ROMABLEISIA 8 - Ngowili Yekpei Numu Kpɛlɛɛ Va

Jiala A Ngewɔ Yafei Welei

¹ Faale naa, Ngewɔ ɛɛ yaa nungei nasia lɛɛ tia Yesu Kristi-ni ti wilingɔ hu.

² Gbamaile Ngewɔ Yafei gbayei na a ndɛvui nina ve mu wɛ gbama ajifa mua Yesu Kristi-ni mu wilingɔ hu, i nya gbuanga Sawei gbayei na bu a wa a jumbui kɛɛ hee.

³ Na Sawei ii guni aa pie jifa kpaya gbi ii nuuvu luwui wɛ, Ngewɔ i pieilɔ. Ngewɔ i yeejumbui na lɛɛlɔ i yɛ nuuvu luwui hu a ji i ngi nda Hindoloi yoyoni i wa a nduwu kpuangɔ a nuuvu nda luwu jumbungɔi aako i wote a saahanii nuuvuisia ti jumbui va.

⁴ Ngewɔ i ji wieilɔ aako mu hinda wɔnangɔi nasia wie vulii sawei a nde kɔɔ mu jia a Ngewɔ yafei nda welei, maa jia a nuuvu luwui nda welei.

⁵ Nungei nasia ta luva kia ti luwui a nde la ti ma, ta gili lekee a na lɔ ti luwui longɔ la. Nasia ta luva kia Ngewɔ Yafei a nde la ti ma, ta gili lekee a na lɔ Ngewɔ Yafei longɔ la.

⁶ Bi yaa gilima a na lekee nduwui longɔ la, yeehuvɛi a hee lɔ; bi yaa gilima a na lekee Ngewɔ Yafei longɔ la, yeehuvɛi a ndɛvui lɔ kɛɛ ndiilɛli.

⁷ Faale, nuuvui a wotelɔ a Ngewɔ juwu ji a gili a na lekee nduwui longɔ la, ajifa ɛɛ Ngewɔ Jawei hou, tawao, a tɔnya, ɛɛ gu a houla.

⁸ Nasia ta golo ti luwui liima hindei wielei bu tɛɛ gu a Ngewɔ liima hinda wiela.

⁹ Kɛɛ wua wuii luvama kia wu luwui a nde la wu ma; wuaa luvama kia Ngewɔ Yafei a nde la wu ma — ina Ngewɔ Yafei lɔ wu hu a tɔnya. Numu gbi lekee Kristi Yafei ii ngi hu kɛ Kristi woo yaa a ngie.

¹⁰ Kɛɛ ina Kristi lɔ wu hu, kia bɛɛ wu luwuisia ti wama haama jumbui hu, na hu gbi Ngewɔ Yafei a ndɛvui velɔ wu wɛ ajifa Ngewɔ i wu yɛnga a pɔnablaa, i wua tieni luahu gbatɛnga.

¹¹ Ina Ngewɔ na i Yesu vuluni i ngi wumbu hee hu ngi Yafei lɔ wu hu, kɛ ta hii i Kristi vuluni i ngi wumbu hee hu a ndɛvu velɔ haa luwui jisia wɛ ti wu ma; ngi Yafei na i wu hu a ji wielɔ.

¹² Faale naa, nya ndeengɛisia, kpa lɔ mu ma, kɛɛ luvava ii le kia mu luwui longɔ mu pie la.

¹³ Ajifa wu luvangaa kia wu luwui longɔ wu pie la, wa haalɔ; kɛɛ ina Ngewɔ Yafei sabui gbɔmi hu wa wu wiehinda jumbungɔisia waalɔ, wa ndɛvu majɔɔlɔ.

¹⁴ Nasia ta to Ngewɔ Yafei ma, Ngewɔ leengaa mia a tie.

¹⁵ Gbamaile Ngafei na Ngewɔ i fenga wu wɛ ɛɛ wu yɛ a nduwɔ aa pie waa luwa; yee-Ngafei a wu yɛ a Ngewɔ leengaa lɔ, tawao ngi gbayei hu ma Ngewɔ lolilɔ muɛɛ, “Kɛkɛ! Nya Kɛkɛ!”

¹⁶ Ngewɔ Yafei a gbɛɛlɔ mu yafeisia ma seliva kɛ Ngewɔ leengeisia lɔ a mue.

¹⁷ Jifa Ngewɔ leengaa a mua, ma lubɛi nasia majɔɔlɔ i ndama gbatɛni ngi nungɛisia va, tawao mua Kristi-ni ma gbɔlɔ na ma Ngewɔ ndama gbatɛnga ngi va, gbamaile ina Kristi gbalei mua tieni mia, mua tieni ma ngi wɔlɔyɛi bɛɛ majɔɔlɔ.

¹⁸ Nya langɔe la kɛ kpalɛi na i lama mu ma kiahuna numu ɛɛ huma ngɔlɔyɛi na ma Ngewɔ i wama kɛma a mue.

¹⁹ Ngewɔ gbatɛ-hani kpɛlɛɛ ti yaamɛi laalangɔe hu ta Ngewɔ mawulo ngi leengeisia gɛva.

²⁰ Ajifa Ngewɔ pieilɔ ngi gbatɛ-hani kpɛlɛɛ ti wote a gbaama fuŋ, ti nyɛkɛ ii le, kɛɛ jifa i nɛɛni Ngewɔ wɛ yɛ hii a yɛ na. Na hu gbi Ngewɔ liilomɛi ji lɔ Ngewɔ wɛ,

²¹ kɛ folo yila Ngewɔ a ngi gbatɛ-hani gbi gbualɔ hee kɛɛ ndulayɛi hu, tawao yee kpatɛ-haniisia ta gbɔ lɔ a kohunɛ wai na veva Ngewɔ leengeisia wɛ.

²² Ajifa mu kɔɔlɔ kɛ haaŋ i to watii ji ma Ngewɔ gbatɛ-hani gbi tiaa wɔɔma a kpalɛ kia ndo-le-goohugbalɛi i na.

²³ Kɛɛ Ngewɔ gbatɛ-hanisia lekee ii le; mua Ngewɔ Yafei i mu hu a hanii yeehaalayee Ngewɔ fenga mu wɛ gbama, mua bɛɛ mua wɔɔma a goohu wee, ma Ngewɔ mawulo i mu yɛ a ngi leengeisia, i yama i mu gbuhɛi gbi gbua nduwɔya hu.

²⁴ Ajifa ji mu liiloni Ngewɔ ma tamia i pieni mu bawoni; kɛɛ mu na lɔngaa mu kulɔgbema, kɛ liiloma vulii ii le. Ajifa ye lɔ a hani na gulɔgbe i tɔma?

²⁵ Kɛɛ mu yaa hani na gulɔgbema muii tɔma, ma mawulolɔ a ndiilo.

²⁶ Hii lɔɔ Ngewɔ Yafei a wa gbɔva mu ma ajifa kpaya gbi ii mu hu. Gbamaile muii kɔɔ pelei na mahoungɔ mu Ngewɔ vɛli la; Ngewɔ Yafei vulii lɔ Ngewɔ manɛnɛma mu va, a gbala a kpalɛi na lama ngi ma na numu gbi ɛɛ gu a ndela.

²⁷ Tawao Ngewɔ na a nuuvuisia ti liisia hulɔ, i kɔɔlɔ gbɔɔ Ngewɔ Yafei i gilima la; ajifa Ngewɔ Yafei lɔ a Ngewɔ manɛnɛ ngi leengeisia va tawao a pielɔ a pelei na a nɛɛ Ngewɔ wɛ.

²⁸ Mu kɔɔlɔ kɛ hinda gbi hu Ngewɔ lɔ yengema kpekpe gɔliva nungei nasia va ti longɔ a ngie, nasia i wilanga a loko lola ti ma aako na i hugbatɛnga pieva i wie.

²⁹ Nungei nasia Ngewɔ i wilanga a loko lola ti ma pɛiŋ, ti ya ti le, i ti gbuanga ma gba kɔɔ ti wie kia ngi Hindoloi na, aako ngi Hindoloi i yɛ a kplaloo ndewehingaa gboto lia.

³⁰ Nasia Ngewɔ loko looni ti ma pɛiŋ i ya ti le, i ji wielɔ kɔɔ ti yɛ a ngi woo; tawao nasia i loko looni ti ma i ti yɛlɔ a pɔɔnablaa i taa tieni luahu gbatɛ; tawao nasia i taa tieni luahu gbatɛni, i pieilɔ ti ngi wɔlɔyɛi bɛɛ majɔɔ.

Ngewɔ Loyii A Mue Yesu Kristi Sabui Hu

³¹ Ji na ji kpɛlɛɛ i gonanga mu ma, gbɔɔ ma nde? Ina Ngewɔ lɔ mu wooma, ye lɔ a lapi a mue?

³² Ii gbani ngi Hindoloi vulii bɛɛ mahu, i ngi gbuailɔ a saa mu kpɛlɛɛ va! I ngi Hindoloi veilɔ mu wɛ — ɛɛ hani gbi ve mu wɛ gbama?

³³ Ye lɔ a njia wɛlɛ nungei nasia ma Ngewɔ i loko longa ti ma? Ngewɔ vulii i ndenga yɛ pɔɔnablaa mia a tie.

³⁴ Numu gbi a gulɔ hɔɔ i ti lɛɛ? Yesu Kristi lɔ i haani, ɔɔ mu nde muɛɛ, tamia Ngewɔ i ngi vuluni i ngi wumbu hee hu tawao taa heini Ngewɔ yejei hu. Taa Ngewɔ manɛnɛma mu va.

³⁵ Gbɔɔ naa a gu i mu gbua Kristi lomɛi ma? Kpundɛ a gulɔ a piela ɔɔ hindagbɔundaa ɔɔ ngakpɛ nyamu ɔɔ ndɔlɛ ɔɔ fɛɛli ɔɔ hinda nyamuisia ɔɔ hee?

³⁶ Kia Ngewɔ Gɔlɛi i ndeni la yɛ, “Hee lɔ hɛlɛni mu mahu folo kpɛiŋ bi va Ngewɔ tiaa mu houma kia mbalangɛi nasia ti lima a tie ti waama.”

³⁷ Sawo, hindei ji kpɛlɛɛ hu mu temaya lavengɔ majɔɔnga a numu na i loni a mue ngi sabui hu!

³⁸ Ajifa ngi kɔɔlɔ vuli pandawanda kɛ gbɛogbɛ ɛɛ mu gbua ngi lomɛi ma: hee ɔɔ ndɛvui; malikangaa ɔɔ ngelema-mahugbeblaa kɛɛ yeekpayɛisia; ngaamɛi ji ɔɔ kulɔmɛi;

³⁹ dunyei yeena i mu maahu ɔɔ dunyei yeeji i mbui — hani gbi ii na Ngewɔ gbatɛ-hanisia lia aa gu kunafɔ a mu gbuala Ngewɔ lomɛi na ma i kɛnga mu Lemɔi Yesu Kristi sabui hu.