John 3 - BAEBOR

Jesus na Nikodemɔs

¹ Nna nyimpa bi fi Farisiifo no mu wɔ hɔ a ne dzin dze Nikodemɔs a ɔyɛ Jewfo panyin bi;

² ɔnoara na ɔbaa Jesus nkyɛn anadwe, na ɔbɛsee no dɛ, Rabae, yenyim dɛ ifi Nyankopɔn nkyɛn na aba dɛ kyerɛkyerɛnyi; osiandɛ obi nntum nnyɛ nsɛnkyerɛdze a eyɛ yi, gyedɛ Nyankopɔn ka no ho.

³ Jesus buae see no dɛ, Meka no nokwar mu kyerɛ wo dɛ, Sɛ wɔannwo nyimpa fofor a, orunntum nnhu Nyankopɔn ahenman no.

⁴ Nikodemɔs kaa kyerɛɛ no dɛ, Ɔbɛyɛ dɛn na nyimpa a oenyin no, wobotum awo no bio? Obotum akɔ ne na yamu bio ma wɔasan awo no anaa?

⁵ Jesus buaa dɛ, Meka no nokwar mu pefee kyerɛ wo dɛ, Sɛ woemmfi nsu nye Sunsum mu annwo nyimpa a, orunntum nnhɛn Nyankopɔn ahenman mu.

⁶ Nyia wofi honam mu awo no no, ɔyɛ honam; na nyia wofi Sunsum mu awo no no, ɔyɛ Sunsum.

⁷ Mma ɔnnyɛ wo nwanwa dɛ mese wo dɛ, Otwar dɛ wɔwo hom fofor.

⁸ Mframa bɔ wɔ mbrɛ ɔpɛ, na etse ne ndze, naaso innyim mbrɛ ofi ba, na mbrɛ ɔkɔ. Mbrɛ obiara a wofi Sunsum mu awo no tse nye no.

⁹ Nikodemɔs bisaa no dɛ, Yinom besi dɛn ayɛ hɔ?

¹⁰ Jesus buaa no dɛ, Ana eyɛ Israel kyerɛkyerɛnyi na innyim yinom yi?

¹¹ Ampaara, mese wo dɛ, yɛka dza yenyim na yedzi dza yeehu ho dase; na hom nngye hɛn dasee no nndzi.

¹² Sɛ meka hom asaase afamu ndzɛmba na hom nngye nndzi a, ɔbɛyɛ dɛn na sɛ meka ɔsor ndzɛmba kyerɛ hom a, hom bɛgye edzi.

¹³ Na obi mmfoow sor, gyedɛ nyia ofi sor sianee no, mekyerɛ, nyimpa Ba no a.

¹⁴ Na dɛ mbrɛ Moses maa ɔwɔ no do wɔ sar no do no, dɛmara so na otwar dɛ wɔma nyimpa Ba no do,

¹⁵ ama obiara a ɔgye no dzi no eenya onnyiewiei nkwa.

¹⁶ Na mbrɛ Nyankopɔn sii dɔɔ wiadze nye yi, dɛ ɔdze ne Ba a ɔwoo no kor no mae, ama obiara a ɔgye no dzi no aannhera, na oeenya onnyiewiei nkwa.

¹⁷ Na Nyankopɔn annsoma ne Ba wɔ wiadze dɛ ombobu wiadze atsɛn, na dɛ wondua no do ngye wiadze nkwa.

¹⁸ Nyia ɔgye no dzi no, wommbu no atsɛn; nyia ɔnngye no nndzi no, woebu no atsɛn dada; osiandɛ ɔnngyee Nyankopɔn ne Ba kortsee no ne dzin nndzii.

¹⁹ Na iyi nye atsɛmbu no, dɛ kan no aba wiadze, na nyimpa adɔ sum akyɛn kan no; osiandɛ hɔn ndwuma yɛ bɔn.

²⁰ Na obiara a ɔyɛ dza ɔmmfata no, okyir kan, eso ɔmmba kan no ho, amma woeennyi no atsɛn wɔ no ndwuma ho.

²¹ Na nyia ɔyɛ nokwar no, ɔba kan no ho, ma no ndwuma aada edzi dɛ Nyankopɔn mu na ɔayɛ.

Jesus na John

²² Iyi ekyir no Jesus nye n’esuafo baa Judea asaase do, na ɔnye hɔn tsenaa hɔ, na onumae.

²³ Nna John so runuma wɔ Aenon a ɔbɛn Salim, osiandɛ nsu pii wɔ hɔ; na binom baa hɔ ma onumaa hɔn.

²⁴ Nna wonnyae mmfaa John nntoo efiadze.

²⁵ Na ekyingyegye bi baa John n’esuafo nye Jewnyi bi afamu a ɔfa ahoguar ho.

²⁶ Na wɔbaa John nkyɛn bɛsee no dɛ, Rabae, nyia ɔkaa wo ho wɔ Jordan egya no a egyee no ho dase no, hwɛ, ɔno so runuma na nyimpa nyina reba no hɔ.

²⁷ John buae na ɔsee dɛ, Nyimpa runntum nnya biribi, gyedɛ wɔdze fi sor ma no.

²⁸ Homankasa gye me dase dɛ mekaa dɛ, Nnyɛ emi nye Kraest no, na wɔsomaa me dzii n’enyim.

²⁹ Nyia ɔwɔ ayefor no nye ayeforkun; na ayeforkun ne nyɛnko a ogyina hɔ na otsie no, n’enyi gye kɛse wɔ ayeforkun no ne ndze ntsi; afei na m’enyigye yi ahyɛ ma.

³⁰ Ɔno dze, otwar dɛ ɔkɔ kan kyɛn me, na emi dze, midzi ekyir.

Nyia Ofi Sor Ba no

³¹ Nyia ofi sor bae no kyɛn nyimpa nyina; nyia ofi famu no, ɔyɛ famunyi, na ɔkasa dɛ famunyi. Nyia ofi sor bae no kyɛn nyimpa nyina;

³² dza oehu na ɔatse no na ɔgye ho dase, na obiara nngye ne dasee nndzi.

³³ Nyia ɔagye ne dase no, ɔasɔw ano dɛ Nyankopɔn yɛ nokwafo.

³⁴ Na nyia Nyankopɔn somaa no no, ɔka Nyankopɔn ne nsɛm, na Nyankopɔn dze Sunsum no ma no mbordo.

³⁵ Egya no dɔ Ɔba no, na ɔdze ndzɛmba nyina ahyɛ ne nsa.

³⁶ Nyia ɔgye Ɔba no dzi no, ɔwɔ onnyiewiei nkwa; na nyia onndzi Ɔba no n’asɛm do no dze, orinnya nkwa, na Nyankopɔn n’ebufuw wɔ no do.