Daniel 1 - BAEBOR

Daniel Na N’anyɛnkofo No Wɔ Babilɔn

¹ Judahen Jehoiakim n’ahendzi afe a otsia ebiasa no mu no, na Babilɔnhen Nebukadenezar baa Jerusalɛm botuu hyɛɛ no do.

² Na EWURADZE dze Judahen Jehoiakim na Nyankopɔn fie nkɔɔpow no mu bi hyɛɛ ne nsa; na ɔsoae kɔr n’abosomfie wɔ Sinar asaase do: na ɔdze nkɔɔpow no baa no bosom akoradzedan no mu.

³ Na ɔhen no kasaa kyerɛɛ ɔsomfopanyin Aspenaz, dɛ ɔmfa Israelmba no mu binom mbra, hɔn a wɔyɛ ahen asefo na ekunyin no;

⁴ mberantsewa a wonndzii dzɛm, na mbom hɔn ho yɛ fɛw, na hɔn enyi atsew nyansa nyina mu, na wonyim dze, na wohu nyimdzee mu, na wɔfata dɛ wɔsom wɔ ɔhen no n’ahemfie; na ɔnkyerɛ hɔn ma wonsua Kaldeafo nwoma na kasa.

⁵ Na ɔhen no hyɛɛ dɛ wɔmma hɔn ahendziban na ne nsa a ɔnom no bi daa daa nyina, na wɔnnyɛn hɔn mfe ebiasa; na ɔno ekyir no wɔmbɔsom ɔhen no.

⁶ Na hɔn mu bi a wofi Judamba mu nye Daniel, Hanania, Misael, na Azaria.

⁷ Na ɔsomfopanyin no totoo hɔn edzin: ɔtoo Daniel dzin Bɛltesasar; na ɔtoo Hanania dzin Sadrak; na ɔtoo Misael dzin Mesak; na ɔtoo Azaria dzin Abednego.

⁸ Na Daniel suae wɔ n’akoma mu dɛ ɔremmfa ahendziban anaa ne nsa a ɔnom no nngu no ho fi: dɛm ntsi ɔserɛɛ ɔsomfopanyin no amma oeenngu no ho fi.

⁹ Na Nyankopɔn maa Daniel nyaa ɔsomfopanyin no enyim enyimpa na ayamuhyehye.

¹⁰ Na ɔsomfopanyin no see Daniel dɛ, Musuro mo wura ɔhen a ɔahyehyɛ hom edziban na anondze: na ɔbɛyɛ dɛn ntsi na obohu hom enyim mbɔbɔmbɔbɔr akyɛn mberantsewa a wɔyɛ hom etsipɛmfo no? Hom reyɛ ma me tsir ato wɔ ɔhen enyim.

¹¹ Nna Daniel see ɔsomfo a ɔsomfopanyin dze no esi Daniel, Hanania, Misael na Azaria do no, dɛ:

¹² Meserɛ wo, sɔ wo nkowaa hwɛ dadu: na wɔmma hɛn fan ma yendzi, na nsu ma yɛnnom.

¹³ Nkyii so ma wɔnhwɛ hɛn enyim, na hɔn so a wodzi ahendziban bi no hɔn enyim wɔ w’enyim: na mbrɛ ɔwoara ibohu no, enye wo nkowaa ndzi.

¹⁴ Nna otsiee hɔn wɔ asɛm yi mu, na ɔsɔɔ hɔn hwɛɛ dadu.

¹⁵ Na dadu ekyir no, hɔn enyim yeyɛɛ fɛɛfɛw, na hɔn honam yeyɛɛ abran seen mberantsewa a wodzii ahendziban no bi no nyinara.

¹⁶ Nna ɔsomfo no yii hɔn edziban, na hɔn nsa a nkyɛ ɔwɔ dɛ wɔnom no fii hɔ, na ɔmaa hɔn fan.

¹⁷ Na mberantsewa baanan yi dze, Nyankopɔn maa hɔn nyimdzee, na nwomasua na nyansa nyina mu enyitsew: na Daniel nyaa ntseasee wɔ enyido adzehu na adaaso nyinara mu.

¹⁸ Na da a ɔhen no hyɛɛ dɛ wɔmfa hɔn mbra no durii no, ɔsomfopanyin no dze hɔn baa Nebukadenezar enyim.

¹⁹ Na ɔhen no nye hɔn twetwee nkɔmbɔ; na hɔn nyinara mu woennhu obiara a ɔtse dɛ Daniel, Hanania, Misael, na Azaria: dɛm ntsi wɔbɛkaa ɔhen no n’apamfo ho.

²⁰ Na asɛm biara a ɔfa nyansa na ntseasee ho a ɔhen no bisaa hɔn mu no, ohun hɔn dɛ woye mpɛn du sen nkongyaayifo na nkaberkyerfo a wɔwɔ n’ahenman mu no nyinara.

²¹ Na Daniel tsenaa hɔ araa dze kodur ɔhen Sirus n’afe a odzi kan no mu.