Ester 5 - BAEBOR

Ester Kɔ Ɔhen no Enyim

¹ Afei ɔbaa dɛ da a otsia ebiasa no, nna Ester hyɛɛ ahembaa ntar, na okegyinaa ahemfie fie afamu abanguado, wɔ ɔhen ne dan no ne tsentsendo.

² Na ɔbaa dɛ, aber a ɔhen no hun ɔhembaa Ester dɛ ogyina abangua no do no, nna onyaa n’enyim enyimnyam: na ɔhen no tseen sika ahempoma a ɔdze ne nsamu no kyerɛɛ Ester. Nna Ester twee pinii, na obosuoo ahempoma no ne tsir.

³ Na ɔhen no bisaa no dɛ, Ɔhembaa Ester, erohwehwɛ ebɛnadze? W’ebisadze nye dɛn? Na sɛ odu ahendzi no ne fa mpo a, wɔdze bɛma wo.

⁴ Na Ester see dɛ, Sɛ oye wɔ ɔhen enyi do a, wɔmma ɔhen na Haman mbra pon a moroto ama no ho ndɛ da yi.

⁵ Na ɔhen no see dɛ, Hom mma Haman mbra ntsɛm, na wɔnyɛ no dɛ mbrɛ Ester aka no. Nna ɔhen no na Haman baa pon a Ester ato no ho.

⁶ Na ɔhen no see Ester wɔ nsa aponto no ho dɛ, W’adzeserɛ nye dɛn? Na wɔmfa mma wo: na w’ahwehwɛdze nye dɛn? Odu ahendzi no ne fa mpo a, wɔbɛyɛ.

⁷ Nna Ester buae see dɛ, M’adzeserɛ na m’ahwehwɛdze nye dɛ;

⁸ sɛ menya ɔhen enyim enyimpa, na sɛ ɔhen pɛ dɛ ɔbɛma m’adzeserɛ, na ɔayɛ m’ahwehwɛdze a, wɔmma ɔhen na Haman mbra pon a morobɔto hɔn no ho, na ɔkyena mebɛyɛ dɛ mbrɛ ɔhen ase no.

Haman Hyehyɛ Dɛ Oboku Modekai

⁹ Nna da no Haman dze enyigye na akoma pa fiir edzi: na aber a Haman hun Modekai wɔ ɔhen no kuropon no mu, dɛ ɔannsoɛr enngyina, na eso oennhima noho amma no no, nna ebufuw hyɛɛ no ma wɔ Modekai ho.

¹⁰ Naaso Haman konkoom noho do, na osii mu kɔr ne fie, na ɔsomae ma wɔkɛfrɛfrɛɛ ne mfɛfo na ne yer Zeres ma wɔbae.

¹¹ Na Haman kaa n’ahonya enyimnyam, na ne mba dodow, na ndzɛmba nyinara a ɔhen no ayɛ no kɛse wɔ mu, na mbrɛ oesi na ɔama no do abɔ mbapɔmba na ɔhen no nkowaa no do no, kyerɛɛ hɔn.

¹² Nkyii so Haman see dɛ, Nyew, ɔhembaa Ester ɔamma nyimpa biara annka ɔhen ho ammba pon a ɔtoe no ho gyedɛ mara; na ɔkyena so oehyia emi na ɔhen wɔ ne nkyɛn.

¹³ Naaso iyi nyinara nndɔɔ so mma me, aber tsentsen ara a muhu Jewnyi Modekai no dɛ ɔtse ɔhen no kuropon mu yi.

¹⁴ Nna ne yer Zeres na ne mfɛfo no nyinara see no dɛ, Ma yɛnyɛ mbeamudua a ne tsentsen yɛ basafa eduonu enum, na ɔkyena anapa ka kyerɛ ɔhen ma wɔnsɛn Modekai wɔ do: na nkyii ɔwo nye ɔhen nkɔ aponto no ho enyigye mu. Na asɛm no yɛɛ Haman enyisɔ; na ɔmaa wɔyɛɛ dua no.