɛ, sɛ hom enndzi nyimpa Ba no honam na hom annom no bɔgyaa a, hom nnyi nkwa wɔ hom mu.

⁵⁴ Nyia odzi mo honam na ɔnom mo bɔgyaa no, ɔwɔ onnyiewiei nkwa, na da a odzi ekyir no mu mebɛma no do.

⁵⁵ Na mo honam yɛ edziban ampa, na mo bɔgyaa yɛ anondze ampa.

⁵⁶ Nyia odzi mo honam na ɔnom mo bɔgyaa no na ɔtse mo mu, na mo so metse no mu.

⁵⁷ Dɛ mbrɛ Egya tseasenyi no somaa me, na mudua Egya no do metse ase no, nyia odzi mo honam no, nankasa so bodua mo do atsena ase.

⁵⁸ Iyi nye paanoo a ofi sor sianee bae no: nnyɛ dɛ mbrɛ hom egyanom dzii manna no na wowuwui no; nyia obedzi paanoo yi no, ɔbɛtsena ase daa.

⁵⁹ Ɔkaa asɛm yi wɔ ber a nna ɔrekyerɛkyerɛ wɔ Karpernaum nhyiamudan mu no.

Onnyiewiei Nkwa ho Asɛm

⁶⁰ Dɛm ntsi n’esuafo pii tsee no, wɔsee dɛ, Asɛm yi yɛ dzen: woana botum etsie?

⁶¹ Na Jesus tsee wɔ nankasa no mu dɛ n’esuafo no ruhwinhwin asɛm no ho no, ɔsee hɔn dɛ, Ana iyi yɛ hom fintsidua?

⁶² Na afei sɛ hom hu nyimpa Ba no dɛ ɔrofow kɔ sor mbrɛ nkan no ɔwɔ no dze ɛ?

⁶³ Sunsum nye dza ɔma nkwa, mfaso biara nnyi honam mu: nsɛm a maka akyerɛ hom no yɛ sunsum, na ɔyɛ nkwa.

⁶⁴ Na hom mu binom wɔ hɔ a wɔnngye nndzi. Nna Jesus nyim hɔn a wɔnngye no nndzi no fitsi ahyɛse no ara na nyia obeyi no ama no so.

⁶⁵ Na ɔsee dɛ, Iyi ntsi na mase hom dɛ obi nntum mmba mo hɔ gyedɛ Egya no ma no kwan ana.

⁶⁶ Ofi iyi do no, n’esuafo no pii saan ekyir, na wɔnnye no annantsew bio.

⁶⁷ Dɛm ntsi Jesus bisaa duebien no dɛ, Ana hom so hom pɛ dɛ hom kɔ a?

⁶⁸ Simon Peter buaa no dɛ, Ewuradze, woana hɔ na yɛbɔkɔ? Ɔwo na ewɔ onnyiewiei nkwa ho nsɛm;

⁶⁹ na hɛn dze, yɛagye edzi na yenyim dɛ ɔwo nye Nyankopɔn no Hotseweenyi no.

⁷⁰ Jesus buaa hɔn dɛ, Ana nnyɛ emi na mepaa hom duebien yi? Naaso hom mu baako yɛ abɔnsam.

⁷¹ Nna Judas, Simon Iskariot ne ba no, na ɔreka no ho asɛm no: na ɔno na oribeyi no ama; eso ɔyɛ duebien no mu baako.