John 10 - BAEBOR

Nguambuw ho Bɛ

¹ Mereka akyerɛ hom wɔ nokwar mu dɛ, Nyia onndua abowano nnkɔ nguambuw no mu, na ɔfow fa beebi no, ɔyɛ owifo nye odwotwafo;

² na nyia odua abowano kɔ mu no nye nguan no hwɛfo.

³ Ɔno na abowanohwɛfo no bue ma no, na nguan no tse ne ndze, na ɔbɔ nankasa no nguan dzin frɛ hɔn, na ɔdze hɔn pue.

⁴ Na sɛ ɔdze nankasa no nguan nyina pue a, odzi hɔn enyim, na nguan no dzi n’ekyir, osiandɛ wonyim ne ndze.

⁵ Na ɔnana dze, worinndzi n’ekyir, na woboguan efi ne nkyɛn, osiandɛ wonnyim anana ndze.

⁶ Abɛbusɛm yi na Jesus kaa kyerɛɛ hɔn, na hɔn dze, woennhu asɛm kor a Jesus reka kyerɛ hɔn no.

Jesus, Oguanhwɛfo Pa no

⁷ Dɛm ntsi Jesus see hɔn bio dɛ, Mereka no nokwar mu akyerɛ hom dɛ, emi nye nguan no abow no.

⁸ Hɔn a wodzii me kan bae no nyina yɛ ewifo nye edwotwafo; naaso nguan no enntsie hɔn.

⁹ Emi nye abow no; emi na sɛ obiara nam mo do kɔ mu a, wɔbɛgye no nkwa, na ɔbɔkɔ mu bopue, na obenya edzidzibea.

¹⁰ Owifo no mmba gyedɛ orubowia, na oeku, na ɔasɛɛ; emi dze, mebae ma woeenya nkwa, na woeenya no mbordo.

¹¹ Emi nye oguanhwɛfo pa no: oguanhwɛfo pa no dze no nkwa to hɔ ma nguan no.

¹² Naaso ɔpaanyi no a ɔnnyɛ oguanhwɛfo a nguan no yɛ nankasa nedze no, ohu dɛ pataku reba a, ogya nguan no hɔ na oguan; na pataku no ba bɔtotɔr hɔn na ɔbɔ hɔn petse.

¹³ Ɔpaanyi guan, osiandɛ ɔyɛ ɔpaanyi na ɔnndwen nguan no ho.

¹⁴ Emi nye oguanhwɛfo pa no: minyim medze, na medze nyim me,

¹⁵ dɛ mbrɛ Egya no nyim me na emi so minyim Egya no. Na medze mo nkwa to hɔ ma nguan no.

¹⁶ Na mowɔ nguan bi so a wommfi ban yi mu; hɔn so otwar dɛ medze hɔn meba, na wobetsie me ndze, na wɔaayɛ kuw kor nye oguanhwɛfo kor.

¹⁷ Dɛm ntsi na Egya no dɔ me, osiandɛ medze mo nkwa to hɔ na maafa no bio.

¹⁸ Obi nngye no me nsamu; na mbom mankasa na medze to hɔ: mowɔ tum dɛ medze to hɔ, na mowɔ tum dɛ mefa no bio. Ahyɛdze yi na minyaa no m’Egya hɔ.

¹⁹ Na mpaapaamu bi baa Jewfo no mu bio wɔ asɛm yi ntsi.

²⁰ Na hɔn mu pii see dɛ, Ɔwɔ abɔnsam, na ɔabɔ dam: ɔyɛ dɛn na hom ritsie no?

²¹ Binom see dɛ, Iyi nnyɛ nyia ɔwɔ abɔnsam ne nsɛm a. Aso abɔnsam botum ebue onyifuranyi enyiwa anaa?

Jewfo Poow Jesus

²² Nna asɔrfi ne ntsewho afahyɛ no edu wɔ Jerusalɛm: na awɔwber so aba.

²³ Nna Jesus nenam asɔrfi no mu wɔ Solomon abrandaa no mu.

²⁴ Na Jewfo no botwae hyiaa no, na wɔsee no dɛ, Ebɛma hɛn enyi ada kwan ekesi dabɛn bio? Sɛ ɔwo nye Kraest no a, ka kyerɛ hɛn pefee.

²⁵ Jesus buaa hɔn dɛ, Maka akyerɛ hom, na hom nngye nndzi; ndwuma a menam m’Egya ne dzin do meyɛ no, ɔnoara na odzi me dase.

²⁶ Na hom dze, hom nngye me nndzi, osiandɛ hom mmfi mo nguan mu.

²⁷ Mo nguan tsie me ndze, na minyim hɔn, na wodzi m’ekyir:

²⁸ na mema hɔn onnyiewiei nkwa, na wɔrennhera da, eso obi runnhwim hɔn wɔ me nsamu.

²⁹ M’Egya a ɔdze hɔn ama me no, ɔyɛ kɛse kyɛn adze nyina na obi nnkotum ehwim hɔn m’Egya ne nsamu.

³⁰ Emi nye Egya no yɛ kor.

³¹ Jewfo no faa abo bio dɛ wɔdze besiw no.

³² Jesus buaa hɔn dɛ, Ndwuma pa pii na mifi m’Egya nkyɛn dze akyerɛ hom: ndwuma yi mu dza ɔwɔ hen ntsi na hom ribesiw me abo yi?

³³ Jewfo no buaa dɛ, Nnyɛ edwuma pa bi ntsi na yeribesiw wo abo, na ebususɛm ntsi a; osiandɛ ɔwo a eyɛ nyimpa yi, eyɛ woho Nyankopɔn ntsi a.

³⁴ Jesus buaa hɔn dɛ, Ana wɔnnkyerɛwee wɔ hom mbra mu dɛ, Mekaa dɛ hom yɛ enyame?

³⁵ Sɛ ɔfrɛɛ hɔn a Nyankopɔn asɛm baa hɔn hɔ no enyame a, na kyerɛwsɛm no so wonntum nnsan no,

³⁶ ana hom tum ka wɔ nyia Egya no etu no esi hɔ na ɔasoma no wiadze no ho dɛ, Eka ebususɛm; osiandɛ mekaa dɛ, Emi nye Nyankopɔn Ba ntsi?

³⁷ Sɛ mennyɛ m’Egya ndwuma a, mma hom nngye me nndzi;

³⁸ na sɛ meyɛ a, kaansa hom nngye emi ara nndzi mpo a, hom ngye ndwuma no ndzi, ama hom aatse ase na hom eehu dɛ Egya no wɔ mo mu na mo so mowɔ no mu.

³⁹ Na wɔhwehwɛɛ bio dɛ wɔkyer no, na ofii hɔn nsamu kɔree.

⁴⁰ Na osii mu kɔr Jordan egya noho bio, mbrɛ nkan no nna John runuma no; na ɔkɛtsenaa hɔ.

⁴¹ Na dodowara baa ne nkyɛn, na wɔsee dɛ, John dze, ɔannyɛ asɛnkyerɛdze biara: na dza John kae wɔ oyi ho nyina yɛ nokwar.

⁴² Na dodowara gyee no dzii wɔ hɔ.