John 11 - BAEBOR

Lazarus no Wu

¹ Nna ɔyarfo bi wɔ hɔ a wɔfrɛ no Lazarus a ofi Bɛtani, Mary nye no nuabaa Martha hɔn kurow mu.

² Mary a ɔdze ngohuam seraa Ewuradze na ɔdze ne tsinhwi pepaa n’anan ho no na no nuabanyin Lazarus yaree no.

³ Dɛm ntsi ne nkyerɛbaa no somae baa Jesus hɔ bɛsee no dɛ, Ewuradze, hwɛ, nyia edɔ no no yar.

⁴ Na Jesus tsee no ɔsee dɛ, Yarba yi nnyɛ wuyarba, na Nyankopɔn enyimnyam ntsi a, ama wɔnam do aahyɛ Nyankopɔn Ba no enyimnyam.

⁵ Nna Jesus dɔ Martha nye no nuabaa nye Lazarus,

⁶ naaso ber a ɔtsee dɛ ɔyar no ɔtsenaa mbrɛ ɔwɔ no ara ndaenu.

⁷ Nna n’ekyir no, ɔsee n’esuafo no dɛ, Hom mma yɛnkɔ Judea bio.

⁸ Esuafo no see no dɛ, Rabae, ɔnnkyɛree biara na Jewfo no hwehwɛɛ wo dɛ wobesiw wo abo, na erokɔ hɔ bio yi?

⁹ Jesus buaa dɛ, Ana nnyɛ ndɔnhwer duebien na ɔwɔ adzekyee mu? Sɛ obi nam ewia a, ommfintsiw, osiandɛ ohu wiadze yi kan no.

¹⁰ Na sɛ obi nam anadwe a, ofintsiw, osiandɛ kan nnyi no mu.

¹¹ Ɔkaa yinom ekyir no, ɔsee hɔn dɛ, Hɛn nyɛnko Lazarus ada, na morokɔ mekenyan no.

¹² Na esuafo no see no dɛ, Ewuradze, sɛ ɔada dze a, nna obenya nkwa.

¹³ Na Jesus dze, ɔkaa no wɔ no wu ho, na hɔn dze, wosusuu dɛ eregye w’ahom wɔ nda mu ho asɛm na ɔreka.

¹⁴ Nna Jesus kaa kyerɛɛ hɔn pefee dɛ, Lazarus ewu;

¹⁵ na ɔyɛ me dɛw wɔ hom ntsi dɛ minnyi hɔ, ama hom aagye edzi: naaso hom mma yɛnkɔ ne nkyɛn.

¹⁶ Na Tomas a wɔfrɛ no Ata no see ne mfɛfo esuafo no dɛ, Hom mma hɛn so yɛnye no nkɔ na yɛnye no eewu.

Jesus, Wunyan nye Nkwa no

¹⁷ Na Jesus bae no obohun dɛ Lazarus edzi ndaanan wɔ nda no mu dada.

¹⁸ Eso nna Bɛtani bɛn Jerusalɛm ho bɛyɛ akwansin ebien.

¹⁹ Nna Jewfo pii aba Martha nye Mary nkyɛn dɛ wɔrebɛma hɔn hyɛ dzen wɔ hɔn nua no ntsi.

²⁰ Martha tsee dɛ Jesus reba no, ɔkɔree kehyiaa no; na Mary dze, ɔkɔr do araa tsenaa fie hɔ.

²¹ Na Martha see Jesus dɛ, Ewuradze, sɛ ewɔ ha a, nkyɛ mo nuabanyin ennwu.

²² Na seseiara mpo, minyim dɛ biribiara a ibebisa Nyankopɔn no, Nyankopɔn dze bɛma wo.

²³ Jesus see no dɛ, Wo nuabanyin bɔsoɛr bio.

²⁴ Martha see no dɛ, Minyim dɛ da a odzi ekyir wunyan no mu, ɔbɔsoɛr.

²⁵ Jesus see no dɛ, Emi nye wunyan no nye nkwa no: nyia ɔgye me dzi no, owu mpo a, ɔbɛtsena ase,

²⁶ na obiara a ɔtse ase na ɔgye me dzi no, onnkowu da. Ana egye iyi dzi?

²⁷ Ɔsee no dɛ, Nyew, Ewuradze, magye edzi dɛ ɔwo nye Kraest no, Nyankopɔn Ba no a ɔreba wiadze no.

²⁸ Na ɔkaa dɛm no, osii mu kɔree kɛfrɛɛ no nuabaa Mary nsumaa mu dɛ, Kyerɛkyerɛfo no aba, na ɔfrɛ wo.

²⁹ Na ɔno so tsee no, ɔsoɛɛr ntsɛmara na ɔbaa ne nkyɛn.

³⁰ Nna Jesus nnyae mmbaa kurow no mu, na ɔwɔ mbrɛ Martha kehyiaa no hɔ no.

³¹ Na Jewfo a wɔnye no wɔ fie rekyekye no werɛ no hun Mary dɛ ɔasoɛr ntsɛm epue no, wodzii n’ekyir, nna wosusu dɛ ɔrokɔ nda no do ekosu wɔ hɔ.

³² Na Mary dze, odur mbrɛ Jesus wɔ no, na ohun no no, ɔhwee n’ananadze see dɛ, Ewuradze, sɛ ewɔ ha a, nkyɛ mo nuabanyin ennwu.

³³ Na Jesus hun dɛ orusu na Jewfo a wɔnye no bae no so rusu no, osii nkrum wɔ no sunsum mu na ɔyɛɛ no awerɛhow,

³⁴ na ɔsee dɛ, Hom dze no ato hen? Wɔsee no dɛ, Ewuradze, bra bɔhwɛ.

³⁵ Na Jesus sui.

³⁶ Nna Jewfo no see dɛ, Hwɛ mbrɛ osi dɔ no.

³⁷ Na hɔn mu binom see dɛ, Oyi a obuee onyifuranyi no enyiwa no, oenntum amma dɛ nkyɛ oyi so orunnwu anaa?

³⁸ Na Jesus sii nkrum wɔ no mu bio, na ɔbaa nda no do: ɔbodan a, nna ɔbo hin ano.

³⁹ Jesus see dɛ, Hom nyi ɔbo no. Nyia owui no nuabaa Martha see no dɛ, Ewuradze, sesei dze ɔasɛɛ, na oedzi ndaanan.

⁴⁰ Jesus see no dɛ, Ana mannse wo dɛ, sɛ egye dzi a, ibohu Nyankopɔn enyimnyam?

⁴¹ Na woyii ɔbo no. Na Jesus maa n’enyiwa do na ɔsee dɛ, Egya, meda wo ase dɛ itsie me:

⁴² na emi dze, minyim dada dɛ itsie me daa, na nyimpadodow a wogyinagyina ho yi ntsi na mesee dɛm, ama wɔaagye edzi dɛ ɔwo na esomaa me.

⁴³ Na ɔkaa dɛm no, ɔdze ndze kɛse tseaa mu dɛ, Lazarus, pue bra!

⁴⁴ Nyia owui no puei bae: nna nda mu atam kyekyer ne nan nye ne nsa, na duukuu kyekyer n’enyim: na Jesus see hɔn dɛ, Hom nsan no, na hom mma ɔnkɔ.

Wɔfa Jesus ho Apam

⁴⁵ Na Jewfo no mu pii a wɔbaa Mary nkyɛn na wohun dza Jesus yɛe no, wɔgyee no dzii;

⁴⁶ na hɔn mu binom sii mu kɔr Farisiifo nkyɛn kɛkaa dza Jesus yɛe no kyerɛɛ hɔn.

⁴⁷ Na asɔfompanyin nye kyerɛwfo no maa wokehyiaa baguafo no, na wɔsee dɛ, Yɛreyɛ dɛn, na nyimpa yi reyɛ nsɛnkyerɛdze pii yi?

⁴⁸ Sɛ yegyaa no dɛm a, nyimpa nyina bɛgye no edzi, na Romefo afa hɛn bea nye hɛn man yi.

⁴⁹ Na hɔn mu baako bi, Kaiafas a odzi afe noara mu sɔfopanyin, see hɔn dɛ, Hom nnyim hwee,

⁵⁰ na eso hom nndwen dɛ oye ma hɛn dɛ nyimpa kor bowu ama ɔman no, na ɔman no nyina aannhyew a.

⁵¹ Na iyi, nnyɛ nankasa na ɔkae, na odzi afe noara mu sɔfopanyin ntsi, ɔhyɛɛ nkɔm dɛ Jesus rubowu ama ɔman no,

⁵² na nnyɛ ɔman no nko ntsi, na dɛ ɔrebɛka Nyankopɔn mba a wɔapetse nyina so abɔ mu ayɛ kor.

⁵³ Na ofitsi da no ara wɔfaa apam dɛ woboku no.

⁵⁴ Dɛm ntsi Jesus annantsew petee wɔ Jewfo no mu bio; na ofii hɔ kɔr asaase a ɔbɛn sar no ho no do, wɔ kurow a wɔfrɛ no Efraim mu, na ɔnye n’esuafo kɛtsenaa hɔ.

⁵⁵ Na Jewfo apaho no abɛn, na dodowara fiir asaase no do kɔr Jerusalɛm ansaana apaho no edu dɛ worukoguar hɔnho.

⁵⁶ Na wɔhwehwɛɛ Jesus, na wogyinaa asɔrfi no mu sesee hɔnho dɛ, Hom dwen dɛn? Ɔremmba afahyɛ yi ase anaa?

⁵⁷ Nna asɔfompanyin no nye Farisiifo no ahyɛ mbra dɛ, obi nyim mbrɛ ɔwɔ a, ɔnkɛkyerɛ ma wɔnkyer no.