2 Timoti 1 - BAEBOR

Nkyia

¹ Emi Paul, Kraest Jesus somafo a ɔnam Nyankopɔn pɛ do, dɛ mbrɛ nkwa a ɔwɔ Kraest Jesus mu anohoba tse,

² dze kɛma no dɔba Timoti: adom, mbɔbɔrhu, asomdwee, mfi Egya Nyankopɔn nye hɛn Ewuradze Kraest Jesus hɔ nka wo.

Ndaase nye Nkuranhyɛ

³ Meda Nyankopɔn a medze tsibowa krɔnn som no dɛ mbrɛ me nananom yɛe no ase, dɛ minngyaa wo nkaa wɔ mo nkotoserɛ mu adzekyee nye adzesaa.

⁴ Sɛ mekaa wo nyinsuwa a, mo kɔn dɔ dɛ mubohu wo na dɛw aahyɛ me ma:

⁵ dɛ ama makaa nokwar gyedzi a ɔwɔ wo mu a odzii kan tsenaa wo nana Lɔis nye wo na Eunise mu no; na megye dzi dɛ ɔwɔ wo so wo mu.

⁶ Ɔno ntsi mekaa wo dɛ kenyan Nyankopɔn akyɛdze a inyae wɔ wo mu no ber a medze me nsa guu wo do no.

⁷ Na Nyankopɔn amma hɛn suro sunsum bi, na mbom ahoɔdzen nye dɔ nye adwenmutsewee dze a.

⁸ Dɛm ntsi mma w’enyi nnto hɛn Ewuradze adasedzi no, anaa emi a meyɛ ne daduanyi no ho; na mbom sɔw asɛmpa no ho akotorka no bi, dɛ mbrɛ Nyankopɔn ahoɔdzen tse.

⁹ Ɔno na ɔgyee hɛn, na ɔdze ɔfrɛ krɔnkrɔn no frɛɛ hɛn, nnyɛ hɛn ndwuma do a, na mbom nankasa ne tsirmpɔw nye n’adom a ɔdze doom hɛn wɔ Kraest Jesus mu fi tsetseetse,

¹⁰ na afei wɔnam Kraest Jesus ne nyikyerɛ do eyi no edzi no do a; ɔno a oeyi owu efi hɔ, na ɔnam asɛmpa no do dze nkwa nye bɛkyebo aba kan mu,

¹¹ no ho nna wɔahyɛ me ɔsɛnkafo, nye somafo, nye kyerɛkyerɛfo.

¹² Ɔno ntsi so na muruhu amandze yi: naaso m’enyi nnto; osiandɛ minyim nyia magye no edzi, na megye dzi yie dɛ obotum akora dza medze ahyɛ ne nsa no esie da no.

¹³ Suo nsɛm pa esusudo a etsee no me nkyɛn no mu yie,

¹⁴ wɔ gyedzi nye ɔdɔ a ɔwɔ Kraest Jesus mu no mu. Akoradze pa a wɔdze hyɛɛ wo nsa no dua Sunsum Krɔnkrɔn a ɔtse hɛn mu no do kora do.

¹⁵ Inyim iyi, dɛ hɔn a wɔwɔ Asia nyina danee fii me nkyɛn;

¹⁶ hɔn mu bi nye Figelus nye Hermogenes. Ewuradze nhu Onesiforɔs fie mbɔbɔr, nna ɔtɔ dɛ ɔma mo ho dwe me, na n’enyi annto mo nkɔnsɔnkɔnsɔn ho.

¹⁷ Na ɔbaa Rome no, ɔdze mbɔdzen hwehwɛɛ me, na ohun me.

¹⁸ Ewuradze mma onnya ɔnoara Ewuradze hɔ ehumbɔbɔr wɔ da no mu; na dodow a ɔsomee wɔ Efeso, woara nyim no papaapa.