Daniel 11 - BAEBOR

Pomu Na Kwaamu Ahemfo No

¹ Na emi dze, Medianyi Darius n’afe a odzi kan no mu no migyinaa dɛ murusuo no mu mahyɛ no dzen.

² Na afei na mebɛkyerɛ wo nokwar no. Hwɛ, ahemfo baasa bɛda ho asoɛr wɔ Persia; na dza otsia anan no benya noho asen nkaa no nyinara; na sɛ n’ahonya ma no ho yɛ dzen a, obekenyan adze nyina etsia Griis ahenman.

³ Na ɔhen tumfo bi bɔsoɛr a ɔdze tumdzi kɛse bedzi hen, na ɔayɛ dza ɔpɛ.

⁴ Na oetsim, no n’ahendzi bɔbɔ, na wɔakyekyɛ mu afa ɔsor mframa anan afamu; na wɔremmfa mma n’asefo, eso ɔrennyɛ dɛ mbrɛ no tumdzi a ɔdze dzii hen no tse; na wobotutu n’ahendzi, woekwetsi yinom na wɔdze ama binom.

⁵ Na pomu afamu hen no no ho bɛyɛ dzen, na n’asafohemfo no mu baako; na no ho bɛyɛ dzen asen no, na oenya tumdzi; no tumdzi bɛyɛ tumdzi kɛse.

⁶ Na mfe bi ekyir no, wɔbɛfefa hɔnho anyɛnko; na pomu afamu hen ne babaa bɛba kwaamu afamu hen nkyɛn dɛ ɔnye no rebɛyɛ asomdwee: na ɔremma ne basa ahoɔdzen no nka no ho; na ɔno na ne basa rinngyina; na obeyi ɔbaa no, na hɔn a wɔdze no bae no, na nyia ɔwoo no no, na nyia ɔhyɛɛ no dzen wɔ mber no mu no ama.

⁷ Na ɔbaa no no ndwow mu mfɛwee bi mu na obi bɔsoɛr esuo n’ananmu a ɔbɛba dɔm no nkyɛn, na ɔahɛn kwaamu afamu ɔhen n’abankɛse no mu, na ɔnye hɔn ako, na oedzi konyim:

⁸ na ɔbɔsoa hɔn abosom, nye hɔn ehonyi a woegu, na hɔn dwetɛ na sika nkɔɔpow fɛɛfɛw no, ndɔmmum akɔ Egypt; na ɔbɔtwe no ho mfe bi efi kwaamu afamu ɔhen no ho.

⁹ Na ɔbɛba pomu afamu ɔhen no n’ahenman mu dze, naaso ɔbɛsan akɔ nankasa n’asaase do.

¹⁰ Na ne mba bedzi ako, na wɔaboa dɔm akɛse pii ano a wobeyir apram do dɛ nsu: na wɔbɛsan ebedzi ako ekodu n’abankɛse no ho mpo.

¹¹ Na pomu afamu hen n’enyi bɛber, na oepue nye kwaamu afamu hen no akɔko; na kwaamu afamu hen no dze nyimpadodow kɛse begyina hɔ, naaso wobedzi nkogu.

¹² Na pomu afamu hen no bɔsoɛr, na n’akoma ama noho do: na ɔbɛka mpem du du egu famu, naaso orinndzi nyim nnkyɛr.

¹³ Na kwaamu afamu hen no bɛsan dze nyimpadodow a wɔdɔɔ so sen kan no dze no ebegyina; na ɔdze rokɔ mfe bi ekyir no, ɔbɛsan dze dɔm kɛse na ndzɛmba pii aba.

¹⁴ Na mber no mu no, pii bɔsoɛr etsia pomu afamu hen no; nkyii so wo man mu akakabemfo mba bɛmema hɔnho do dɛ wɔbɛma enyido adzehu no etsim; na wɔbɔhwehwe ase.

¹⁵ Nna kwaamu afamu hen no bɛba abɔhɔr pempe, na ɔafa kurow a ɔagye ho ban dzendzen no: na pomu afamu akofo, anaa no dɔm a wɔasan mu eyi hɔn no runntum nngyina, eso worinnya ahoɔdzen bi nngyina.

¹⁶ Na nyia ɔbɛba no do no bɛyɛ dza nankasa pɛ, na obiara nnkotum n’enyim gyina. Na obegyina asaase fɛɛfɛw no do, na ɔdze ne nsa asɛɛ no.

¹⁷ Na ɔdze besi n’enyim dɛ ɔdze n’ahenman ahoɔdzen nyina reba, na tɔɔtsenyɛfo ka no ho; na ɔbɛyɛ n’apɛdze: na ɔdze mbaa babaa no ama no, dɛ ɔbɛsɛɛ no; na orinngyina, eso ɔronnko hɔ mma no.

¹⁸ Iyi ekyir no ɔbɛdan n’enyi akɔ nsupruw do, na ɔafa dodowara: na ɔsafohen bi bɛma oegyaa ahorohoraa a ɔhyɛ no hyɛ; naaso mpo, ɔbɛma n’ahorohoraa no adan ebua nankasa n’etsifi.

¹⁹ Nna ɔbɛdan n’enyi akɔ nankasa n’asaase do akoban no do: naaso obefintsiw ahwe ase, na worunnhu no.

Ɔhen No Ho Nkɔnhyɛ

²⁰ Na obi bɔsoɛr egyina n’ananmu a ɔbɛma towgyegyenyi pempensinyi bi edua ɔman no n’enyimnyam mu; na wɔbɛsɛɛ no nda kumaabi mu, nnyɛ ebufuw mu, anaa ɔko mu a.

²¹ Na ɔkwasampanyi bi bɔsoɛr n’ananmu a wɔmmfaa ahendzi no n’enyimnyam mmaa no: na ɔbɛba no ahodweber mu, na ɔdze adzɛfɛdzɛfɛsɛm ebosuo ahendzi no mu.

²² Na ɔdze nsuyirii abasa bɛpram hɔn efi n’enyim, na woebubu hɔn; nyew, ahyɛmu safohen no so

²³ Na nkabɔmu a wɔnye no bɛyɛ no ekyir, ɔbɛyɛ no ndaadaa mu: na ɔbɔfow aba, na ɔdze dɔm kakrabaa bi bɛba abɛyɛ dzen.

²⁴ Ahodweber mu na obotu aba asaase no do mbrɛ ɔyɛ fɔɔfɔɔ; na ɔbɛyɛ dza n’egyanom, anaa n’egyanom hɔn egyanom nnyɛɛ pɛn; ɔbɛpetse afodze, na asadze, na ahodze ama hɔn. Nyew, ɔbɛhyehyɛ ne tsirmu nhyehyɛɛ wɔ akoban no mu ma ekodu ber bi.

²⁵ Na ɔdze dɔm kɛse bekenyan no tum na ne ndam etsia pomu afamu hen no; na pomu afamu hen dze dɔm a ɔyɛ dzen pii pa botu sa abɔko: naaso orinngyina, osiandɛ wɔbɔkɔ ne tsir do apam.

²⁶ Ɛhɛɛ, hɔn a wodzi n’edziban na wɔbɛsɛɛ no, na no dɔm no bɛpram do na atɔfo pii ahwehwe ase.

²⁷ Na ahemfo beenu no dze, hɔn akoma bɛyɛ emumuyɛ, na wɔbɛka atorsɛm wɔ edzidzipon kor do: na orunnwie yie; na ewiei no bɛba ara wɔ ber a wɔahyɛ.

²⁸ Nna kwaamuhen no dze ahodze kɛse bɛsan akɔ nankasa n’asaase do; naaso n’akoma betsia ahyɛmu krɔnkrɔn no, na ɔayɛ n’apɛdze, na ɔasan akɔ nankasa n’asaase do.

²⁹ Ber a wɔahyɛ no mu na ɔbɛsan aba pomu afamu; na ekyir dze no rennyɛ dɛ kan dze no.

³⁰ Na Kittim ahɛn bɛba no do; na n’akoma botu na ɔasan, na oenya ebufuw wɔ ahyɛmu krɔnkrɔn no do, na ɔayɛ n’apɛdze: ɔbɛsan mpo, na n’enyi aba hɔn a wɔapow ahyɛmu krɔnkrɔn no do.

³¹ Na ɔdze nsordaafo begyina n’afamu, na wobogu krɔnkrɔn bea no ho fi, mekyerɛ abankɛse no mpo, na woeyi daa ɔhyew afɔr no wɔ hɔ, na wɔdze amamfoyɛ ekyiwadze a ɔbɔ man no ebesi hɔ.

³² Na hɔn a wɔbɔ ahyɛmu no ho mbusu no, ɔdze adzɛfɛdzɛfɛw bɛsɛɛ hɔn: naaso ɔman a wonyim hɔn Nyankopɔn no dze, hɔn ho bɛyɛ dzen, na wɔayɛ adze.

³³ Na ɔman no mu hɔn a wonyim nyansa no, wɔbɛkyerɛkyerɛ nyimpa pii: naaso wɔbɔtotɔ afona ano na ogyaframee mu, ndɔmmumfa na afofa mu, nda pii.

³⁴ Na sɛ wɔbɔhwehwe ase a, wɔdze mboa kakrabaa bi bɔboa hɔn: na nyimpa pii dze adzɛfɛdzɛfɛw dze hɔnho bɛbata hɔn ho.

³⁵ Na hɔn mu binom a wɔyɛ enyansafo no, wɔbɔtotɔ, dɛ wɔrosɔ hɔn ahwɛ, na wɔapɔw hɔn ho, na wɔahoa hɔn ho fitaa, ekesi ewiei aber no do: osiandɛ ɔbɛkyɛr ekodu aber a wɔahyɛ no.

³⁶ Na ɔhen no bɛyɛ dɛ mbrɛ ɔpɛ; na ɔbɛma noho do, na oedzi bosom biara do ekromponsɛm, na wɔaka anwanwasɛm etsia enyame mu Nyame: na obesi no yie ara ekodu dɛ ebufuhyew no bɛsa; na dza woesua apaa do no, wɔbɛyɛ.

³⁷ Eso orummbu n’egyanom abosom anaa mbaa hɔn ahwehwɛdze no bi, eso orummbu bosom biara bi. Na obohuhor noho wɔ adze nyina do.

³⁸ Na n’ananmu na obedzi abankɛse bosom no nyi: na bosom a n’egyanom nnyim no no na ɔdze sika, na dwetɛ, na aboɔdzembo, na afɛɛfɛdze bedzi no nyi.

³⁹ Na ɔdze bosom nanaben no mboa bɛyɛ abankɛse dzendzenndzen no ho adze; obiara a obu no bi no, ɔdze enyimnyam bɛyɛ no kɛse: na ɔbɛma woedzi dodowara do tum, na wɔakyɛ asaase no ayɛ akatua.

⁴⁰ Na ewiei ber no mu na pomu afamu hen no ɔnye no befimfen: na kwaamu afamu hen no dze ntseaseanam, na mpɔnkɔdofo, na ahɛn pii bɛba no do dɛ kyinehyia mframa; na ɔbɛkɛhɛn nkurow nkurow no mu, na ɔapram do.

⁴¹ Ɔbɛhɛn asaase fɛɛfɛw no so do, na wobobutuw nkurow nkurow pii: na yinom dze, wɔbɛgye hɔn efi ne nsamu: Edom, na Moab, na Ammonmba mu etsitsir no.

⁴² Ɔbɛtsen ne nsa so wɔ nkurow nkurow no do: na Egypt asaase nnkefi nsa.

⁴³ Na obenya sika na dwetɛ akoradze na Egypt ndzɛmba a ɔsom bo nyinara edzi do tum: na Libiyafo na Etiopiafo bedzi n’anamɔn ekyir

⁴⁴ Na nsɛm a ofi boka na kwaamu afamu bɛhaw no: na ɔdze enyiber kɛse epue akɔ dɛ ɔrekɛsɛɛ na ɔadwerew nyimpa pii huntuhuntu.

⁴⁵ Na ɔdze n’ahemfi ntamadan no besi po na enyimnyam bepɔw krɔnkrɔn no ntamu; naaso ɔbɛba n’ewiei, na obiara rommboa no.