John 4 - BAEBOR

Jesus na Samarianyi Ɔbaa no

¹ Afei Jesus hun dɛ Farisiifo no atse dɛ ɔno Jesus rinya esuafo pii na orunuma nyimpa sen John no

² (naaso Jesus nankasa ennuma na n’esuafo a),

³ ofii Judea na osii mu kɔr Galilii bio.

⁴ Nna otwar dɛ ɔfa Samaria.

⁵ Na afei okodur Samaria kurow bi a wɔfrɛ no Sikaar a ɔbɛn asaase a Jakob dze kyɛɛ ne ba Josef no ho;

⁶ nna Jakob bura so wɔ hɔ. Nna Jesus aberɛ wɔ n’akwantu mu ntsi, ɔtsenaa bura no do dɛmara; bɛyɛ ewiaber duebien no.

⁷ Na ɔbaa bi a ofi Samaria bae bɔtoow nsu. Jesus see no dɛ, Ma me bi monnom.

⁸ (Nna n’esuafo no kɔ kurow mu rokɔtɔ edziban.)

⁹ Na Samarianyi ɔbaa no see no dɛ, Ɔyɛ dɛn na ɔwo a eyɛ Jewnyi ibisa emi a meyɛ Samarianyi ɔbaa hɔ nsu anom? (Ɔkaa dɛm osiandɛ nna Jewfo nye Samariafo nnka.)

¹⁰ Jesus buae see no dɛ, Sɛ inyim Nyankopɔn akyɛdze no, nye nyia ɔse wo dɛ, Ma me bi monnom yi a, nkyɛ ibebisa no ma ɔaama wo nkwa nsu.

¹¹ Ɔbaa no see no dɛ, Owura, Innyi adze a edze rotow, na bura no mu so dɔ; hen koraa na ibenya nkwa nsu no?

¹² Ana ɔwo eso kyɛn hɛn egya Jakob a ɔkyɛɛ hɛn bura yi, na nankasa nye ne mba nye no mbowa noom bi?

¹³ Jesus buae see no dɛ, Obiara a ɔbɔnom nsu yi bi no, nsukɔm bɛdze no bio.

¹⁴ Na nyia ɔbɔnom nsu a mebɛma no no, nsukɔm nnkɛdze no da, na nsu a mebɛma no no bɛyɛ no mu nsubura a opuw nsu kɔ onnyiewiei nkwa mu.

¹⁵ Ɔbaa no see no dɛ, Ma me dɛm nsu yi ɛ, amma nsukɔm anndze me ma mammba ammbɔtow nsu yi bi.

¹⁶ Jesus see no dɛ, Kɔ kɛfrɛ wo kun na bra ha.

¹⁷ Ɔbaa no buae see no dɛ, Minnyi kun. Jesus see no dɛ, Aka no yie dɛ, Minnyi kun:

¹⁸ na nye mbanyin beenum atsena; na nyia enye no wɔ hɔ sesei yi mpo, ɔnnyɛ wo kun bi a; iyi dze, aka no nokwar ankasa.

¹⁹ Ɔbaa no see no dɛ, Mo wura, muhu dɛ eyɛ nkɔnhyɛnyi.

²⁰ Hɛn egyanom sɔree wɔ bepɔw yi do, na hom dze, hom se dɛ Jerusalɛm nye bea a ɔsɛ dɛ nyimpa sɔr wɔ hɔ.

²¹ Jesus see no dɛ, Ɔbaa, gye me dzi dɛ dɔn no reba a nnyɛ bepɔw yi do, eso nnyɛ Jerusalɛm na hom bɔsɔr Egya no.

²² Hom sɔr dza hom nnyim; hɛn dze, yɛsɔr dza yenyim, osiandɛ nkwagye fi Jewfo mu.

²³ Na dɔn no reba, na oenya edu, dɛ hɔn a wɔsɔr nokwar mu no bɔsɔr Egya no wɔ sunsum nye nokwar mu: na iyinom dɛm na Egya no rohwehwɛ dɛ hɔn a wɔsɔr no no yɛ.

²⁴ Nyankopɔn yɛ sunsum, na hɔn a wɔsɔr no no, ɔsɛ dɛ wɔsɔr no wɔ sunsum nye nokwar mu.

²⁵ Ɔbaa no see no dɛ, Minyim dɛ Messia no (a wɔfrɛ no Kraest no) reba; na ɔnodze, sɛ ɔba a, ɔbɛpaa mu aka adze nyina akyerɛ hɛn.

²⁶ Jesus buaa no dɛ, Emi a menye wo rekasa yi, emi nye ɔno.

²⁷ Na ha yi na n’esuafo no bae; na ɔyɛɛ hɔn ahobow dɛ ɔnye ɔbaa no rekasa, naaso obi emmbisa no dɛ, Erohwehwɛ ebɛnadze, anaa, Ɔyɛ dɛn na enye no rekasa yi?

²⁸ Na ɔbaa no gyaa n’ehina no hɔ na osii mu kɔr kurow no mu, na ɔsee kuromba no dɛ,

²⁹ Hom mbra mbɔhwɛ nyimpa bi a ɔaka dza mayɛ nyina akyerɛ me. Ana nnyɛ oyi nye Kraest no bi a?

³⁰ Nna nyimpa fii kurow no mu dɛ wɔreba ne nkyɛn.

³¹ Na ne ntamu no, n’esuafo no see no dɛ, Rabae, dzidzi.

³² Na obuaa hɔn dɛ, Mowɔ edziban midzi a hom nnyim.

³³ Dɛm ntsi n’esuafo no sesee hɔnho dɛ, Ana obi abrɛ no biribi ma oedzi?

³⁴ Jesus see hɔn dɛ, M’edziban nye dɛ meyɛ nyia ɔsomaa me no pɛ na muwie n’edwuma.

³⁵ Ana hom nnka dɛ aka abosoom anan na twaber edu? Hwɛ! Mese hom dɛ, Hom mma hom enyi do nhwɛ nhaban no, dɛ oenya ahoa dze kyerɛ dɛ edu twaber.

³⁶ Na nyia otwa no gye akatua na ɔboaboa aba no ano kɔ onnyiewiei nkwa mu, na nyia oduae nye nyia otwae nyina aabɔ mu edzi dɛw.

³⁷ Na iyi mu asɛm no yɛ nokwar dɛ obi dua na obi twa.

³⁸ Mosomaa hom dɛ hom nkotwa dza hom nnyɛɛ ho edwuma; binom aberɛ hɔnho ayɛ, na hom dze, hom ebedzi hɔn edwuma mu aba.

³⁹ Na Samariafo a wɔwɔ kurow yi mu dodowara gyee no dzii wɔ dase a ɔbaa no dzii dɛ, Ɔaka dza mayɛ nyina akyerɛ me no ntsi.

⁴⁰ Dɛm ntsi Samariafo baa ne nkyɛn no, wɔserɛɛ no dɛ ɔnye hɔn ntsena. Na ɔtsenaa hɔ nda ebien.

⁴¹ Na nyimpa dodow a ɔkyɛn nkan no gyee no dzii wɔ n’asɛm ntsi,

⁴² na wɔsee ɔbaa no dɛ, Afei nnyɛ w’asɛm ntsi na yɛgye dzi, na hɛnankasa so yɛatse na yenyim dɛ oyi nye wiadze Agyenkwa no.

Jesus Sa Ɔpanyin bi ne ba Yar

⁴³ Na nda ebien twaa mu no, ofii hɔ sii mu kɔr Galilii.

⁴⁴ Na Jesus noara gyee dase dɛ nkɔnhyɛnyi nnyi enyidzi wɔ nankasa no kurow mu.

⁴⁵ Na odur Galilii no, Galiliifo gyee no too mu, osiandɛ wohun dza ɔyɛe wɔ Jerusalɛm wɔ afahyɛ no ase nyina; osiandɛ hɔn so kɔr afahyɛ no ase bi.

⁴⁶ Na Jesus baa Kaana a ɔwɔ Galilii mbrɛ ɔdaan nsu wenyin no bio. Na ahenkowaa panyin bi wɔ hɔ a ne ba yar wɔ Karpernaum.

⁴⁷ Na ɔtsee dɛ Jesus fi Judea aba Galilii no, ɔkɔr ne nkyɛn kɛserɛɛ no dɛ ɔmbra mbɛsa ne ba no yarba, na ɔreyɛ ewu.

⁴⁸ Na Jesus see no dɛ, Sɛ hom ennhu nsɛnkyerɛdze nye anwanwadze a, hom nnkɛgye edzi da.

⁴⁹ Ɔpanyin no see no dɛ, Mo wura, Sian bra ansaana me ba no ewu.

⁵⁰ Jesus kaa kyerɛɛ no dɛ, Kɔ, wo ba no atse apɔw. Na nyimpa no gyee asɛm a Jesus kaa kyerɛɛ no no dzii, na ɔkɔree.

⁵¹ Na ɔresan akɔ no, no nkowaa behyiaa no kaa dɛ ne ba no atse apɔw.

⁵² Na obisaa hɔn dɔn kor a no ho hyɛɛ ase yɛɛ no dzen; na wɔsee no dɛ, Ndeda ewiaber dɔnkor no mu na papu no gyaae.

⁵³ Na egya no hun dɛ dɔn no ara a Jesus see no dɛ, Wo ba no atse apɔw no mu a, na ɔgyee dzii, ɔno nye ne fifo nyina.

⁵⁴ Iyi so nye asɛnkyerɛdze a otsia ebien a Jesus fi Judea baa Galilii no ɔyɛe.