Daniel 3 - BAEBOR

Nebukadenezar Ne Sika Honyi

¹ Ɔhen Nebukadenezar yɛɛ sika honyi a ne tsentsen yɛ basafa duenum, na ne tɛtɛr basafa kor na fa: na ɔdze sii Dura tɛtɛr mu, wɔ Babilɔn asaase do.

² Nna ɔhen Nebukadenezar somae ma wokehyiahyiaa amansin ahemfo, abakomafo, ambradofo, atsɛmbufo, afotosamfo, apamfo, mbrakyerɛfo, na asaase no do etumfo nyinara dɛ wɔmbra honyi a ɔno ɔhen Nebukadenezar dze esi hɔ no no mpuei ase.

³ Nna amansin ahemfo, na abakomafo, na ambradofo, atsɛmbufo, afotosamfo, apamfo, mbrakyerɛfo, na asaase no do etumfo no nyinara boaa ano behyiaa dɛ worubopue honyi a ɔhen Nebukadenezar dze esi hɔ no; na wobegyinaa honyi a Nebukadenezar dze esi hɔ no enyim.

⁴ Nna ɔsɛn no tseatseaa mu kɛse dɛ, Amanaman, na kasa horow, hom na wɔahyɛ hom,

⁵ dɛ, aber biara a hom bɛtse abɛn, dodogya, nsankutsen, sambuka, bɛntasanku, na bɔtɔwasanku, na nsanku horow nyina ne ndze no, hom nhwe ase nkotow nsɔr sika honyi a ɔhen Nebukadenezar dze esi hɔ no:

⁶ na obiara a ɔannhwe ase annkotow annsɔr no, amonmu no ara wɔbɔtow no akyen fononoo gya framfram no mu.

⁷ Dɛm ntsi aber a aman no nyinara tsee abɛn, dodogya, nsankutsen, sambuka, bɛntasanku, na nsanku horow nyina ne ndze no, nna amanaman, na kasa horow no nyinara hwehwee ase kotowee sɔɔr sika honyi a ɔhen Nebukadenezar dze esi hɔ no.

Mberantsɛ Baasa No Wɔ Ogya Fononoo Mu

⁸ Dɛm ntsi aber no ara mu no, Kaldeafo binom kɔree kɔtoatoaa Jewfo no ano.

⁹ Wɔkɛsee ɔhen Nebukadenezar dɛ, Ɔhen, nya nkwa daa.

¹⁰ Ɔhen, ɔwoara na ahyɛ mbra dɛ nyimpa biara a ɔbɛtse abɛn, dodogya, nsankutsen, sambuka, bɛntasanku, bɔtɔwasanku, na nsanku horow nyinara ne ndze no, ɔnhwe ase nkotow nsɔr sika honyi no:

¹¹ na obiara a ɔannhwe famu annkotow annsɔr no, wɔntow no nkyen fononoo gya framfram no mu.

¹² Jewfo bi wɔ hɔ a ayɛ hɔn Babilɔn asaase mu nsɛm do ahwɛfo, Sadrak, Mesak, na Abednego; ɔhen, mbarimba yinom, woemmbu wo bi: wɔnnsom w’abosom, eso wɔnnkotow nnsɔr sika honyi a edze esi hɔ no.

¹³ Nna Nebukadenezar kaa no ebufuw na ebufuhyew mu dɛ wɔmfa Sadrak, Mesak, na Abednego mbra. Nna wɔdze dɛm mbanyin yi begyinaa ɔhen no enyim.

¹⁴ Nebukadenezar buae see hɔn dɛ, Ao Sadrak, Mesak, na Abednego, aso hom boapa ara na hom nnsom mo bosom, eso hom nnkotow nnsɔr sika ohonyi a medze esi hɔ no?

¹⁵ Afei dze sɛ hom esiesie hom ho dɛ aber a hom bɛtse abɛn, dodogya, nsankutsen, sambuka, bɛntasanku, na bɔtɔwasanku, na nsanku horow nyina ne ndze no, hom bɔhwe ase akotow asɔr ohonyi a mayɛ no a, oye: na sɛ hom annkotow annsɔr no a, dɔnhwer no mu ara wɔbɔtow hom egu fononoo gya framfram no mu; na bosom kor a ɔbɛgye hom efi me nsamu no nye woana?

¹⁶ Sadrak, Mesak, na Abednego buae see ɔhen no dɛ, Ao Nebukadenezar, onnhia hɛn dɛ yebobua wo asɛm yi mu bi.

¹⁷ Sɛ ɔba no dɛm a, hɛn Nyankopɔn a yɛsom no no obotum dɛ ɔgye hɛn fi fononoo gya framfram no mu; na ɔno na ɔbɛgye hɛn efi ɔwo, ɔhen, wo nsamu.

¹⁸ Na sɛ annyɛ dɛm mpo a, ɔhen, hu dɛ yɛronnsom w’abosom, eso yɛronnkotow nnsɔr ohonyi a edze esi hɔ no da.

¹⁹ Nna ebufuhyew hyɛɛ Nebukadenezar ma, na n’enyim sakyeree tsiaa Sadrak, Mesak, na Abednego: dɛm ntsi ɔkasae, na ɔhyɛɛ dɛ wɔmma fononoo no ndɔ mpɛn ara esuon nkyɛn mbrɛ ɔtɔ dɛ wɔma ɔdɔ.

²⁰ Na ɔhyɛɛ mbanyin akatakyi bi a wɔwɔ no dɔm no mu no dɛ wɔnkyekyer Sadrak, Mesak, na Abednego, na wɔnkɔtow hɔn ngu fononoo gya framfram no mu.

²¹ Nna wɔkyekyeer hɔn wɔ hɔn ntwontwo (togaase), hɔn sorntar na hɔn egugudo, na hɔn ntar nkaa no mu, na wɔtoow hɔn guu fononoo gya framfram no mu.

²² Na ɔnam dɛ wɔnam ɔhen no ne mbrasɛm dzendzen no do ama fononoo no adɔ huruhuru mbordo ntsi, ogyaframee no kum mbanyin a wɔdze Sadrak, Mesak, na Abednego kɔree no.

²³ Na mberantsɛ baasa yi, Sadrak, Mesak, na Abednego a wɔakyekyer hɔn no kɔhwee fononoo gya framfram no mu.

²⁴ Na ɔhen Nebukadenezar no ho boow no, na ɔsoɛɛr ntsɛmara: obisaa n’apamfo no dɛ, Ana nnyɛ mbanyin baasa a wɔakyekyer hɔn na yɛtoow hɔn guu ogya no mu? Wobuaa ɔhen no dɛ, Nyew, Ɔhen, ɔnoara nye no.

²⁵ Obuaa hɔn dɛ, Hwɛ, muhu mbanyin baanan a wɔasan hɔn nenam ogya no mu, na hwee nnyɛɛ hɔn; na nyia otsia anan no no hwɛbea tse dɛ abosomba bi.

²⁶ Nna Nebukadenezar twee bɛɛn fononoo gya framfram no ano: na ɔkasaa dɛ, Sadrak, Mesak, na Abednego, hom, ɔsorsor Nyankopɔn no nkowaa, hom mpue mbra ha. Nna Sadrak, Mesak, na Abednego fii ogya no mu puei.

²⁷ Nna amansin ahemfo, abakomafo, na ambradofo, na ɔhen no n’apamfo a wobehyiae no, hun mbanyin yi dɛ ogya no ennya hɔn nyimpadua do tum, eso hɔn tsinhwi ennhum, hɔn ntwontwo (togaase) annsakyer, na eso ogya hua ammfa hɔn do.

²⁸ Nebukadenezar see dɛ, Nhyira nka Sadrak, Mesak, na Abednego hɔn Nyankopɔn a ɔasoma no bɔfoe ma ɔabɛgye no nkowaa a wɔdze hɔn werɛ tweer no, na ɔasakyer ɔhen n’asɛm no, na oegyaa hɔn nyimpadua mu ama, amma wɔaannsom ɔbosom biara anaa wɔaannkotow annsɔr no, gyedɛ hɔnankasa hɔn Nyankopɔn.

²⁹ Dɛm ntsi mehyɛ mbra, dɛ ɔman, amanaman, na kasa horow biara a ɔbɛka asɛmbɔn bi etsia Sadrak, Mesak, na Abednego hɔn Nyankopɔn no, wobotwitwa hɔn mu esinesin, na wɔayɛ hɔn efi dɛ sumina: osiandɛ tum biara nnyi hɔ a otum gye nkwa dɛ iyi.

³⁰ Nna ɔhen no maa Sadrak, Mesak, na Abednego hɔn dzibew krɔnee wɔ Babilɔn asaase do.