1 Timoti 1 - BAEBOR

¹ Paul, Kraest Jesus somafo, dɛ mbrɛ hɛn Agyenkwa Nyame nye hɛn enyidado Kraest Jesus n’ahyɛdze tse;

² dze kɛma Timoti, mo nokwar ba wɔ gyedzi mu; Adom, mbɔbɔrhu nye asomdwee mfi Egya Nyankopɔn nye Kraest Jesus hɛn Ewuradze hɔ nka wo.

Ator Nkyerɛkyerɛ ho Kɔkɔbɔ

³ Dɛ mbrɛ morokɔ Masidonia a meserɛɛ wo dɛ tsena Efeso na eetu binom fo, amma wɔaamma nkyerɛkyerɛ fofor bi,

⁴ na eso woeenntsie anansesɛm nye nananom edzin a wɔkan a wonnwie da a ɔdze nsɛmbisa ba kyɛn Nyankopɔn ne fihwɛ a ɔwɔ gyedzi mu no; dɛmara so na meyɛ no sesei.

⁵ Na ahyɛdze no no botae nye ɔdɔ a ofi akoma a no mu tsew mu nye tsibowa pa nye nokwar gyedzi mu no.

⁶ Ɔno na binom apaa efi ho akɔ nsɛnhun mu;

⁷ wɔpɛ dɛ wɔyɛ mbrakyerɛfo, naaso wɔnntse dza hɔnara wɔka no ase, na dza wɔhom do dzendzen ka ho asɛm no so wonnyim n’adzeban.

⁸ Na hɛn dze, yenyim dɛ mbra no, sɛ obi dzi do nokwar mu a, oye,

⁹ dɛ yenyim dɛ mbra wɔnnhyɛ nnto hɔ mma ɔtseneneenyi, na mbom wɔhyɛe maa mbratofo nye asoɔdzenfo, hɔn a wonnsuro Nyankopɔn, nye ndzebɔnyɛfo, hɔn a hɔn ho nntsew, nye hɔn a hɔn ho egu fi, hɔn a woku hɔn egyanom nye hɔn nanom, nye nyimpakumfo nyina,

¹⁰ ndwaman, hɔn a wɔnye mbarimba deda, edwotwafo, atorfo, ntamtofo, ɔnye biribiara a otsia nkyerɛkyerɛ pa no;

¹¹ dɛ mbrɛ Osiarfo Nyankopɔn n’enyimnyam asɛmpa a wɔdze hyɛɛ me nsa no tse.

Nyankopɔn N’ehumbɔbɔr ho Ndaase

¹² Na meda Kraest Jesus, hɛn Ewuradze a ɔhyɛɛ me dzen no dɛ oebu me nokwafo dze me ahyɛ ɔsom no mu no ase;

¹³ emi a nkyɛ nkan no meyɛ busuyɛnyi nye ɔhonankanyi nye ɔbofo, naaso minyaa ehumbɔbɔr; osiandɛ minnyim na meyɛe wɔ ekyingye mu;

¹⁴ na hɛn Ewuradze n’adom dɔɔ so mbordo maa me na ɔmaa me gyedzi nye dɔ a ɔwɔ Kraest Jesus mu no.

¹⁵ Ɔyɛ nokwasɛm a ɔsɛ dɛ wɔgye pen koraa, dɛ Kraest Jesus baa wiadze bɛgyee ndzebɔnyɛfo nkwa; hɔn mu otsitsir nye emi;

¹⁶ na eso iyi ntsi na minyaa ehumbɔbɔr ama ɔnam emi, otsitsir yi mu, Kraest Jesus eeyi ne penkyɛr nyina edzi, ma maayɛ mfatoho ama hɔn a ekyir no wɔbɛgye no edzi akɔ onnyiewiei nkwa mu no.

¹⁷ Na afei, mbersantsen Hen a ɔtse ase daa, enyiwa nnhu no, na no nkotsee nye Nyankopɔn no, ɔno na enyidzi nye enyimnyam nka no mbersantsen mfesantsen. Amen.

¹⁸ Me ba Timoti, dɛm kasakyerɛ yi na medze hyɛ wo nsa, dɛ mbrɛ nkɔnhyɛnsɛm a wɔkaa faa wo ho kan no tse no, ama aafa do ako ɔko pa,

¹⁹ eesuo gyedzi nye tsibowa pa a binom egyaa mu akyen egu esu wɔ gyedzi no ho no mu dzen;

²⁰ hɔn mu bi nye Himeneus nye Alɛksanda a meyi hɔn ama Satan, ama woeesua dɛ onnyi dɛ wɔka ebususɛm wɔ Nyankopɔn ho.