John 13 - BAEBOR

Jesus Hohor N’esuafo no Anan ho

¹ Na ansaana apaho afahyɛ no rubodu no, Jesus nyim dɛ no dɔn edu dɛ oribefi wiadze yi mu akɔ Egya nkyɛn no, ɔdɔɔ nankasa nedze a wɔwɔ wiadze no, ɔdɔɔ hɔn kesii ewiei.

² Na woridzidzi no, na abɔnsam enya dze ahyɛ Judas Iskariot, Simon ne ba no, n’akoma mu dɛ onkeyi no mma,

³ na Jesus nyim dɛ Egya no dze ndzɛmba nyina ahyɛ ne nsa, na dɛ ofi Nyankopɔn nkyɛn bae, na ɔrokɔ Nyankopɔn nkyɛn no,

⁴ ɔsoɛree fiir edzidzi na oyii ne ntar guu nkyɛn, na ɔfaa entuho bɔɔ n’asen do.

⁵ Na afei ohuee nsu guu guarsɛn mu, na ɔhyɛɛ ase hohoor n’esuafo no anan ho, na ɔdze entuho no a ɔbɔ n’asen no pepae.

⁶ Na obodur Simon Peter do. Na Peter see no dɛ, Ewuradze, ɔwo rohohor emi m’anan ho?

⁷ Jesus buaa no dɛ, Dza mereyɛ yi, sesei dze enntse ase, na daakye na ibohu.

⁸ Peter see no dɛ, Ennkɔhohor m’anan ho da! Jesus buaa no dɛ, Sɛ mannhohor wo ho a, innyi m’afa.

⁹ Simon Peter see no dɛ, Ewuradze, nnyɛ m’anan nko, na me nsa nye me tsir ho so.

¹⁰ Jesus see no dɛ, Nyia oeguar no nnhia eguar bio, gyedɛ n’anan ho hohor, na no ho nyina efir. Na hom ho efir, na mbom nnyɛ hom nyina.

¹¹ Nna onyim nyia oribeyi no ama: dɛm ntsi na ɔsee dɛ, Nnyɛ hom nyina na hom ho efir no.

¹² Na owiee hɔn anan ho hohor, na ɔfaa n’atar na ɔtweer hɔ bio no, ɔsee hɔn dɛ, Hom ehu dza mayɛ hom yi?

¹³ Hom frɛ me Kyerɛkyerɛfo nye Ewuradze, na hom ka no yie, osiandɛ meyɛ dɛm so.

¹⁴ Na sɛ emi, Kyerɛkyerɛfo nye Ewuradze, mahohor hom anan ho a, hom so ɔsɛ dɛ hom hohor hom anan ho nkorkor.

¹⁵ Na mama hom mfatoho, ama hom so aayɛ dɛ mbrɛ mayɛ hom yi.

¹⁶ Mese hom nokwar mu dɛ, akowaa nnkyɛn no wura, eso ɔsomafo nnkyɛn nyia ɔsomaa no no.

¹⁷ Sɛ hom nyim yinom na hom dzi do a, nhyira aka hom.

¹⁸ Mennka no wɔ hom nyina ho: minyim hɔn a mapa hɔn; na dɛ kyerɛw no bɛba mu dɛ, Nyia ɔnye me dzidzi no na ɔama n’anantsir do etsia me no.

¹⁹ Afei mereka akyerɛ hom ansaana aba mu, na sɛ ɔba mu a, hom aagye edzi dɛ emi nye no.

²⁰ Mese hom nokwar mu dɛ, Nyia ɔgye obiara a mosoma no no, ɔgye me; na nyia ɔgye me no, ɔgye nyia ɔsomaa me no.

Jesus Ka Dɛ Wobeyi No Ama

²¹ Jesus kaa dɛm no, no sunsum ho guaan no, na ɔgyee dase dɛ, Mereka no nokwar mu akyerɛ hom dɛ, Hom mu baako beyi me ama.

²² Esuafo no hwehwɛɛ hɔn enyim nkorkor, naaso woennhu nyimpa kor a ɔrekyerɛ.

²³ Nna esuafo no mu baako a Jesus dɔɔ no no twer no bo mu.

²⁴ Dɛm ntsi Simon Peter too ne nsa dɛ ombisa nyia ɔreka no ho asɛm no.

²⁵ Na ɔpae tweer Jesus no bo mu no obisaa no dɛ, Ewuradze, woana a?

²⁶ Jesus buaa dɛ, Ɔno nye nyia medze trɔma bɔbɔ mu ama no no. Na ɔdze trɔma no bɔɔ mu no, ɔdze maa Judas Iskariot, Simon ne ba no.

²⁷ Na trɔma no ekyir no, nna Satan kɛhɛɛn no mu. Na Jesus see no dɛ, Dza ereyɛ no, yɛ no ntsɛm.

²⁸ Na hɔn a wɔtsetse pon no ho mu biara ennhu dza osian ntsi ma ɔsee no dɛm.

²⁹ Na binom dween dɛ Judas kitsa kotoku no ntsi na Jesus see no dɛ, Kɔtotɔ dza ohia hɛn sie afahyɛ no, anaadɛ ɔmfa biribi mma ehiafo.

³⁰ Na ɔno dze, ɔgyee trɔma no, ntsɛmara na opuei; nna ɔyɛ anafua.

Mbra Fofor no

³¹ Na opuei no, Jesus see dɛ, Afei wɔahyɛ nyimpa Ba no enyimnyam, na wɔahyɛ Nyankopɔn enyimnyam wɔ no mu.

³² Na Nyankopɔn so bɛhyɛ no enyimnyam wɔ nankasa no mu, na ɔbɛhyɛ no enyimnyam ntsɛm.

³³ Mbofra nkakramba, aka kakrabaabi na menye hom wɔ hɔ: hom bɔhwehwɛ me, na dɛ mbrɛ mesee Jewfo no dɛ, Mbrɛ morokɔ no, hom runntum hɔ ba no, dɛmara na mese hom so sesei.

³⁴ Mbrasɛm fofor na medze ma hom, dɛ hom ndodɔ homho nkorkor: dɛ mbrɛ madɔ hom no, hom so ndodɔ homho dɛmara.

³⁵ Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ ma homho nkorkor a.

Jesus Ka dɛ Peter Bɛpa no

³⁶ Simon Peter see no dɛ, Ewuradze, erokɔ hen? Jesus buaa dɛ, Mbrɛ morokɔ no irunntum mo do ka sesei, na ekyir no dze, ebɛka mo do.

³⁷ Peter see no dɛ, Ewuradze, ebɛnadze ntsi na murunntum wo do ka sesei: medze mo nkwa bɔto hɔ ama wo.

³⁸ Jesus bisaa no dɛ, Edze wo nkwa bɔto hɔ ama me? Meka no wɔ nokwar mu kyerɛ wo dɛ, Akokɔ rommbɔn mpo na apa me mprɛnsa.