Daniel 7 - BAEBOR

Mbowa Anan No Ho Oyikyerɛ

¹ Babilɔnhen Belsazar n’afe a odzi kan mu no, Daniel soo daa na ohun enyido adzehu wɔ ne mpa do: nna ɔkyerɛɛw adaaso no na osii nsɛm no tam kae.

² Daniel kaa dɛ, Muhunii wɔ m’enyido adzehu mu anadwe, na, hwɛ, ɔsor mframa anan no tui bɔɔ po kɛse no do.

³ Na mbowa akɛse anan fi po no mu puei, ɔsor kor biara.

⁴ Dza odzi kan no tse dɛ gyata, na ɔwɔ ɔkɔr ntsaban: mohwɛe araa ma okodur dɛ wotutuu n’atsaban, na wɔmaa no do fii asaase do, na wɔmaa ogyinaa anan ebien do dɛ nyimpa, na wɔmaa no nyimpa akoma.

⁵ Na hwɛ, abowa bi so a otsia ebien a ɔtse dɛ osisi, na ogyinae tɔree kɔr fakor, na mparba ebiasa hyɛ n’anomu wɔ ne se ntamu: na ndze bi see no dɛ, Soɛr, dzi bɔnam pii.

⁶ Iyi ekyir no muhun fofor so a ɔtse dɛ ɔsebɔ a nnoma ntsaban anan sisi n’ekyir; abowa no wɔ etsir anan so; na wɔdze tumdzi maa no.

⁷ Iyi ekyir no muhunii wɔ anadwe enyido adzehu mu bio, na hwɛ, abowa a otsia anan a no ho yɛ hu, yɛ nwanwa, yɛ dzen mbordo; na ɔwɔ dadze se akɛse: na ɔmemenee kekaaw mu esinesin, na ɔdze n’anan tsiatsiaa nkaa no do: na ɔsor ɔno na mbowa a wodzii n’enyim kan no nyina; na ɔwɔ mmbɛn du.

⁸ Morodwendwen mmbɛn no ho no, hwɛ, ambɛn kakraba fofor bi so puei wɔ hɔn ntamu, na mmbɛn a wodzii kan no mu ebiasa ase tutui wɔ n’enyim: na, hwɛ, enyiwa a ɔtse dɛ nyimpa enyiwa na ano a ɔkeka nsɛm akɛse wɔ ambɛn no ho.

⁹ Mohwɛe araa kesii dɛ wɔdze ahengua sisii hɔ, na nyia ɔwɔ hɔ fi mbersantsen bɛtsenaa do: n’atar hoa dɛ esukwankyɛba, na ne tsir do nhwi tse dɛ oguannhwi fitafita; n’ahengua ogyaframee a, na no nhwiir ogyadzɛwee a.

¹⁰ Ogya esutsen fi n’enyim worae bae: mpempem mpempem soom no, na pedu mbɔho pedu gyinagyinaa n’enyim. Wɔhyɛɛ ase dɛ worubu atsɛn, na wobuebuee nwoma no mu.

¹¹ Mohwɛe araa ma okesii dɛ ɔnam nsɛm akɛse a ambɛn no kae ntsi; wokum abowa no, na wɔsɛɛ no honam, na wɔdze no maa ogyaframee.

¹² Na mbowa nkaa no dze, wɔgyee hɔn tumdzi; naaso wɔhyɛɛ hɔn nda na ber a hɔn nkwa bɔtoa do ekodu.

¹³ Minyaa anadwe enyido adzehu bio, na hwɛ, obi a ɔtse dɛ nyimpa ba dze ɔsor nsuwusiw reba, na ɔbaa nyia ɔwɔ hɔ fi mbersantsen no nkyɛn, na wɔdze no pinkyɛɛn n’enyim.

¹⁴ Na ɔno na wɔmaa no tumdzi, na enyimnyam, na ahendzi, dɛ aman, amanaman, na kasa horow nyina nsom no: no tumdzi yɛ daa tumdzi a orunntwa mu da, na n’ahendzi yɛ dza wɔrennsɛɛ no.

Oyikyerɛ No Ne Nkyerɛase

¹⁵ Emi Daniel dze, mo sunsum bɔmee wɔ mo honam mu, na m’enyido adzehu no haaw me.

¹⁶ Mipinkyɛɛn hɔn a wogyinaa hɔ no mu baako, na mibisaa no dza muhunii no nyina ho asekyerɛ. Nna ɔkaa kyerɛɛ me, na ɔmaa muhun ndzɛmba no ne nkyerɛase.

¹⁷ Mbowa akɛse a wɔyɛ anan yi, wɔyɛ ahemfo baanan a wobefi asaase do asoɛr.

¹⁸ Na Ɔsorsornyi no n’ahotseweefo no dze, wɔbɛgye ahendzi no, na woenya ahendzi no daa, mbersantsen mfesantsen.

¹⁹ Nna mohwehwɛɛ dɛ muhu nokwar no wɔ abowa a otsia anan a ɔsor ɔno na hɔn nyina no a no ho yɛ hu mbordo a ne se yɛ dadze, na n’awerɛw yɛ boran a ɔmemenee ɔkekaaw mu esinesin na ɔdze n’anan tsiatsiaa nkaa no do no ho no nkyerɛase;

²⁰ na ne tsir do mmbɛn du no, na ambɛn fofor bi so a opuei na ebiasa tutui wɔ n’enyim; ambɛn no a ɔwɔ enyiwa, na ano a ɔkaa nsɛm akɛse, na ehwɛ a ɔso sen ne mfɛfo no ho dze;

²¹ mohwɛe, na ambɛn kor no ara nye ahotseweefo no dzii ako, na odzii hɔn do nyim;

²² dze kesii dɛ nyia ɔwɔ hɔ fi mbersantsen no bae, na wɔdze abemdzi maa Ɔsorsornyi no n’ahotseweefo no; na ber baa dɛ ahotseweefo no nyaa ahendzi no.

²³ Ɔkaa dɛm dɛ, Abowa a otsia anan no bɛyɛ ahendzi a otsia anan wɔ asaase do a ɔbɔsor ɔno wɔ ahendzi nyina mu, na ɔamen asaase nyina, na oetsiatsia do, na oebubu mu esinesin.

²⁴ Na mmbɛn du no ho dze, ahendzi kor yi ara mu na ahemfo du bɔsoɛr: na hɔn ekyir no fofor bi bɔsoɛr; na ɔbɔsor ɔno na hɔn a wodzi kan no, na ɔbɛbrɛ ahemfo ebiasa adze.

²⁵ Na ɔbɛka nsɛm etsia Ɔsorsornyi no na ɔama Ɔsorsornyi no n’ahotseweefo no aberɛ: na ɔbɔdwen dɛ ɔbɛsakyer mber na mbra; na wɔdze hɔn bɛhyɛ ne nsa ma ekodu mfe ebiasa na fa.

²⁶ Na wɔbɛtsena ase ebu atsɛn, na wɔbɛgye ne nsamu tumdzi no, na wɔasɛɛ no dze pasaa.

²⁷ Na ahendzi, na tumdzi, na ahenman a wɔwɔ wiadze nyina n’akɛseyɛ wɔdze bɛma Ɔsorsornyi no n’ahotseweefo man no: n’ahendzi yɛ daa ahendzi, na tumdzi nyina bɔsom no ayɛ setsie ama no.

²⁸ Ha na asɛm no n’ase si. Emi Daniel dze, m’adwen haaw me pii, na m’enyim sakyeree: na medze asɛm no siee m’akoma mu.