Daniel 10 - BAEBOR

Ɔbɔfo No Ho Oyikyerɛ

¹ Persiahen Sirus n’afe a otsia ebiasa no mu no, wɔdaa asɛm bi edzi kyerɛɛ Daniel a ne dzin dze Bɛltesasar no; nna asɛm no yɛ nokwar, na ɔfa ɔko kɛse ho na ne ntseasee yɛ dzen: naaso ɔtsee asɛm no ase, na onyaa enyido adzehu no ho ntseasee.

² Nda no mu no emi Daniel mo werɛ hoow adapɛn pɔr pɔr ebiasa.

³ Menndzi edziban pa biara, na nam anaa nsa annka m’ano, eso mannsera koraa, dze kesii dɛ dapɛn pɔr pɔr ebiasa no soe.

⁴ Na bosoom a odzi kan no ne da a otsia eduonu anan no mu no, ber a mowɔ esutsen a ɔyɛ Hidekel ho no,

⁵ memaa m’enyi do mohwɛe, na muhun banyin bi a ofura ndwera a Ufaz sika mapa bɔ n’asen wɔ hɔ.

⁶ Ne nyimpadua so tse dɛ sikabereebo, n’enyim tse dɛ enyinam, n’enyiwa tse dɛ kandzea gya, na n’abasa na n’anan tse dɛ ayewa a wɔapɔw ho, na ne kasaa ndze tse dɛ nyimpadodow ndze.

⁷ Na emi Daniel nko na muhun enyido adzehu no: na mbanyin a wɔka mo ho no ennhu enyido adzehu no; naaso ahopopo kɛsenara tɔɔ hɔn do, na woguanee dze hɔnho kosumae.

⁸ Na ɔkaa mo nko a nna morohwɛ enyido adzehu kɛse yi, na ahoɔdzen bi annka mo mu: na m’ahoɔfɛw daan prɔwee wɔ mo mu.

⁹ Naaso metsee ne ndze: na metsee n’asɛm no, nna m’enyim butuw famu a matɔ nda heii.

¹⁰ Na, hwɛ, nsa bi bosuoo mo mu a ɔmaa moweaweaa m’anankoroma enyim na me nsamu.

¹¹ Na ɔsee me dɛ, Daniel e, nyimpa a wɔdɔ wo kɛse, tsie asɛm a merebɛka akyerɛ wo yi na gyina tsentsen; na ɔwo na wɔasoma me wo nkyɛn yi: na ɔkaa asɛm yi kyerɛɛ me no, medze ahopopo migyinae.

¹² Nna ɔsee me dɛ, Daniel, mma nnsuro; na ofitsi da a odzi kan a edze w’akoma sii do dɛ ebɛtse asɛm no ase, na abrɛ woho adze wɔ wo Nyankopɔn enyim no, na wɔtsee wo nsɛm: na wo nsɛm ntsi na maba.

¹³ Na Persia ahenman safohen no siiw me kwan adapɛn ebiasa; na, hwɛ, Maekɛl a ɔyɛ abɔfo etsitsir no mu baako no, bae bɔboaa me: na mekaa hɔ wɔ Persia ahemfo no nkyɛn.

¹⁴ Afei maba dɛ merebɛma ehu dza ɔbɛba wo man do nda a odzi ekyir no mu: na enyido adzehu no da ho wɔ hɔ nda pii.

¹⁵ Na ɔkaa nsɛm yi dɛm kyerɛɛ me no, medze m’enyim sii famu, na motɔɔ mmum.

¹⁶ Na, hwɛ, obi a ɔtse dɛ nyimpa ba saso bɛkaa m’anofamfa: nna mubuee m’ano kasaa kyerɛɛ nyia ogyina m’enyim no dɛ, Ao mo wura, enyido adzehu no ntsi, awerɛhow kɛse ahyɛ mo do, na minnyi ahoɔdzen bi wɔ mo mu.

¹⁷ Na ɔbɛyɛ dɛn na mo wura n’akowaa yi nye mo wura bɛkasa? Na emi dze, amonmu no ara ahoɔdzen biara annka mo mu, eso ahom biara annka mo mu.

¹⁸ Nna obi a ɔtse dɛ nyimpa saso bɛkaa me bio, na ɔhyɛɛ me dzen.

¹⁹ Na ɔsee me dɛ, Ao nyimpa a wɔdɔ wo kɛse, mma nnsuro: asomdwee nka wo, hyɛ dzen, ɛhɛɛ, hyɛ dzen. Na ɔkasaa kyerɛɛ me no, mehyɛɛ dzen, na mesee dɛ, Ma mo wura nkasa; osiandɛ ɔwo ahyɛ me dzen.

²⁰ Nna ɔsee me dɛ, Ana inyim dza osian ntsi ma maba wo hɔ? Na afei na mebɛsan nye Persia safohen no akɔko: na misi mu kɔ a, hwɛ Griis safohen no bɛba.

²¹ Naaso mebɛka dza woekrukye no wɔ nokwar kyerɛwee mu no akyerɛ wo; na obi nnyi hɔ a osuo mo mu tsia yinom, gyedɛ Maekɛl.