Efesofo 1 - BAEBOR

Nkyia

¹ Paul a ɔnam Nyankopɔn ne pɛ do yɛ Kraest Jesus no somafo dze nwoma yi kɛma ahotseweefo a wɔwɔ Efeso a wɔyɛ Kraest Jesus mu agyedzifo no.

² Adom nye asomdwee a ofi Nyankopɔn hɛn Egya nye Ewuradze Jesus Kraest no nka hom.

Sunsum mu Nhyira a Ɔwɔ Kraest mu

³ Nhyira nka hɛn Ewuradze Jesus Kraest ne Nyankopɔn nye n’egya a ɔdze sunsum mu nhyira nyina ehyira hɛn wɔ sorsor wɔ Kraest Jesus mu:

⁴ dɛ mbrɛ ɔnam ɔdɔ mu yii hɛn wɔ Kraest mu ansaana wɔrehyɛ wiadze ase, dɛ yɛnyɛ ahotseweefo nye hɔn a wonndzi dzɛm biara wɔ n’enyim no.

⁵ Oyii hɛn too hɔ dɛ ɔnam Jesus Kraest do bɛfa hɛn abayɛ ama noho dɛ mbrɛ ne pɛ enyisɔ tse,

⁶ ama woeeyi n’adom a ɔdze adom hɛn no Dɔba no mu no n’enyimnyam ayɛw.

⁷ Ɔnoara no mu na yɛnam no bɔgyaa do enya hɛn pon yi, mekyerɛ mfom mu fakyɛ a ɔnam n’adom ahonya do a.

⁸ Ɔama abor do ama hɛn wɔ nyansa nye nyimdzee nyina mu,

⁹ na oeyi ne pɛ n’esumasɛm akyerɛ hɛn dɛ mbrɛ n’enyisɔ a osusui wɔ ne tsirmu no tse.

¹⁰ Dɛ mber no aso pɛpɛɛpɛr a wɔbɛka ndzɛmba nyina abɔ mu kor wɔ Kraest mu, ɔyɛ ndzɛmba a ɔwɔ sorsor na asaase do nyinara.

¹¹ Ɔno Kraest no ara so mu na hɛn so yeenya egyapadze, dɛ mbrɛ nyia ɔnam ne pɛ apam do yɛ ndzɛmba nyina no, nam ne tsirmpɔw do hyehyɛe too hɔ;

¹² dɛ hɛn a hɛn enyi daa Kraest do kan no mbɛyɛ n’enyimnyam ho ayɛyi.

¹³ No mu so, na hom tsee nokwar asɛm no a ɔyɛ hom nkwagye ho asɛmpa no. Ɔnoara mu so na hom gyee dzii no, wɔdze Sunsum Krɔnkrɔn a wɔbɔɔ ho anohoba no a

¹⁴ ɔyɛ hɛn kyɛfa ho nsewhyɛdze no asɔw hom ano. Iyi nye ɔgye a ɔdze agye hɔn a wɔyɛ nankasa nedze no ama n’enyimnyam ayɛyi no.

Paul ne Mpaabɔ

¹⁵ Dɛm ntsi, mo so metsee Ewuradze Jesus mu gyedzi a ɔwɔ hom mu, nye ɔdɔ a hom dze dɔ ahotseweefo nyina no,

¹⁶ minngyaa dɛ meda ase wɔ hom ntsi, na mekaa hom wɔ me mpaabɔ mu.

¹⁷ Mobɔ mpaa dɛ hɛn Ewuradze Jesus Kraest ne Nyankopɔn no, enyimnyam Egya no, ɔmma hom nyansa nye nyikyerɛ sunsum wɔ no ho nyimdzee mu;

¹⁸ dɛ hom adwen enyi ntsew, na hom nhu ne frɛ no ho enyidado no, nye n’egyapadze enyimnyam ahonya wɔ ahotseweefo no mu.

¹⁹ Afei so, ɔmma hom nhu no tum kɛseyɛ mbordo a ɔwɔ hɛn a yɛgye dzi no do, dɛ mbrɛ no tum ahoɔdzen ndzeyɛe a

²⁰ ɔdze yɛɛ adze wɔ Kraest mu nyaan no fii ewufo mu no tse. Ɔdze no tsenaa n’enyimfa wɔ sorsor,

²¹ wɔ mpanyindzi, nye tumdzi, nye ahoɔdzen, nye ahendzi nyina do, nye dzin a wɔbɔ nyina do, nnyɛ wiadze mber yi mu nko, na mbom dza ɔreba no so mu.

²² Ɔabrɛ adze nyina adze aba n’ananadze, na ɔdze no ayɛ adze nyina do tsir ama asɔr no a

²³ ɔyɛ ne nyimpadua no, nyia ɔhyɛ adze nyina ma wɔ ndzɛmba nyina mu no n’amayɛ mu.