Daniel 2 - BAEBOR

Nebukadenezar N’adaaso

¹ Na Nebukadenezar n’ahendzi afe a otsia ebien no mu no, na Nebukadenezar sosoo adaa; na no werɛ howee, na ne nda fii no do kɔree.

² Nna ɔhen no hyɛɛ dɛ wɔnkɛfrɛ nkongyaayifo, na nkaberkyerfo, na abayifo, na Kaldeafo dɛ wɔmbɛkyerɛ ɔhen n’adaaso no. Nna wɔbae begyinagyinaa ɔhen no enyim.

³ Na ɔhen no see hɔn dɛ, Maso daa bi, na moho hiahia me dɛ mebɛkaa daa no na mehu ne nkyerɛase.

⁴ Nna Kaldeafo no kasaa kyerɛɛ ɔhen no wɔ Siria kasa mu, dɛ, Ɔhen nya nkwa daa; ka daa no kyerɛ wo nkowaa, ma yɛnkyerɛ ase.

⁵ Ɔhen no buae see Kaldeafo no dɛ, Dza maka no ara na maka: sɛ hom annkyerɛ me daa no na n’ase a, wobotwitwa hom mu esinesin, na wɔadan hom efi sumina.

⁶ Na sɛ hom kyerɛ daa no na n’ase a, hom benya mo hɔ akyɛdze na akatua na enyidzi kɛse: dɛm ntsi hom nkyerɛ me daa no na n’ase.

⁷ Wobuaa no mpɛn ebien see dɛ, Ma ɔhen nka daa no nkyerɛ no nkowaa, ma yɛnkyerɛ ase.

⁸ Ɔhen no buae see dɛ, Muhu no pefee dɛ mber ara na hom regye, osiandɛ hom nyim dɛ sɛ mekasa a menndan m’ano.

⁹ Na sɛ hom amma mennhu daa no a, ɔno adze bɛyɛ hom: osiandɛ hom ahyehyɛ atorsɛm na nsɛmfun dɛ hom rebɛka no m’enyim, ekodu dɛ mebɛsakyer m’adwen: dɛm ntsi hom nka daa no nkyerɛ me, ma munhu dɛ hom botum akyerɛ me ase.

¹⁰ Kaldeafo no buae wɔ ɔhen no enyim see dɛ, Nyimpa biara nnyi asaase do a obotum akyerɛ ɔhen n’asɛm yi: siantsir nye dɛ ɔhen, owura, anaa otumfo biara mmbisaa nkongyaayifo, anaa nkaberkyernyi, anaa Kaldeanyi biara hɔ asɛm a ɔtse dɛm pɛn.

¹¹ Na asɛm a ɔyɛ dzen na ɔhen ribisa yi, na obiara nnyi hɔ a obotum akyerɛ wɔ ɔhen enyim, gyedɛ abosom a hɔn tsenabea nnyi adasa mu no.

¹² Iyi ntsi na ɔhen no no bo fuwii na n’enyi beer kɛse, na ɔhyɛɛ dɛ wonku Babilɔn enyansafo no nyinara.

¹³ Nna wɔhyɛɛ mbra dɛ wonku enyansafo no; na wɔhwehwɛɛ Daniel na ne n’anyɛnkofo no dɛ woboku hɔn.

¹⁴ Nna Daniel dze kasa pa na adwenmutsewee bisaa ɔhen ne safohen Ariok a nna oepue dɛ orukoku Babilɔn enyansafo no dɛ;

¹⁵ Ɔyɛ dɛn na mbra a ɔyɛ dzen dɛm fi ɔhen no hɔ yi? Nna Ariok kaa asɛm no kyerɛɛ Daniel.

¹⁶ Na Daniel kɔr dan mu kɛserɛɛ ɔhen no dɛ ɔmma no ber, na ɔbɛkyerɛ daa no ase akyerɛ no.

Nyankopɔn Yi Adaaso No Kyerɛ Daniel

¹⁷ Nna Daniel kɔr ne fie, na ɔkɛdaa nsɛm no edzi kyerɛɛ ne mfɛfo Hanania, Misael, na Azaria:

¹⁸ dɛ wɔnserɛ ɔsor Nyankopɔn hɔ mbɔbɔrhu wɔ esumasɛm yi ho; amma woeennkuku Daniel na n’anyɛnkofo no aannka Babilɔn enyansafo nkaa no ho.

¹⁹ Na woyii esumasɛm no kyerɛɛ Daniel wɔ anadwe enyido adzehu mu. Nna Daniel hyiraa ɔsor Nyankopɔn.

²⁰ Daniel kaa dɛ, Nhyira nka Nyankopɔn dzin daa daa: Ɔno na nyansa na tum dzi wɔ no:

²¹ Na ɔno na ɔsakyer mber na hyɛber: Otu ahen, na ɔhyɛ ahen: Ɔma enyansafo nyansa, Na hɔn a wɔwɔ ntseasee no, nyimdzee.

²² Ɔda ndzɛmba a no mu dɔ na osuma edzi: Onyim dza ɔwɔ sum mu, na kan nye no tse.

²³ Meda wo ase, miyi wo ayɛw, Ɔwo, m’egyanom Nyankopɔn, Ama me nyansa na tum, Na afei ama mehu dza yebisaa wo no: Na ɔwo na ama yeehu ɔhen no n’adaaso.

²⁴ Dɛm ntsi Daniel kɔr Ariok a ɔhen no ahyɛ no dɛ onku Babilɔn enyansafo no nkyɛn: kɛsee no dɛ: Mma nnsɛɛ Babilɔn enyansafo no: fa me kɔ ɔhen no enyim, na mebɛkyerɛ daa no ase akyerɛ no.

Daniel Kyerɛ Adaaso No Ase

²⁵ Nna Ariok yɛɛ ntsɛm dze Daniel baa ɔhen no enyim, na mbrɛ ɔsee nye yi, Mehu Juda ndɔmmumkɔfo no mu banyin bi a ɔbɛma ɔhen ehu daa no na nkyerɛase no.

²⁶ Ɔhen no buae see Daniel a ne dzin dze Bɛltesasar no dɛ, Ana ɔwo ibotum ama mehu daa a maso no, na ne nkyerɛase no?

²⁷ Daniel buaa ɔhen no see dɛ, Esumasɛm a ɔhen ebisa yi enyansafo, nkaberkyerfo, nkongyaayifo, anaa sebramufo runntum nkyerɛ ɔhen;

²⁸ na mbom Nyankopɔn bi wɔ sor a ɔda esumadze edzi, na ɔno na ɔama ɔhen Nebukadenezar ehu dza daakye ɔbɛba no. Wo daa no, na w’enyido adzehu wɔ wo mpa do no, nye yinom:

²⁹ ɔwo, ɔhen, eda wo mpa do no, edwendween pii, na dza daakye ɔbɛba no: na nyia ɔda esumadze edzi no eyi akyerɛ wo no.

³⁰ Na emi dze, nnyɛ nyansa biara a mowɔ kyɛn atseasefo nyina ntsi na woeyi esumasɛm yi akyerɛ me, na mbom mbrɛ ɔbɛyɛ a wɔbɛma ɔhen ehu nkyerɛase no, na ɔwoara ehu w’akoma mu nsusui ntsi a.

³¹ Ɔwo, ɔhen, ihun ohonyi kɛse bi. Ohonyi yi a ɔso, na ɔhyerɛn hyɛnn yi, begyinaa w’enyim; nna n’enyim yɛ hu.

³² Ohonyi yi dze, ne tsir yɛ sika pa, n’akoko na n’abasa dwetɛ a, ne yafun na n’aserɛ boran a,

³³ n’anantu dadze a, n’anansa dadze fa na dɛtse fa.

³⁴ Ehwɛe araa kodur dɛ ɔbo bi a wɔnndze nsa twae tsewee bɔhwee ohonyi no n’anansa a ɔyɛ dadze na dɛtse no do, na obubuu no pɔsɔpɔsɔ.

³⁵ Nna dadze, dɛtse, boran, dwetɛ, na sika no bɔɔ mu bubuu pɔsɔpɔsɔ dɛ ɔpɛber mu ewuporowee ntsɛw; na mframa soaa hɔn nyina kɔree, dɛ woennhu hɔn beebiara bio: na ɔbo a ɔbɔbɔɔ ohonyi no do no, bɛyɛɛ bepɔw kɛse, na ɔhyɛɛ asaase nyina do ma.

³⁶ Iyi nye adaaso no; na yɛbɛka ne nkyerɛase no so wɔ ɔhen enyim.

³⁷ Ɔwo, ɔhen, eyɛ ahemfo hen a ɔsor Nyankopɔn dze ahendzi, tum, ahoɔdzen, na enyimnyam no ama wo;

³⁸ na beebiara mbrɛ adasamba, hambowa, na ɔsor ntumbowa wowɔe no, ɔdze hɔn ahyɛ wo nsa, na ɔahyɛ wo dɛ dzi hɔn nyinara do tum: ɔhen, ɔwo nye sika tsir no.

³⁹ Na ɔwo w’ekyir na ahendzi fofor bi so bɔsoɛr a ɔnnto wodze: na ahendzi bi so a otsia ebiasa a ɔyɛ boran dze a, obedzi asaase nyina do tum.

⁴⁰ Na ahendzi a otsia anan no bɛyɛ dzen dɛ dadze: susuampa dɛ dadze bubu adze nyinara pɔsɔpɔsɔ na ɔbrɛ no adze no: dɛmara na obobubu pɔsɔpɔsɔ na ɔadwerew iyinom nyinara.

⁴¹ Na dɛ mbrɛ ihun anansa na anansɔba dɛ fa yɛ ɔwemfo dɛtse na fa so yɛ dadze no, ahendzi no mu bɛpaapaa; na mbom dadze dzenyɛ bɛba mu hɔ, susuampa dɛ ihun dɛ wɔdze dadze afora awendɛtse mu ntsi.

⁴² Na dɛ mbrɛ anansɔba no mu bi yɛ dadze, na bi so yɛ awendɛtse no, dɛmara so na ahendzi no mu fa bɛyɛ dzen, na fa so bɛyɛ mberɛw.

⁴³ Na dɛ mbrɛ ihun dɛ wɔdze dadze afora awendɛtse mu no, wɔdze hɔn ho bɔfora adasa asefo mu; na wɔremmfemfam hɔnho, dɛ mbrɛ dadze nnye awendɛtse nndzi afora no.

⁴⁴ Na ahemfo no hɔn nda no mu na ɔsor Nyankopɔn bɛma ahendzi a wɔrennsɛɛ no da, eso wɔrenndan n’ahendzi nngya ɔman fofor bi do; na obobu ahendzi yinom pɔsɔpɔsɔ na ɔama ɔasa, na ɔnodze begyina daa.

⁴⁵ Susuampa dɛ ihun ɔbo bi a wɔnndze nsa twae fii bepɔw no mu tsewee, na obobubuu dadze no, boran, awendɛtse, dwetɛ, na sika no pɔsɔpɔsɔ no: Nyankopɔn kɛse no ama ɔhen ehu dza daakye ɔbɛba: na daa no yɛ nokwar, na ne nkyerɛase no si pi.

Ɔhen No Bɔ Daniel N’abaw Do

⁴⁶ Nna ɔhen Nebukadenezar dze n’enyim boom famu, na ɔkotowee sɔɔr Daniel, na ɔhyɛɛ dɛ wɔmbɔ Daniel ayɛyɛdze afɔr na nduhuam afɔr.

⁴⁷ Ɔhen no see Daniel dɛ, Ampaara wo Nyankopɔn nye enyame mu Onyame, na ahemfo Wura, na esumasɛm yikyerɛfo, ɔnam dɛ ɔwo na etum ada esumasɛm yi edzi.

⁴⁸ Nna ɔhen no yɛɛ Daniel ɔkɛse, na ɔmaa no akyɛdze akɛse pii, na ɔmaa odzii tum wɔ Babilɔn asaase nyinara do, na ɔbɛyɛɛ ambrado tsitsir wɔ Babilɔn enyansafo nyinara do.

⁴⁹ Na Daniel serɛɛ ɔhen no ma ɔyɛɛ Sadrak, Mesak, na Abednego Babilɔn asaase mu nsɛm do ahwɛfo: na Daniel dze, ɔtsenaa ɔhen no n’aban mu.