HINDEI MAGƐNI A JƆN 10 - Ngowili Yekpei Numu Kpɛlɛɛ Va

Hengei A Malikei Na Kɔlɔ Gotongɔ Wuloi Ngi Yeya

¹ Kɛ ngi malika weka waa lɔnga i gbuama ngelegoohu a yei, njagbili ngi magbindingɔ, ninginangɛi gakaangɔ a ngi wui, tawao ngi yambui a voo kia foloi na kɛɛ ngi gɔwɔisia ti gbuangɔ a ndɔkɔisia ngɔmbui houga ma.

² Kɔlɔ gotongɔ wulo yɛlɔ ngi yeya hulawongɔ. I ngi yejama gɔwɔi wumbuilɔ i hitɛ gboyei hu, i ngi gɔwɔma gɔwɔi bɛɛ wumbu i too ndɔlɔ bengɔi ma,

³ kɛ i gbaowonga ngeleya yeengoi kpuangɔ a njalɛisia ti gbaowoi na. Kia i gbawoni kɛ ngele wɔfleisia ti ndahounga kpɛlɛɛ a lenga.

⁴ Ti ndahoungɔ lekee, kɛ ngi nya magbatɛnga na nyɛiva ti wama ndema. Kɛɛ ngoo ndeilɔ a gbua ngelegoohu yɛ, “Na lɔwu ngele wɔfleisia ti ndema, tawao baa pu kulobɛɛ kɔlɔ ma!”

⁵ Kɛ ngi malikei na lɔnga i looni gboyei kɛɛ ndɔlɔ bengɔi ma i ngi yejama lokoi wumbu i too ngelegoohu,

⁶ kɛ i gbolonga kpo Ngewɔ biyɛi hu, na i na kunafɔ ta ngi da kunafɔ, na ngelegoohu gbatei i kpɛli hani gbi lekee ma i hu, i dunyei gbatɛ i kpɛli hani gbi lekee ma i hu, kɛɛ gboyei i kpɛli hani gbi lekee ma i hu. Kɛ yeemalikei ndenga yɛ, “Lɔwɔ mawulo la gbii yaa ma!

⁷ Kɛɛ tawao foloi nasia ma malikei yeewɔflei a ngi bulii vɛ, Ngewɔ hindei yeehulɔwungɔi na wɔɔ i hugɛni a ngi yengeblaa kɛɛ ngi lutuisia nda a houlɔ.”

⁸ Nawooma ngooi ngi yɛ mɛnini i yɛpɛi nya gama a gbua ngelegoohu i gbɔma ndeilɔ yɛ, “Li bi kɔlɛi na wumbu laani ndawongɔ malikei na yeya looni gboyei kɛɛ ndɔlɔ bengɔi ma.”

⁹ Kɛ ngi ya yeemalikei na gama ngi ngi mɔli nya gɔva a kɔlɔ gotongɔ wuloi. Kɛ i ndea nya ma yɛ, “Mbumbu bi mɛ; a bi goohu gbinilɔ, kɛɛ a nɛɛlɔ bi laahu i wie kia kɔmii na.”

¹⁰ Kɛ ngi kɔlɔ gotongɔ wuloi wumbua ngi yeya ngi mɛ, tawao i nɛɛlɔ kia kɔmii na nya laahu. Kɛɛ kia ngi kpɔlini, nya goohu gbinilɔ ŋae.

¹¹ Kɛ ti ndea nya ma tɛ, “Yama huɛɛŋ gbɔma bi kulɔma yia le kɔloongɔ nunga gbotoa ma, ndɔlɔ gbotoa ma, kɛnyɛblaa gbotoa ma kɛɛ mahangeisia.”