Daniel 8 - BAEBOR

Oguannyin Na Apɔnkye Ho Oyikyerɛ

¹ Ɔhen Belsazar n’ahendzi a otsia ebiasa no mu no, emi mara Daniel nyaa enyido adzehu bi wɔ kan dza woyii kyerɛɛ me no ekyir.

² Na muhunii wɔ enyido adzehu mu; dɛ, nna mowɔ Susan ahemfie a ɔwɔ Elam ɔmansin mu no mu; na mowɔ esutsen Ulai ho.

³ Nna memaa m’enyi do na hwɛ, oguannyin a ɔwɔ mmbɛn ebien gyina esu no ano: na mmbɛn ebien no wowar; na kor war sen kor, na dza ɔwar no na odzii ekyir firii.

⁴ Muhun oguannyin no dɛ ɔresesɛ kɔ anee, kwaamu na pomu afamu; na mbowa biara nntum nngyina n’enyim, eso obiara nnyi hɔ a otum gye obi fi ne nsamu; na ɔyɛɛ dɛ mbrɛ ɔpɛ na ohuhoor noho.

⁵ Na morodwendwen ho no, hwɛ, apɔnkyenyin fi anee nam asaase enyi bae, na no ho nnka famu: na apɔnkye no wɔ ambɛn kɛse bi a osi n’enyiwa ntamu.

⁶ Na ɔbaa oguannyin a ɔwɔ mmbɛn ebien a muhun no dɛ ogyina esutsen no ano no nkyɛn, na ɔdze n’ahoɔdzen ebufuhyew tutuu mbirika kɛhyɛɛ oguannyin no do.

⁷ Na muhun dɛ opiin oguannyin no nkyɛn, na n’enyi beer no do, na ɔsesɛɛ oguannyin no, na obubuu ne mmbɛn ebien no; na ahoɔdzen bi nnyi oguannyin no mu dɛ ɔdze begyina n’enyim; na ɔtoow no kyeen famu, na otsiatsiaa no do, na obi nnyi hɔ a otumii gyee oguannyin no fii ne nsamu.

⁸ Na apɔnkyenyin no huhoor noho mbordo: na ɔtraa do no, ambɛn kɛse no bui; na mmbɛn akɛse anan besisii ananmu kyerɛkyerɛɛ ɔsor mframa anan no do.

⁹ Na ambɛn kakraba kor bi fi hɔn mu firii a ɔyɛɛ kɛse mbordo kɔr pomu afamu, na boka afamu, na asaase fɛɛfɛw no no do.

¹⁰ Na ɔyɛɛ kɛse kɛpeem ɔsor dɔm mpo do; na ɔtoow dɔm no na nworaba no mu bi guguu famu, na otsiatsiaa hɔn do.

¹¹ Nyew, ɔmemaa noho do kodur dɔm no safohen no do mpo; na ɔgyee daa ɔhyew afɔr no fii ne nsamu, na wɔtoow no krɔnkrɔn bea no kyeen famu.

¹² Na wɔdze dɔm no kaa daa ɔhyew afɔr no ho maa no wɔ mbrato mu; na ɔtoow nokwar kyeen famu na ɔyɛɛ n’apɛdze na ɔyɛɛ prɔmprɔm.

¹³ Nna metsee dɛ ɔkrɔnkrɔnnyi bi rekasa; na ɔkrɔnkrɔnnyi fofor bi so see ɔbaako a ɔrekasa no dɛ, Dabɛn na daa ɔhyew afɔr na amamfoyɛ mbrato a wɔdze krɔnkrɔnbea na dɔm no maa dɛ wɔmfa anan ntsiatsia do no ho enyido adzehu no besi?

¹⁴ Na ɔsee me dɛ, Obekesi ewimbir na anapa mpem ebien ahaebiasa; ansaana wɔatsew krɔnkrɔnbea no ho.

Ɔbɔfo Gabriel Kyerɛ Oyikyerɛ No Ase

¹⁵ Na ɔbaa dɛ aber a emi mara Daniel morohwehwɛ dɛ mebɛtse ase; no, awerɛfir mu ara hwɛ, obi beyii noho gyinaa m’enyim dɛ banyin.

¹⁶ Na metsee nyimpa ndze wɔ Ulai nsu kɔn do ntamu a ɔfrɛe see dɛ, Gabriel, ma banyin yi ntse enyido adzehu no ase.

¹⁷ Nna ɔbɛɛn mbrɛ migyinae no; na ɔbae no, mobɔɔ hu, na medze m’enyim butuuw famu: na ɔsee me dɛ, Onyimpa ba, tse ase; na enyido adzehu no fa ewiei ber no ho.

¹⁸ Na ɔnye me rekasa no, motɔɔ nda heii, na osuoo mo mu, na ɔdze me gyinaa tsentsen.

¹⁹ Na ɔsee dɛ, Hwɛ, merema ehu dza ɔbɛba ekyir ebufuw ber no mu: na ɔfa ewiei ber a wɔahyɛ no ho.

²⁰ Oguannyin a ihunii a ɔwɔ mmbɛn ebien no, hɔn nye Media na Persia ahemfo

²¹ Na apɔnkyenyin wirikyee no nye Griisen: na ambɛn kɛse a osi n’enyiwa ntamu no ɔnye ɔhen a odzi kan.

²² Na dza obui a anan besisii ananmu no, ahendzi anan bɔsoɛr efi ɔman no mu, na no mu biara no tum nnkɔto kan dze no.

²³ Na hɔn ahendzi n’ekyir ber no a mbrato ewie mayɛ no, ɔhen a n’enyim yɛ hu a ɔtse nsɛm a no mu yɛ sum ase bɔsoɛr.

²⁴ Na no tum bɛyɛ dzen, naaso nnyɛ noara no tum a: na ɔbɛsɛɛ adze nwanwa na oedzi yie na ɔayɛ n’apɛdze: na ɔbɛsɛɛ ahoɔdzenfo na akrɔnkrɔmfo no.

²⁵ Na n’enyitsew ntsi ɔbɛma ndaadaa edzi yie wɔ ne nsamu; na ɔbɛmema noho do wɔ n’akoma mu, na hɔn sɔkyeeyɛ no mu, ɔbɛsɛɛ piinara: ɔbɔsoɛr etsia ahen mu hen no so; na ɔnodze wobobu no a wɔnndze nyimpa nsa.

²⁶ Na ewimbir ewimbir na anapa anapa enyido adzehu a wɔkae no, yɛ nokwar: na ɔwo dze, tow enyido adzehu no mu; na ɔfa mber pii a ɔreba ho.

²⁷ Na emi Daniel, adze bɔɔ mo do, na meyaar nda bi; nna mosoɛree, na meyɛɛ ɔhen n’edwuma: na enyido adzehu no yɛɛ me ahobow, na obiara anntse ase.