ROMABLEISIA 6 - Ngowili Yekpei Numu Kpɛlɛɛ Va

Mu Vulunga Kristi Sabui Hu

¹ Gbɔɔ hɔɔ naa ma nde? Ma ndelɔ muɛɛ mu yɛ lekee a jumbui wie aako Ngewɔ yauwandei maa i to?

² Muɛɛ na wie kulo bɛɛ! Jumbui ta ngi gama, mu haanga, ma yee na gu mu yɛ lekee a jumbu wie mu lɛɛvui ji hu?

³ Ajifa wu ji gɔɔlɔ pandawanda: ji ti mu wuani mua Yesu-ni mu wili hu, mu haailɔ kia i haani la.

⁴ Ji ti mu wuani hɔɔ, mua tieni lɔ mu haani, ti mua tieni gbɔwu aako, kia lɔɔ mu Kɛkɛ gbaya gabandengɔ wai i ngi wumbuni hee hu, mua bɛɛ mu yɛ ndɛvu nina hu.

⁵ Gbamaile ina mua tieni mu yɛlɔ yakpe hee na hu i pieni, hii lɔɔ mua tieni ma yɛ yakpe a ji Ngewɔ a mu vulu i mu wumbu hee hu kia i pieni a ngie.

⁶ Tawao mu kɔɔlɔ kɛ mu yɛyii wovei taa Kristi-ni ti haanga krɔsii ma aako jumbu wie gbayei na wɔɔ i yɛ mu yɛyii wovei hu i nyani, aako mua yɛ gbɔma a jumbui luwɔngaa.

⁷ Gbamaile numu i haangaa kɛ i gbuanga jumbui gbayei bu.

⁸ Ina mua Kristi-ni mu haanga, mu langɔe la kɛ mua tieni ma vululɔ.

⁹ Ajifa mu kɔɔlɔ kɛ Ngewɔ i Kristi vulunga i ngi wumbunga hee hu tawao kunafɔ ɛɛ yaa haa gbɔma kpaya gbi ii yaa hee wɛ ngi maahu.

¹⁰ Hee na i pieni, i pieni jumbui gama lɔ kunafɔ va; tawao ndɛvui na naa i hu ndɛvu le Ngewɔ gama.

¹¹ Hii mahoungɔ wu gili a wua yekpe kɛ wu haangɔe jumbui gama, kɛɛ wu vulungɔ Ngewɔ gama wua Yesu Kristi-ni wu wilingɔ hu.

¹² Wu gbuhɛisia taa yaa yɛ jumbui gbayei bu, wa golo hindei nasia wɛ wu longɔ la jifa nuuvu a wue.

¹³ Tawao waa wu gbuhɛisia yeehinda gbi wuaa jumbui gbayei bu hinda nyamu wieva la. Kia na aa wie, a wua yekpe ve Ngewɔ wɛ kia Ngewɔ i wu gbuanga hee hu i wu vulunga, wu wu gbuhɛi kpɛlɛɛ ve ngi wɛ pɔɔna hindangaa wieva la.

¹⁴ Waa luma jumbui i temaya jɔɔ wu maahu; ajifa wuii Sawei bu, wu kpekpeyei na lɔ bu Ngewɔ i kɛnga a wue.

Pɔɔnɛi Luwɔngɛisia

¹⁵ Gbɔɔ hɔɔ ma nde? Mahoungɔe mu jumbu wie jifa muii Sawei bu kɛ lekee Ngewɔ gbekpeyei? Muɛɛ na wie kulo bɛɛ!

¹⁶ Wu kɔɔlɔ pandawanda kɛ wu wua yekpe wuaangaa numu bu nduwɔya hu golova ngi wɛ, kɛ wu yɛnga a nduwɔngaa numui na bu wa golo ngi wɛ — wuii yɛilɔ a jumbui luwɔngaa, wu hee jɔɔ hu, kɛ wa yɛlɔ a koloya luwɔngaa, Ngewɔ i wu yɛ a pɔɔnablaa i wua tieni luahu gbatɛ.

¹⁷ Kɛɛ a mu siɛ gboto gbua Ngewɔ ma! Ajifa a watii yila wɔɔ jumbui luwɔngaa yɛla a wue; kɛɛ yeewatii na wu goloilɔ a wu lii gbi tɔnyɛi nasia bu wu tɔni kaai na hu wu majɔɔni.

¹⁸ Ngewɔ i wu gbuailɔ jumbui gbayei bu i wu yɛ a ngi luwɔngaa aako wu pɔɔnɛi wie.

¹⁹ Gbɛɛ ngi tɔmaseli gbua mu luvayii hu folo gbi, ngi njɛpɛngaa le wa gu a mbugɔɔla. A watii yila wu wua yekpe wuaailɔ sawa nyanilɛi kɛɛ wɔji hinda wielei yeenduwɔyei hu aako wu hinda nyamui yeelasii kpɛlɛɛ wie. Hii lɔɔ mahoungɔ wu wua yekpe wuaa pɔɔna hinda wielei yeenduwɔyɛi hu hindei nasia wieva Ngewɔ longɔ la.

²⁰ Watii na wu yɛ jumbui luwɔyɛi hu, kpa ii yɛ wu ma pɔɔna hinda wieva.

²¹ Gbɔɔ wu majɔni hindei nasia wieva wu wufengɔ ma na? Hindei nasia wu pieni yeehuvɛi lɔ a hee!

²² Kɛɛ kiahuna naa wu gbuanga jumbui luwɔyɛi hu, wu yɛnga a Ngewɔ luwɔngaa, wu pawɛi lɔ a ndɛvui na fengɔ vulii Ngewɔ wɛ, tawao yeengakpuami mia a kunafɔ lɛɛvui.

²³ Ajifa jumbui pawɛi lɔ a hee; kɛɛ na Ngewɔ a fe gbama ta mia a kunafɔ lɛɛvui a mu Lemɔi Yesu Kristi sabui hu we.