Ester 7 - BAEBOR

¹ Na ɔhen no na Haman baa dɛ wɔnye Ɔhembaa Ester robɔto pon.

² Na ɔhen no see Ester da a otsia ebien no mu so, wɔ nsa aponto no ho dɛ, Ɔhembaa Ester, w’adzeserɛ nye dɛn? Na wɔmfa mma wo: na w’ahwehwɛdze nye dɛn? Odu ahendzi yi ne fa mpo a, wɔbɛyɛ.

³ Nna ɔhembaa Ester buae see dɛ, Ɔhen, sɛ menya w’enyim enyimpa, na sɛ ɔhen pɛ a, ma wɔmfa mo nkwa mma me wɔ adzeserɛ yi do, na me man wɔ adzeserɛ yi do:

⁴ na wɔatɔn hɛn, emi na me man, dɛ wɔnsɛɛ hɛn, nkuku hɛn. Na sɛ wɔtontɔɔn hɛn yɛɛ nkowaa na mfonabaa a, nkyɛ mennkɛkasa, naaso ɔtamfo no runntum nnhyɛ ɔhen n’adze a ɔbɛsɛɛ no ananmu.

⁵ Nna ɔhen Ahasuerus buae see ɔhembaa Ester dɛ, Woana nye no, na hen na ɔwɔ, na n’akoma ara ahyɛ no mu ma dɛ ɔbɛyɛ dɛm no?

⁶ Na Ester see dɛ, Ɔyɛfo na ɔtamfo bi a, mekyerɛ Haman otsiɔdzennyi yi a. Nna Haman n’akoma tui wɔ ɔhen no na ɔhembaa no enyim.

⁷ Na ɔhen no soɛree wɔ n’ebufuw no mu fii nsa aponto no ho, na osii mu kɔr ahemfi ture no mu; na Haman soɛree gyinaa dɛ ɔrepa no nkwa ho kyɛw wɔ ɔhembaa Ester hɔ, osiandɛ ohun dɛ ɔhen no abɔ no ho pɔw bɔn.

⁸ Nna ɔhen no sanee fii ahemfie ture no mu baa beebi mbrɛ nsa pon no wɔ no; nna Haman ahwe adamu egua a Ester wɔ do no do. Nna ɔhen no see dɛ, Ana mpo orubotu ahyɛ ɔhembaa do so wɔ m’enyim wɔ ofi yi mu? Aber a asɛm no fii ɔhen no n’anomu puei ara, nna wɔkataa Haman n’enyim.

⁹ Nna Harbona, epiafo a wɔwɔ ɔhen no n’enyim no mu baako no, see dɛ, Eso hwɛ, dua a Haman ayɛ ama Modekai a ɔkaa ɔhen no ho asɛmpa no, osi Haman fie, ne tsentsen yɛ basafa eduonu enum. Na ɔhen no see dɛ, Hom nkɛsɛn no wɔ do.

¹⁰ Nna wɔsɛɛn Haman wɔ dua a oesiesie ama Modekai no do. Nna ɔhen no n’ebufuw ano dwee.