Daniel 5 - BAEBOR

Ɔfasu Ho Nkrukyei

¹ Ɔhen Belsazar too n’ebirɛmpɔn apem pon kɛse, na ɔnoom nsa wɔ hɔn enyim.

² Ber a nsa no baa n’enyi do no, ɔhyɛɛ dɛ wɔmfa sika na dwetɛ nkɔɔpow a n’egya Nebukadenezar kɛfaa no asɔrdan a ɔwɔ Jerusalɛm mu no mbra; ma ɔhen no na n’ebirɛmpɔn, ne yernom na no nwewefo nnom mu.

³ Nna wɔdze sika nkɔɔpow a wɔkɛfaa no Nyankopɔn fie asɔrdan a ɔwɔ Jerusalɛm mu no bae; na ɔhen no na n’ebirɛmpɔn, ne yernom na no nwewefo no noom mu.

⁴ Wɔnoom nsa, na wɔkamfoo sika, na dwetɛ, boran, dadze, ndua, na abo abosom no.

⁵ Dɔn no ara mu na nyimpa nsatseaba puei bae bɛkyerɛɛw ahemfie fasu no ne ban ho wɔ kandzeadua no ne tsentsendo: na ɔhen hun nsa a ɔkyerɛwee no ne fa bi.

⁶ Nna ɔhen no n’enyim danee, na n’adwen haaw no; na n’asen mu akwaa sansanee, na no nkotodwe sesɛɛ ho biribiriw.

⁷ Ɔhen tseaa mu dzendzen dɛ wɔmfa nkaberkyerfo, Kaldeafo, na sebramufo mbra. Ɔhen no kaa kyerɛɛ Babilɔn enyansafo no dɛ, Obiara a ɔbɛkenkan kyerɛw yi, na wɔakyerɛ me n’ase no, wobofura no ɔberdum, na oenya sika ntweaban egu no kɔn mu, na ɔayɛ ahenman yi mu tumdzifo a otsia ebiasa.

⁸ Nna ɔhen no n’enyansafo no nyina bae: na woenntum annkenkan kyerɛw no, eso wɔamma ɔhen no ennhu nkyerɛase no.

⁹ Nna ɔhen Belsazar no ho guaan no kɛse, na n’enyim danee, na n’ebirɛmpɔn no hɔn enyi bɔe.

¹⁰ Na osian ɔhen na n’ebirɛmpɔn hɔn kasaa no ntsi, ɔhembaa no baa aponto dan no mu: ɔhembaa no kasae see dɛ, Ɔhen, nya nkwa daa; mma w’adwen nnhaw wo, eso mma w’enyim nndan:

¹¹ banyin bi wɔ w’ahenman mu a abosom krɔnkrɔn sunsum wɔ no mu, na wohun no mu kan, na nyimdzee, na nyansa a ɔtse dɛ abosom nyansaa wɔ w’egya nda no mu: na w’egya Nebukadenezar, mekyerɛ w’egya ɔhen noara, dze no sii nkongyaayifo, nkaberkyerfo, Kaldeafo na sebramufo do panyin;

¹² osiandɛ wohun sunsum a ɔkyɛn, na nyimdzee, na ntseasee, adaaso asekyerɛ, na nsɛm a no mu yɛ sum mu kyerɛ, na anyanyan pɔw mu san, wɔ Daniel kor yi ara a ɔhen too no Bɛltesasar no mu. Afei ma wɔnkɛfrɛ Daniel, na ɔbɛkyerɛ ase.

¹³ Nna wɔdze Daniel baa ɔhen no enyim. Ɔhen no bisaa Daniel dɛ, Ana ɔwo nye Daniel a ifi Juda ndɔmmummba a m’egya dze hɔn fi Juda bae no mu no?

¹⁴ Matse wo nka dɛ abosom no sunsum wɔ wo mu, na dɛ woehu kan na ntseasee na nyansa kyɛnee wɔ wo mu.

¹⁵ Na afei wɔdze enyansafo, nkaberkyerfo, aba m’enyim dɛ wɔmbɛkenkan kyerɛw no na wɔmma munhu ne nkyerɛase: na woenntum asɛm no n’ase kyerɛ.

¹⁶ Na matse wo nka, dɛ itum asɛm ase kyerɛ, na esan anyanyan pɔw: afei sɛ itum kenkan kyerɛw no, na ema muhu ne nkyerɛase a, wobofura wo ɔberdum, na enya sika ntweaban egu wo kɔn mu, na ayɛ ahenman no tumdzifo a otsia ebiasa.

¹⁷ Nna Daniel buae see ɔhen no dɛ, W’akyɛdze nko woara wo hɔ, na fa w’akatua ma obi; naaso mebɛkenkan kyerɛw no akyerɛ wo, na mama ehu ne nkyerɛase.

¹⁸ Ɔwo ɔhen, Ɔsorsor Nyankopɔn dze ahendzi no, na akɛseyɛ, na enyimnyam, na tumdzi, maa w’egya Nebukadenezar:

¹⁹ na osian tum a ɔdze maa no ntsi, aman, amanaman, na kasa horow nyina ho popoe na wosuroi wɔ n’enyim: nyia ɔpɛ na okum no, na nyia ɔpɛ na ɔmaa ɔtsenaa ase; na nyia ɔpɛ na ɔmaa no do, na nyia ɔpɛ na ɔbrɛɛ no adze.

²⁰ Na n’akoma maa noho do, na no sunsum sorowee ma ɔyɛɛ nkontompɔdze no, wotuu no fii n’ahengua no do, na wɔgyee n’enyimnyam fii ne nsamu:

²¹ na wɔpaam no fii adasamba mu; na wɔyɛɛ n’adwen dɛ mbowa dze, na ɔnye sar do nsoasopɔnkɔ kɛtsenae; wɔmaa ɔwee efuw dɛ anantwi, na ɔsor bɔsu fɔɔw no honam: kodur dɛ ohun dɛ Ɔsorsor Nyankopɔn no dzi tum wɔ nyimpa ahendzi mu, na dɛ ɔnoara na ɔdze obiara a ɔpɛ si do.

²² Na ɔwo ne ba, Belsazar, inyim iyi nyinara dze, naaso ammbrɛ w’akoma adze;

²³ na mbom ama woho do etsia ɔsor Wura; na wɔdze ne fie nkɔɔpow aba w’enyim na ɔwo na w’ebirɛmpɔn, wo yernom na wo nwewefo, anonom mu nsa; na ɔwo akamfo dwetɛ, na sika, boran, dadze, dua, na ɔbo abosom a wonnhu adze, eso wɔnntse asɛm, na wonnyim no: na Nyankopɔn a w’ahom wɔ ne nsamu, na w’akwan nyina yɛ nedze no dze, annhyɛ no enyimnyam:

²⁴ ɔno ntsi na wɔsomaa nsakum no fi n’enyim bae, na kyerɛw yi wokrukyei.

²⁵ Na kyerɛw a wokrukyei no nye: MENE, MENE, TEKEL, UPHARSIN.

²⁶ Asɛm no ne nkyerɛase nye yi: MENE; Nyankopɔn akan w’ahendzi, na ɔdze aba ewiei.

²⁷ TEKEL; woeker wo wɔ nsɛn mu, na woehu wo dɛ etɔ sin.

²⁸ PERES (UPHARSIN); wɔakyɛ w’ahendzi mu na wɔdze ama Mediafo na Persiafo.

²⁹ Nna Belsazar hyɛe ma wofuraa Daniel ɔberdum, na wɔdze sika ntweaban guu no kɔn mu, na wɔbɔɔ no ho dawur dɛ ɔbɛyɛ ahendzi no mu tumdzifo a otsia ebiasa.

³⁰ Anadwe no ara na wokum Kaldeahen Belsazar.

³¹ Na Medianyi Darius ne nsa kaa ahendzi no, nna oedzi mfe eduosia ebien.