HINDEI MAGƐNI A JƆN 9 - Ngowili Yekpei Numu Kpɛlɛɛ Va

¹ Kɛ malikei yeelɔɔluyei i bulii vɛnga. Kɛ ngi tumbekei lɔnga i yɛ gbuani ngeleima i gulani ngeebu; ti ndɔu-lama jii wumbuilɔ ti da ngi yeya.

² I yee ndowa hubɔngɔ wai lawoilɔ, ndulu-lɛilɛi wa a hiye na, piengɔ kia ndulii na a yɛ gbuama ngɔmbu pu lakpawa hu; foloi tia ngelei magbindi lɔ nilinili a ndulii na yɛ gbua ndowa hubɔngɔ wai hu.

³ Kondeisia ti gbuailɔ yee ndulu lɛilɛi wai hu ti yei ti vaya dunyei hu, kɛ kpaya i wuaa ti hu kia nguangɔ la kekemɛisia hu.

⁴ Ti ndeilɔ ti ma tɛ taa kpitiisia waa, ɔɔ nguluisia, ɔɔ tuhani weka gbi lekee; ta nasia lekee lɔ gbalɛ Ngewɔ maiki yeekpɔi ii wuni ti lawaasia.

⁵ Kpaya ii veni kondeisia wɛ yee nuuvui jisia waa va, kɛ lekee ti tɔɔya va ngawu lɔɔlu va. Kpalɛi na a gbua ti tɔɔyɛi hu kpuangɔ a yɛla a kpaalɛi na numui a majɔɔ ji kekemɛi a ngi bɔ.

⁶ Yee foloi nasia ma nuuvuisia ta hee mamani wielɔ, kɛɛ tɛɛ gu a haala; ta lolɔ ti haa kɛɛ hee a wilalɔ ti ma.

⁷ Ti yɛyii ma, kondeisia ti gbuangɔ yɛla a soisia ti ti mayilinga li va koe hu; ti wuisia mayilingɔ yɛla a haningaa kpuangɔ a kanigbɔlu bɔleisia, tawao ti yambui gbuangɔ yɛla nuuvu.

⁸ Ti wundie gbuangɔ yɛla a nyaha wundie, ti laa yɔungɔli kia sugbui laa yɔungɔli na.

⁹ Ti liimɛisia mayilingɔ yɛla a hani kpuangɔ a kɔlu-lomeisia, tawao ti gbakisia yee hugondowoi gbuangɔ yɛla a soisia ti vahangɔ ti yilingɔ kongoloisia ma ti gindɛnga liva koe hu.

¹⁰ Ngolisia lɔ ti ma nyi wuava la kia kekemɛi na, tawao a ti wolimisia lɔ kpaya na nuuvuisia gbalɛva ngawu lɔɔlu va.

¹¹ Maha lɔ ti yeya malika a ngie i looni ti maahu. Ngi biyei mia a Abadɔn Hibu yie hu, kɛ Apoliɔn Gliki yie hu (na yeembui a “Hunyaniwiemɔ”).

¹² Masube yeehaalayei i lewenga; ji woma masuba fele longɔe woma ti gulama.

¹³ Kɛ malikei yeeweitayei i bulii vɛnga. Ngi ngoo mɛnilɔ a gbua a sɔkui nasia hu wee mia kanigbɔlu jaa gbuamɛi gbatɛngɔ na Ngewɔ gulɔ.

¹⁴ Yeengoi yɛ malika weitei ma i looni bulii houni ngi yeya, “Gbe malika naanisia ma ti ngilihu mia Yufletisi yeenjawai la!”

¹⁵ Faale ti gbeilɔ malika naanisia ma, ti magbatɛngɔ yɛla hawei na va, yeefoloi na ma, yee ngawui na hu, i yee foi na goohu nuuvuisia kpɛlɛɛ ti gaka sawa yeekaka yila waava.

¹⁶ Ti kɔ-bleisia ti yɛ heini soisia maahu ti jika gɛilɔ a nge; ti yɛ miliɔŋ hɔndɔ fele.

¹⁷ Tawao hengei hu ngi tɔilɔ ti heini soisia maahu kɔlu lomɛisia ti ti ma kpɔlungɔ jeele kia ngɔmbui na, tawao baajingɔ kia lekee sɔifɛi na. Yeesoisia ti wuteisia gbuangɔ yɛla a sugbuisia ti wutei, tawao ngɔmbui, ndulii kɛɛ sɔifɛi yɛlɔ a vaiŋ a gbua ti laa.

¹⁸ A fitina sawangaa mia Ngewɔ i dunyei yeekaka yila kaka sawa goohu gbɔyɔuila: i la ngɔmbui ma kɛɛ ndulii kɛɛ sɔifɛi na yɛ gbua a soisia laa we.

¹⁹ Soisia ti gbayei a gbua ti laa lɔ kɛɛ ti wolimɛi we. Ti wolisia ti gbuangɔ a kalingɛisia, nguisia ti heiheingɔ ti ya, ta buwumbu ta nungeisia nyila.

²⁰ Nuuvui yeemɔnui nasia kpɛlɛɛ ti loni fitini ji ii gulani ti ma taa haa ti gangɛilɔ wounveva hinda nyamui nasia ma ti yɛ a pie. Tii lumani ta gbe ngafangeisia ti vɛlila ma kɛɛ nɔmɔlisia kpatɛngɔ a kanigbɔlu, kɛɛ kanigole, kɛɛ blasi, kɛɛ kɔtii, kɛɛ a ngului na ɛɛ kulɔ lɔ, ɛɛ njia humɛni tawao ɛɛ gu a jia.

²¹ Tii lumani kulo bɛɛ wounveva ti gbe a nungaa waala, njosololi hindeisia ma, puegbualei ma kɛɛ huma wielei.