ROMABLEISIA 7 - Ngowili Yekpei Numu Kpɛlɛɛ Va

Nyaha Jɔɔ Jawei Yeetɔmaseli

¹ Nya ndeengɛisia, na nya longɔ ngi nde wu ma wu yeembui gɔɔlɔ vulii ajifa wu gbi wu Sawei hinda hugɔɔlɔ. Numu a yɛlɔ lekee Sawei bu ji ndɛvu a yɛ ngi hu.

² A mu hinimɔ yila wumbu lɛɛ a tɔmasɛi; taa Sawei bu ngi hinii gama ina lekee ndɛvui lɔ yeehindoi hu; kɛɛ hindoi i haangaa, kɛ i gbuanga Sawei na bu a yɛ mbu ngi hinii gama.

³ Faale ina, taa hindo weka ti heingaa ngi hinii vulungɔ, ta ngi lolilɔ a pue gbuamɔ; kɛɛ ngi hinii i haangaa, kɛ sawei i gbuanga ngi ma tawao a hindo weka jɔlɔ ɛɛ yaa yɛ a pue gbuamɔ.

⁴ Hii wu na, nya ndeengɛisia. Piengɔe bɛɛ wua bɛɛ wu haanga, sawei ta ngi wɛ, ajifa wua Kristi gbuhɛi-ni wu yɛnga yakpe; tawao kiahuna na ngi woo lɔ a mue, ta hii Ngewɔ i ngi vuluni i ngi wumbu hee hu aako mu yɛ a ngengeblaa yekpe Ngewɔ yengei hu.

⁵ Gbamaile watii na lɛ mu yɛ mu luwui liilɛli hindeisia lekee wie, Sawei i pielɔ jumbu wie mani i gbaya mu luwuisia hu, tawao mu yɛilɔ a ngengeblaa yekpe na a mu waa.

⁶ Kɛɛ kiahuna na, Ngewɔ i mu gbuanga Sawei bu ajifa mu haailɔ Sawei na wɛ i mu wungɔ wɔɔ jɔwɔ ya. Faale muii yaa Ngewɔ yengei wiema a pele wovei na Sawa nyɛingɔi i kɛni, mu yengema na a Ngewɔ Yafei welei lɔ.

Sawei Lɔ A Jumbu Wielei Magɛ

⁷ Gbɔɔ naa ma nde? Ma ndelɔ muɛɛ jumbui lɔ Sawei vulii ma? Muɛɛ na le kulobɛɛ! Kɛɛ Sawei lɔ i pieni ngi kɔɔ gbɔɔ jumbu le. Ngii yɛ kɔɔ gbɔɔ mani nyamu wiela le numu weka yeya-hani ma kiaa Sawei ii ndeni aa yɛma, “Baa mani nyamu wie numu weka yeya-hani gbi ma.”

⁸ Jumbui i pele jɔɛilɔ pieva mani nyamu yeelasii gbi wiemani i nya lɔ a ji i yengeni a Sawei. Ajifa Sawei ji ii yɛlɔ na, jumbui haangɔe.

⁹ Nya vulii nya vulungɔ yɛla wɔɔ ji Sawei ii yɛ na; kɛɛ ji Sawei i wani, jumbui i vuliilɔ,

¹⁰ kɛ ngi haanga. Tawao Sawei yeena numu lii yɛ ma wava a ndɛvu, i wani a hee lɔ nya va.

¹¹ Jumbui i pele jɔɛilɔ i nya wɛlɛ ji i yengeni a Sawei; jumbui i yengeni a Sawei lɔ i nya waani.

¹² Faale na Sawei kpɛlɛɛ makpɔngɔ i gbuani Ngewɔ gama lɔ tawao Sawei yeengila gbi i gbuani Ngewɔ gama lɔ, tawao pɔɔnangɔ, kpekpengɔ.

¹³ Ji kɛilɔ hɔɔ kɛ na kpekpengɔ ta lɔ i wani a nya haala? Ii hii kulo bɛɛ! Jumbui mia i na wieni; jumbui i yengeni a na lɔ kpekpengɔ i wa a hee nya gama aako jumbui yɛyii yeetɔnyɛi i gɛ a nuuvungaa. Sawei a pielɔ jumbui nyamuyii i gɛ hulewengɔ.

Kɔi Na I Gɔma Mu Lii Hu

¹⁴ Mu kɔɔlɔ kɛ Sawei i mu yafeisia va lɔ; kɛɛ nya ngi yɛni a nuuvu lɔ nduwui i nya ma, nya majiangɔ a nduwɔ jumbui ma.

¹⁵ Ngii kɔɔ vulii gbɔɔ ngi piema; ajifa ngɛɛ na wie nya longɔ a yɛla ngi pie, nga na lɔ wie nya lolongɔ la.

¹⁶ Ji nga na wie ngii loni ngi pie, a kɛlɔ kɛ ngi lumanga Sawei wɔnalaa ma.

¹⁷ Faale nya vulii ii le ngaa yɛ hindei jisia wiema; jumbu wielei na i heini nya lii hu, ta le.

¹⁸ Ngi kɔɔlɔ kɛ kpekpeya wiela ii nya hu — nya nuuvuyei hu. Ajifa kia bɛɛ mani i nya ma kpekpe wieva, ngɛɛ gu ngaa pie.

¹⁹ Kpekpei na nya longɔ ngi pie, ngɛɛ pie; nga nyamui na lɔ wie ngii loni ngi pie.

²⁰ Ina na ngii loni ngi pie ta mia nga pie, na a kɛlɔ kɛ nya ii le ngaa yɛ hindei jisia wiema; jumbui wielei na i heini nya lii hu, ta le.

²¹ Faale ngi kɔnga kɛ Sawei ji mia i yengema: kpemɛi nya longɔ a yɛla ngi na wie kpekpengɔ, na nyamungɔ ta lekee lɔ nga vɛmbɛla.

²² Nya lii longɔe a Ngewɔ Jawei.

²³ Kɛɛ ngi sawa weka lɔnga, i gba yengema nya lii hu yeesawei ji a lapi a sawei yeena nya longɔ la. A nya yɛlɔ a jɔwɔyamɔ jumbui jawei na bu i yengema nya lii hu.

²⁴ Nya li nyaningɔe hulewengɔ gbo. Ye lɔ a nya bawo nduwui ji yeya i piema ngi haa?

²⁵ Ngi siɛgbua Ngewɔ ma nya bawo va mu Lemɔi Yesu Kristi sabui hu! Ji lɔ hɔɔ nya yɛyii le: a nya wuma wee nya lii a gulɔ a jialaa a Ngewɔ jawei, nya luwui ta a jia a jumbui jawei.